Ebereei 13

Dtiic ꞌcĩ aaꞌnyĩk Nyekuc hatal

1Aallattia ĩmmĩnanit ꞌgoonoggu haauto hĩ ꞌgotoonogu hĩ ngoonogu. 2Ma hataarroꞌthu ngaatĩ avvaannu eet ꞌcĩg ĩĩn tahan hatĩ au õlõ, hĩnĩngĩtĩ eeta ũgẽẽgĩ ꞌcĩg baag avva tahan, ĩko hinnia avva aajĩlẽẽt nẽ hõllõngaa aga ngaatĩ ĩĩnnĩ aajĩlẽẽt buúk. 3Ummukta ꞌgoonogu ꞌcĩg aattĩg baabuuthatõõ, haau hĩcĩ ababuuthaniinnu hĩ ĩhõõggõ hõdẽĩ. Ummuhuttooth ꞌgoonoggu ꞌcĩg ẽhẽc eeta hippiirria nẽ má uuki nẽẽgĩ, aꞌnyĩĩk haau hĩcĩ uukennu niig buúk.

4Aꞌnyĩĩk maac hĩ ngaa hũrũmtĩ ũdũt. Aallattia ũrũmtĩ ũdũt, hĩnĩngĩtĩ uuk hatĩ Nyekuci eet ꞌcĩ adĩman thooꞌthiok ꞌcĩg ĩĩn ꞌriiring ꞌthũwaana. 5Ma haangallu ꞌrabbẽẽtĩ, aaꞌnyĩk ꞌrabbẽẽt ꞌcĩg abadtẽc ꞌcĩg aꞌnyaku hũũppattuunga. Hĩnĩngĩtĩ baa aĩ Nyekuci ꞌBuuhaa cĩnnĩ,

“Hõllõngaa hatĩ halahaneekuung

nẽ hudhuheehuung tuu.”#Tigiil ꞌBuuk cĩ Ditoronomi 31:6

6Occa aaꞌnyuung thõõth ciee othoothit ĩĩtõ,

“Ĩĩn Makayyioohiti ellioohit caannĩ!

Inni occa hatĩ hitingõlĩ naa

thõõth ꞌcĩ adĩmaneeka eeta haaga ho?”#Tigiil ꞌBuuk cĩ Tegellwaanu 118:6-7

7Ummuhuttooth makayyiook cugguung baag allimaneekuung ngagiit thõõth cĩ Nyekuci. Ummuhuttooth thooꞌthiok ꞌcĩg abũnnaa baag adĩman nẽẽg rũgẽtaa cĩnĩĩng nẽ unuyyu terethiinit cĩ lemiinit cĩnĩĩng.

8Aitiõõ Yeesu Krĩstõ hõllõngaa ẽgẽẽranni. Aaĩ nẽẽ baalõ hĩ kõr nicci nẽ aalla ooo. 9Nẽẽthĩ, ma haaꞌnyiku ꞌlimman ꞌcĩ abathĩ higgooluung ngagiita. Mẽẽn ngaatĩ hammũdaanĩ ꞌtirrian tarbalꞌthẽẽtaa cĩ Nyekuci, hĩllõõan ꞌgeenniok ũgĩ ꞌcĩg hadahĩ. Nẽẽthĩ, aitiõõ ꞌgeennioha cieeg hõllõngaa ẽẽl eet ꞌcĩg adak ko. 10Haꞌnyak naag altaarĩ#13:10 Haꞌnyak naag altaarĩ: Aĩ thõõth ꞌcĩ aĩ, “Haꞌnyak naag altaarĩ ho” nẽẽ, ĩĩn Yeesu paadĩr cĩnaac cobbi hẽẽtahujjieen, ꞌcĩ baa ẽlẽmana ẽlẽ cĩnnĩ hĩĩ ꞌgaarrieenit ꞌcĩ ũũnnĩk ꞌthẽccanẽẽt cĩggaac. ꞌcĩ hõllõngaa aduhẽẽnĩ paadĩrꞌnya ꞌcĩg adticanni ꞌCieethaa cĩ Nyekuci.

11Baa õkõõĩ paadĩrĩ cobbi biyyi cĩg heleggeennu hĩĩtõ ꞌgaarriẽẽn cĩg ꞌthẽccaneetu ꞌCieetõõ cĩ Nyekuci, Ngaatĩ Aꞌngirannii Ẽllẽẽmĩth Gẽrrẽẽt nẽ ĩwaaddi hẽlẽggĩ niccieeg ĩꞌthõng huturumit hĩĩ hatiꞌtheet, battaala ngaatĩ aitiõõ eeta tõõ.

12Baa accananni Yeesu nẽẽ buúk battaalaa cĩ ꞌtaaũn cobbi, hátĩ haanytĩk biyyieeta cĩgĩnnĩg eet helleemito. 13Ĩnõõ ꞌcĩ adiim hõõĩ naag buúk battaalaa cĩ ꞌtaaũnõõ hõõt hummuddioothĩk Yeesu, hátĩ hotholit pĩĩrnanĩt cĩnnĩ. 14Hĩnĩngĩtĩ aitiõõ lõõcĩ ciee hõllõngaa ĩĩn õlõ cĩnaac ꞌcĩ aalla ũdũt, nga hẽrẽ naag õlõ ꞌcĩ nga aayyiaa.

15Nẽẽthĩ hoti ho, haanytĩk Nyekuc ꞌgaarrieenit ꞌcĩ hadĩkꞌthĩ ĩnõõnnõ nẽ huduktaak hĩĩttĩk hathĩhĩ naag ĩnõõnnõ. 16Nẽ ma hatarroꞌthu ngaatĩ eellu ꞌgoonogu nẽ othollu ijjio cugguung hĩ ĩhõõggõ. Aduhõõ thõõth ciee hĩ ngaatĩ aaꞌnyiku Nyekuc ꞌgarrieenit ꞌcĩ atalĩ nẽẽ thõng. 17Niig lemmioha, ĩthĩhĩt makayyiook cugguung nẽ ĩdĩmattu thooꞌthiok ꞌcĩg aduhaakuung nẽẽgĩ. Ebekuung nẽẽg ngagiit nẽ Nyekuc ꞌcĩ hatĩ ẽttẽẽd thooꞌthiok cĩggĩĩng. Nẽẽthĩ, ma haaꞌnyiku ĩhõõggõ hõngõõngõõcõ dtiicaa cĩnĩĩng. Aanytĩk ĩhõõggõ haccamattoothĩk, hĩnĩngĩtĩ aitiõõ hinnia hatĩ hõllõngaa eelluung ngagiit ũdũt.

18Alayyiooyyieetu ngagĩĩta. Tẽllĩg ꞌthinneeti cĩggaang nẽ hattĩmanna hõdõõkõthĩ ngaatĩ hadĩmanna thooꞌthiok ꞌcĩg aũlanĩ. 19Hadiimi naa laiinit cunuung hĩ Nyekuc, hátĩ hẽhẽẽrõnaahuung ngagiit tarĩ hĩdĩĩkoothong.

20Aꞌnyĩĩk Nyekuc cĩ ganõõnõ baa arũgtha Makayyioohit cĩnaac Yeesu, ꞌcĩ ĩĩn tũhayyioohit cobbi cĩ aꞌthaannu, hikia hadak lõhõt ꞌcĩ aalla ũdũt hĩ eet cĩgĩnnĩg. 21Halayyi naa haini, aꞌnyĩĩk Nyekuc haaꞌnyuung ĩthĩhĩt ĩnõõnnõ nẽ hatĩ gõõng ĩdĩmattu thooꞌthiok ꞌcĩg aũlanĩ. Aꞌnyĩĩk Yeesu heeluung ĩdĩmanit thõõth ꞌcĩ aaꞌnyĩk Nyekuc haccamanoothĩk. Aꞌnyĩĩk bulẽẽnĩt haau hĩ Yeesu Krĩstõ ooo! Aamẽn.

22ꞌGotoonoga hĩ ngoonoga, hẽhẽẽdakuung naa ngagiit waraga ꞌcĩ huturi haaga, hátĩ hũkũtanuung ngagiita nẽ halayyuung ngagiit ĩthĩhĩt thõõth ꞌcĩ haduha naa ho jurrung.

23Hadiimmuung naa ngagiit ꞌyioko agaac ĩĩtõ, ooggia ꞌgõtõõnẽẽtĩ cĩnaac Timotteeo baabuutha. Má ikia nẽẽ ngaati hĩdĩĩkoothong, hõthõkta hatĩ ĩnõõnnõ hikia hicinuung ngagiita.

24Hõlõ, ĩꞌthaayyihaangu makayyiook cugguung hĩ eet cĩg Nyekuci vẽlẽk. Ĩꞌthaayyuung lemmiooha cĩg Nyekuci ꞌcĩg aattĩg Itali buúk ngagiita.

25Hala naa Nyekuc hĩĩ tarbal nẽ aggatanuung ngagiit vẽlẽk.

Currently Selected:

Ebereei 13: did

Highlight

Compare

Copy