ꞌThianaattõ 37

Honoothinit cĩ Yothebo

1Baa õlõman Yakobo ligaa cĩ maacõnĩ Iꞌthaako looccaa cĩ Kanaanĩ.

2Nẽẽthĩ, nyeemuut cĩ õlõ cĩnnĩ cieeni.

Ma baa ĩĩtõ Yothebo irkiꞌnyia õmmõtõ hĩ tũrkĩramma, baa gõõng ũũha nẽẽ hĩ ꞌgõtõõnõgĩ cĩg ꞌcieethi ũgĩ hẽlẽggĩ cĩg maacõnĩ. Baa lõhõlĩ cĩg Bĩlha hĩ ꞌThĩlpa ũgẽẽgĩ. Baa gõõng aku aduhaak Yothebo maaꞌnyĩ thooꞌthiok ꞌcĩg abathĩ vẽlẽk ꞌcĩg adĩman ꞌgotoonoggia.

3Baa ammĩnan Ĩꞌthĩraẽlĩ ngeerĩnĩ Yothebo gẽrrẽẽt hĩllõõan lõhõlĩ cĩgĩnnĩg vẽlẽk, hĩnĩngĩtĩ baa arrittiaa Yothebo baa atahaany nẽẽnĩ. Baa aaꞌnyĩk nẽẽ Yothebo cẽrẽm ꞌcĩ ẽllẽẽmĩth gẽrrẽẽt. 4Ma baa õrõõta ꞌgotoonoggia cieeg ngaatĩ ammĩnanĩ maaꞌnyia Yothebo ho, iita ongoongoyyieek nẽẽg Yothebo gẽrrẽẽt nẽ iittiõõ hõllõngaa õthõõthõõ hĩ ĩnõõnnõ jurrung.

5Ma baalin umwa, õhõnõõthĩ Yothebo nẽ ikia uduhaak ꞌgõtõõnõgĩ honoothi cĩnnĩ ho 6ĩĩnnĩk, “Ĩthĩhĩt nõõ honoothinit caannĩ. 7Hohonooꞌthi naa aabaal haluc naag vẽlẽk haal manatõõ. Ma hĩdĩĩkoothong, ikia ĩbĩl lucciaahiniti caannĩ ĩĩ maka nẽ iita akattieek lucciaaha cugguung vẽlẽk caannĩ ho huruꞌnyia.” Ma athĩhĩ ꞌgotoonoggia thõõth icci ho, iita aaburrieek ĩnõõnnõ gẽrrẽẽt.

8Nĩngĩtĩ ajini ĩnõõnnõ annẽẽkĩ, “Ma haaꞌnyeet õlõng ẽlẽ, ammuhi nii aini occa hatĩ akuu ĩĩnĩ habu cĩnaang?” Ma ngaati, iita aaburrieek nẽẽg Yothebo gẽrrẽẽt, hĩllõõan ꞌgõõl baa aaburrẽẽkĩ ĩĩcĩ oou.

9Ma uruta, ikia õhõnõõthĩ Yothebo tarĩ. Ohonooꞌthi aattĩ aĩ, “Hadtuuha au akanneeka kõrra hĩ nyĩlõk hĩ mũnyũny õmmõtõ hĩ hõdẽĩ huruꞌnyia.” Ma nĩngaata, ũũk uduhaak ꞌgõtõõnõgĩ tarĩ ĩĩnnĩk, “Hõlõ lõggõõ cieeg ĩthĩhĩt nõõ, iyyia aattĩ hohonooꞌthi naa tarĩ, aku kõrra hĩ nyĩlõk hĩ mũnyũny õmmõtõ hĩ hõdẽĩ nẽ akattieeha huruꞌnyia.”

10Ma baa õkõ aduhaak maaꞌnyĩ ho, eggerꞌnyeek hinnia maaꞌnyia ĩnõõnnõ anneek, “Õdõranneet thõng ẽlẽ! Honoothinit gõõng ꞌcĩ ĩĩn ne nicciee? Ĩcca ꞌyioko hatĩ haattiyyia naag hĩ ngaanu hĩ ꞌgotoonogu ĩꞌthõng nẽ hakattieehi nganiit huruꞌnyia?” 11Nĩngĩtĩ aaburrẽẽkĩ ꞌgotoonoggia cieeg ĩnõõnnõ gẽrrẽẽt, ĩko thĩ nẽẽ ara ammuk maaꞌnyia thõõth icci ꞌthĩnĩtatõõ.

Utuuyyiõĩ Yothebo ꞌgotoonoggia

12Ma kõr umwa, baa aꞌngĩd ꞌgõtõõnõgĩ Yothebo hẽlẽggĩ cĩg maacõnĩ õõ õlõmaneek ngaatĩ õbõhõõ hĩ ꞌThẽkẽm. 13Nĩngĩtĩ annẽẽkĩ Ĩꞌthĩraẽlĩ Yothebo, “Hadiimmii naa nganiit mũdoothĩk ꞌgotoonogu. Ũũha nẽẽg aꞌtha ngaatĩ õbõhõõ hĩ ꞌThẽkẽm.”

Nĩngĩtĩ airaanĩ Yothebo hĩdĩĩkoothong nẽ ẽdẽc ĩĩ, “Abũnnaa.”

14Ma nĩngaata, ikia ĩꞌthõ maaꞌnyia ĩnõõnnõ ĩĩnnĩk, “Mũdoothĩk dako ꞌgotoonogu icciag aattĩg hõrgga hata, hatĩ aattĩg lõꞌngõõc nẽ ikia uduhaahaanĩ.” Baa aaĩ õlõ cĩ Yakobo nohota Heborona.

Ma baa õdõlan Yothebo ꞌThẽkẽm ko, 15ikia arahan nẽẽ gẽrrẽẽt, nĩngĩtĩ õmmõtõõnĩ hĩ eet umwa nẽ ijin ẽẽtĩ tĩho ĩnõõnnõ ĩĩnnĩk, “Ne thĩnõ ꞌcĩ adiimi ho nyahaappan?”

16Ẽdẽcĩ Yothebo anneek, “Hadiimi lõggõõ ũgĩ ꞌcĩg ĩĩn ꞌgotoonoga ꞌcĩg ũũhayyi lokoraa cĩ. Aga occa nĩngĩtĩ aayyi hõrõõgĩ cĩnĩĩng?”

17Ẽdẽcĩ ẽẽtĩ tĩho anneek, “Iittiõõ nẽẽg hõllõngaa aattĩg lokora cĩ. Baa hathihi aduha nẽẽg aĩ haluugga hatĩ hooyyia Dõthana.”

Nĩngĩtĩ õkõ ammũdaanĩ Yothebo ꞌgõtõõnõgĩ ngaatĩ õbõhõõ hĩ Dõthan. 18Ma baa adtuuha ꞌgotoonoggia Yothebo ngaatĩ aliittianĩ lõmẽrra hoti ho, otongomit ĩnõõnnõ ĩĩtõ,

19“Ikia mĩĩ honooꞌthiahiti.” Nĩngĩtĩ aꞌnyahĩ muhẽẽnĩt cĩ adiim aruhi ĩnõõnnõ. 20Ma hĩdĩĩkoothong, othoothito ĩĩtõ, “Hiita huruhit nẽ hudhukteek ꞌwooratõõ, nẽ hõõt huduktaak eet õlõ hĩĩttĩk, adak ꞌgii cĩ moru. Nẽ da hatĩ hĩcĩnĩt ꞌgii ꞌcĩ attihaakeet honoothiniti cĩnnĩ ho.”

21Ma baa athĩhĩ ꞌRuubenĩ thõõth ꞌcĩ adiim aruhi ꞌgotoonoggia cieeg Yothebo ho, ikia ĩttĩman ngaatĩ ẽẽlanĩ ꞌgõtõnĩ ꞌcĩ hidici ho. Nĩngĩtĩ ẽdẽcõõthĩkĩ ĩhõõggõ noho annẽẽkĩ, “Hõllõngaa occa haruk ĩnõõnnõ thõng. 22Adakeet hatĩ biyyieeta. Hudhukteek ĩnõõnnõ ꞌwooratõõ umwaanĩ battaalaa nĩĩcĩ, nẽẽthĩ, ma hahummu ĩnõõnnõ ũdũt.” Baa õthõõth ꞌRuubenĩ hoti aĩ, hátĩ hẽẽla Yothebo nẽ õbõdĩ õlõ.

23Ma baa õdõlan Yothebo ꞌgõtõõnõgĩ ho, ĩtĩngaacõ ꞌthẽk lõggõõ cieeg ngaati noho, uppuruccia ꞌgõõnĩ cẽrẽm baa alũũllak maaꞌnyia ho, 24nĩngĩtĩ adhuhẽẽkĩ ĩnõõnnõ ꞌwooratõõ.

25Ma nĩngaata, iita uduhit nẽẽ nẽẽg ꞌgẽẽn cĩnĩĩng. Ma baa abbuudi ho, acĩn hinnia tuuyyiok cĩg eet cĩg Ithimaĩlĩ au ĩĩcĩ ꞌGileadĩ. Baa õvvõ eeta tĩko nyaakaalnyanĩĩ cĩg irriongan mĩlĩlla ꞌcĩg abbiiri hĩ ngõõrrõ cĩ udẽẽttõ ꞌcĩ õꞌngõlĩ ẽmmẽdĩ gẽrrẽẽt hĩ kadĩkadĩngĩ cĩg ꞌgeenniok ꞌcĩg õꞌngõlĩ ẽmmẽdĩ õõyyĩ Ijjiba.

26Ma adtuuha ꞌJuuda tuuyyiok niccig ngaatĩ attĩlanniaakĩ ĩhõõggõ ho, ijin ꞌgõtõõnõgĩ ĩĩnnĩk, “Hõlõ, ne ꞌyioko occa hatĩ ꞌcĩ hammũda naag hatĩ huruhit ꞌgotooneet nẽ hummuttieek biyyi cĩgĩnnĩg ꞌthẽẽmĩtõõ? 27Hutuuyyiõõĩ baaĩ nuun ĩnõõnnõ hĩ eet cĩg Ithimaĩlĩ ho hĩllõõan ngaatĩ haruhi thõng. Má huruhit dẽẽdẽ, hattik hatĩ daahĩth cĩnnĩ hĩ otto.” Ma athĩhĩ ꞌgotoonoggia hoti ho, elemit noho.

28Ma baa au obokii tuuyyioha cĩg eet cĩg Midianĩ ho, õõt utugurria nẽẽg Yothebo ꞌwooratõõ nẽ iita utuuyyiõĩ hĩ eet cĩg Ithimaĩlĩ ho maccĩrẽẽn hẽẽn ꞌramma haaga. Ma nĩngaata noho, ootti tuuyyioha niccieeg Yothebo Ijjiba.

29Baa nga aayyiaa ꞌRuubenĩ ngadiiha kõr ꞌcĩ auuni tuuyyioha tĩko ho. Ma baa õbõda nẽẽ aĩ hũũk hĩcĩn Yothebo ꞌwooratõõ ho, ammũdoothĩk hinnia aitiõõ tõõ, nĩngĩtĩ ẽrrẽẽcĩ ceremwa cĩgĩnnĩg lĩlĩẽẽtta. 30Ma nĩngaata, ũũk uduhaak ꞌgõtõõnõgĩ ĩĩnnĩk, “Hõlõ! Iꞌnginõõthĩ hatĩ buuleniti aangaani. Hõkõ occa ꞌthẽk naa hutuno?”

31Ẽbẽk lõggõõ niccieeg muguruur noho, nĩngĩtĩ agurraanĩ hõõny umwa noho nẽ ucuhanita. Ma hoti ho, itikta cẽrẽm cĩ Yothebo nẽ udduuttik biyyi cĩg hõõny nicci hibbiir ꞌtõl. 32Ma uruta, aꞌnyaktoothĩk cẽrẽm tĩho maaꞌnyĩ nẽ ĩĩttĩk, “Baa hammũdaanna naag cẽrẽm icci thõng, gaa da hatĩ ĩĩn cĩ ngeeruni.”

33Ma baa aga maaꞌnyia cẽrẽm ho, urruuo ĩĩ, “Cẽrẽm bẽrẽ cĩ loholeec caannĩ cieeni! Adaheeha bẽrẽ loholeec caannĩ Yothebo ꞌgii cĩ moru.” 34Nĩngĩtĩ ẽrrẽẽcĩ Yakobo ceremwa ẽllaa cĩnnĩ nẽ urruuo gẽrrẽẽt, nĩngĩtĩ aayyi hatiꞌtheeta waathinniook ꞌcĩg mẽẽlĩg. 35Au lohollia cĩgĩnnĩg aĩ hiita hamammaayatta ĩnõõnnõ, abũrĩ pad. Aĩ hinnia, “Halu loholeec caannĩ ĩꞌthõng hadaoothĩk ꞌlook tilaalõnĩ noho.”

36Ma tarĩ tuuyyioha cĩg eet cĩg Midianĩ ngaati, õõt utuuyyiõĩ Yothebo Ijjiba hĩ eet umwa cobbi ꞌcĩ haĩ Potivarẽ, eet ꞌcĩ baa ĩĩn ꞌgaalac ꞌcĩ ẽbẽk õlõ cĩ habuuo.

Currently Selected:

ꞌThianaattõ 37: did

Highlight

Copy

Compare