ꞌThianaattõ 38

ꞌJuuda Hĩ Tamar

1Ma waathinniook nicciag, ũtũngeek ꞌJuuda ꞌgõtõõnõgĩ looccaa ꞌcĩ ĩĩn muurriok, nẽ õõt ũrũmtĩ hĩ ꞌgõõnĩ ꞌcĩ haĩ Hĩĩra cĩ looc ꞌcĩ haĩ Adullam. 2Ma nĩngaata, ikia õtõrõõta ꞌJuuda bũhẽẽc umwa cĩ looc cĩ Kanaanĩ, tĩnaatĩ eet ꞌcĩ haĩ ꞌThũũa, nĩngĩtĩ aꞌthũwanĩ ĩnõõnnõ. 3Ikia aꞌnyahõ tĩnaatĩ ꞌThũa ho nẽ ũtũhũwa loholeec ꞌcĩ maacĩ, nĩngĩtĩ akannẽẽkĩ ꞌthaar ꞌcĩg haĩ Ẽẽr. 4Ma uruta, ikia aꞌnyahõ tarĩ nẽ ũtũhũwa buulenit ꞌcĩ haĩ Õnaan. 5Ma baa uruta, ikia ũtũhũwa buulenit umwa tarĩ ꞌcĩ haĩ ꞌThẽẽla. Baa aaĩ õlõ cĩ ꞌJuuda ngaatĩ haĩ Kethib baa nohota.

6Nĩngĩtĩ aku aꞌthũwanaakĩ ꞌJuuda ngeerĩnĩ Ẽẽr bũhẽẽc ꞌcĩ haĩ Tamar. 7Nẽẽthĩ, baa aharreek Makayyioohiti Nyekuci Ẽẽr, ngeertĩ ꞌJuuda ꞌcĩ oou, hĩnĩngĩtĩ baa ĩĩn nẽẽ eet ꞌcĩ adĩman hẽlẽggĩ ꞌcĩg abathĩ dtẽc, nĩngĩtĩ aruhi Makayyioohiti ĩnõõnnõ.

8Ma urutaa cĩ daahĩth cĩ Ẽẽrĩ, ikia ĩĩnnĩk ꞌJuuda ngeerĩnĩ Õnaan, “Ũrũmtĩ mĩĩ hĩ ngagotonoonu, hátĩ hikia haꞌnyak ꞌgotonu buúk lõhõlĩ.” 9Abũrĩ hinnia Õnaanĩ ngaatĩ õlõmĩ ngagõtõnõõnĩ, hĩnĩngĩtĩ agaoothi aĩ, aitiõõ hatĩ loholeec ꞌcĩ arrittiaa hõllõngaa ĩĩn cĩnnĩ. Nẽ ma adiim oogin hĩ ngaa nicci, attumaniini hinnia ĩnõõnnõ haaga hõllõngaa arritaak loholeec ũdũt.

10Ma baa adtuuha Makayyioohiti ngaatĩ attumaniini Õnaanĩ ngagõtõnõõnĩ haaga ho, ikia ĩlĩĩlĩ Makayyioohiti gẽrrẽẽt, nĩngĩtĩ aruhi Õnaan buúk.

11Ma ngaati, ũtũvvũ ꞌJuuda alaannĩnĩ Tamar nẽ ĩĩnnĩk, “Bodooth mĩĩ nuun nõõ ĩĩcĩ õlõ cĩ maaconu. Bĩĩt nõõ ꞌthẽk au ĩĩ ngaatĩbõyyĩ ĩĩca ĩꞌthõng hĩtĩlĩtha ꞌThẽẽla, nẽ iita ũrũmteeu hĩ ĩnõõnnõ.” Baa aduhaak ꞌJuuda Tamar hoti, hĩnĩngĩtĩ baa iꞌngolli nẽẽ aĩ, aku mõnõ hatĩ adaahĩ ꞌThẽẽla buúk hĩ baa ꞌgotoonoggia tarĩ thõng. Nĩngĩtĩ õkõõĩ Tamarĩ ĩĩcĩ õlõ cĩ maacõnĩ.

12Ma baa urutaa cĩ irkiꞌnyia ũgĩ, ikia aggama lõõcĩ ꞌJuuda ngaa cĩnnĩ tĩnaatĩ ꞌThũũa. Ma baa itiwiili lõõcĩ, ĩtĩngaacõ nẽẽ hĩ ꞌgõõnĩ ꞌcĩ haĩ Hĩĩra eet cĩ Adullamĩ, õõt ĩꞌthõng nĩngĩtĩ haĩ Tĩmĩna ꞌcĩ baa aꞌthudanĩ eeta ĩma cĩg aꞌtha cĩgĩnnĩg.

13Ma baa udukiaak Tamar aĩ, “Ũũk uꞌthudan mohonuni ĩma cĩg aꞌtha cĩgĩnnĩg looccaa cĩ Tĩmĩna,” 14ikia ũppũrũca ceremwa cĩg ulwaanak nẽ itihim ꞌcĩg ꞌrĩĩng nẽ ũmũmmũũran õõ.#38:14 Amũmmũũran õõ: Baa amũmmũũran Tamarĩ õõ cẽrẽmaa haau hĩ ꞌwaaꞌngiahiti. Nẽ ũũk ẽrẽẽõ ꞌgõõlaa cĩ õkõ ngaatĩ haĩ Enaim, ꞌcĩ aaĩ ꞌgõõlaa ꞌcĩ edeceek Tĩmĩna. Baa aga Tamarĩ ꞌThẽẽla ngaatĩ ĩĩ maka, nẽẽthĩ hinnia, baa hõllõngaa ẽlẽmaakĩ maaꞌnyia ĩnõõnnõ hũꞌthũwan ꞌThẽẽla.

15Ma baa aku ẽttẽẽd ꞌJuuda nĩngaata ho, ammũdaak hinnia ĩnõõnnõ aaĩ ꞌgõõla ngadiiha nẽ ummuk ĩĩ, “ꞌWaaꞌngiahit baaĩ ꞌyioko nuun umwa haaga.” Ammuk nẽẽ hoti, hĩnĩngĩtĩ baa ammũt Tamarĩ muum cẽrẽma. 16Nĩngĩtĩ ammũdõõthĩkĩ ꞌJuuda Tamar nẽ idiim atagguutho hĩ ĩnõõnnõ.

Ma nĩngaata, ajin hinnia Tamarĩ ĩnõõnnõ anneek, “Ne hatĩ ꞌcĩ aaꞌnyaa nii nganĩĩt hatĩ hẽlẽma thõõth cunni ho?”

17Ẽdẽcĩ ꞌJuuda anneek, “Haggameekii hatĩ mĩꞌnyõõn.”

Ẽdẽcĩ tarĩ Tamarĩ aĩ, “Ĩcca occa nõõ aaꞌnyaa ꞌgiimwa hẽrẽẽõĩ ĩꞌthõng ꞌgameehaa mĩꞌnyõõn tĩho?”

18Ma ho, ijin ꞌJuuda ĩnõõnnõ ĩĩnnĩk, “Adiimi ꞌyioko nii neegi?”

Ẽdẽcĩ Tamarĩ ĩnõõnnõ anneek, “Aꞌnyaa dihidohit hĩ nyerikooc ꞌcĩ aꞌnyahi iꞌnyiaawa hataa, hĩ hĩbahĩt.” Nĩngĩtĩ ooginni hõdẽĩ nẽ ikia aꞌnyahõ nẽẽnĩ. 19Ma nĩngaata, õbõdõõthĩ Tamarĩ ĩcĩ olu nẽ ũũk itihim ceremwa baag ulwaanak tarĩ.

20Ma baa urutaa cĩnnĩ, ikia ĩꞌthõ ꞌJuuda ꞌgõõnĩ Hĩĩra hutugur mĩꞌnyõõn hũũk haꞌnyahoothĩk ngaa baa oogin hĩ ĩnõõnnõ, hátĩ hõbõdaaĩ ijjio baag ũũnnĩkĩ ngaa nicci. Õkõ hinnia adiimi Hĩĩra ĩꞌthõng nẽ hõllõngaa ammũda ngaa tĩho buúk. 21Ma ho, ijin eet ũgĩ nĩngaata ĩĩnnĩk, “Ũũk ꞌwaaꞌngiahiti baa aaĩ Enaima ꞌgõõla ngaati ibiaali ĩĩna?”

Ẽdẽcĩ hinnia eeta niccieeg aĩ, “Nga haꞌnyakta ngaa ꞌcĩ ĩĩn ꞌwaaꞌngiahit ngaati ũdũt.”

22Ma nĩngaata, õbõdõõthĩ Hĩĩra ũũk uduhaak ꞌJuuda ĩĩnnĩk, “Aitiõõ ngaa tĩho tõõ. Nẽ aduha maajihi lootu buúk aĩ, ‘Nga haꞌnyakta ngaa ꞌcĩ ĩĩn ꞌwaaꞌngiahit ngaati ũdũt.’ ” 23Ma ho ẽdẽc ꞌJuuda ĩĩ, “Ac, aꞌnyĩĩk baaĩ hũũhĩ nĩĩca ẽlẽ. Haburi naa ngaatĩ au aranneet eeta. Baa thĩ hadiimi naa hadũmani ĩnõõnnõ, ma tarĩ thĩ hõllõngaa ammuddiaa ho.”

24Ma urutaa cĩ nyĩlõhĩ iyyio, ikia uduhaak ẽẽtĩ umwaa ꞌJuuda ĩĩnnĩk, “Ũũk tarĩ õtõ alaannuni Tamarĩ hĩ ꞌwaaꞌngiahiti haaga nẽ tarĩ ꞌyioko, aꞌnyahõ thõng buúk.”

Ma baa athĩhĩ ꞌJuuda ho, uduhaak eet nicci ĩĩnnĩk, “Õõt utugurriaak ĩnõõnnõ battaalaa cĩ ꞌtaaũnõõ nẽ utuuꞌthu hadaak!”

25Ma baa nga agurut eeta Tamar õõĩ battaala, ĩꞌthõ nõõ hinnia nẽẽ eet umwa hũũk huduhaak ꞌJuuda hĩĩnnĩk, “Baattĩ hĩbahĩt icci hĩ dihidohit hĩ nyerikooc icci ꞌcĩ arritoothĩkaa nganĩĩt ko.”

26Ma nĩngaata, aga hinnia ꞌJuuda hẽlẽggĩ niccig ngaatĩ ĩĩnnĩ cĩgĩnnĩg thõng. Ma ho ĩĩ, “Ammĩrĩ Tamarĩ, nganĩĩt ꞌcĩ hẽꞌthẽcana, occa baa ꞌthẽk haaꞌnyĩha ꞌThẽẽla hõlõm ĩnõõnnõ.#38:26 Ammĩrĩ Tamarĩ, nganĩĩt ꞌcĩ hẽꞌthẽcana: Baa õthõõth ꞌJuuda hoti, hĩnĩngĩtĩ nyattaalaa cĩ Ebereei, occa aaꞌnyĩk ꞌJuuda ngeerĩnĩ ꞌThẽẽla hittiraak Tamar loholeec cĩ Eri, maac cĩnnĩ baa adaaha.” Nẽ nganĩngĩtĩ kõr niccia, iittiõõ ꞌJuuda hõllõngaa abũraneek Tamar tarĩ.

27Ma kõr cĩ tuhuyyiaattõ, ũũkca hinnia nẽẽ lõhõlĩ ꞌcĩg ĩĩn heengti. 28Baa uwwattaanĩ loholeec ꞌcĩ oou aꞌthiit nẽ ẽdẽc ngaa ꞌcĩ alaama Tamar ko hecebeek joonniac ꞌcĩ marihi nẽ ĩĩ, “ꞌCĩ uwwattaa cieeni.” 29Ma baa õbõdĩ loholeec baa oou aꞌthiit cĩnnĩ hẽẽngatõõ tarĩ ho, aku hinnia ꞌgotonnia ꞌcĩ uruto hikia hutuhuyyiaa. Ẽdẽcĩ tarĩ ngaa nicciee alaama ꞌgõõnĩ ho hõthõõth hĩĩ, “Ĩko ꞌgõõl ꞌcĩ akĩĩnyanĩ ho cieeni?#38:29 Pẽrẽth: Aĩ ꞌthaara ꞌcĩg haĩ Pẽrẽth ko Ebereeiyyi, akĩĩnya.” Nĩngĩtĩ akannõõthĩkĩ niccia ꞌthaara ꞌcĩg haĩ Pẽrẽth. 30Ma uruta, ikia utuhuyyiaa ꞌgotonnia baa eceboothĩk joonniacĩ ꞌcĩ marihi ho uruta, nĩngĩtĩ akannõõthĩkĩ ꞌthaara ꞌcĩg haĩ ꞌThẽẽra.#38:30 ꞌThẽẽra: Aĩ ꞌthaara ꞌcĩg haĩ ꞌThẽẽra ho Ebereeiyyi, marik.

Currently Selected:

ꞌThianaattõ 38: did

Highlight

Copy

Compare