ꞌThianaattõ 26

Iꞌthaako hĩ Abimelek

1Baa aaĩ nyarõnĩ umwaa cobbi gẽrrẽẽt ꞌcĩ anũẽẽkĩ baa oou korrioohĩĩ baag Abũrahamĩ. Nĩngĩtĩ õkõõĩ Iꞌthaako looccaa cĩ ꞌGerarĩ. Baa ĩĩn Abimẽlẽhĩ habu cobbi cĩ eet cĩg Viliꞌthia ꞌGerara baa nohota. 2Ma ho, uppwaannak Makayyioohiti Nyekuci Iꞌthaako nẽẽ ĩĩnnĩk, “Ma hõkõ Ijjiba, au looccaa ꞌcĩ hanneekii naa avvi ho. 3Au nõõ looccaa cĩ hĩdĩhĩdĩĩc. Haꞌthuunni hatĩ naa nganiit nẽ haggataniina. Haaꞌnyii hatĩ naa nganiit hĩ lõhõlĩ cugunnig vẽlẽk looc icci nẽ hũꞌthũũtĩ thõõth baa habũtaneehi naa maaꞌnyu Abũrahaamõ. 4Haaꞌnyihi hatĩ naa lõhõlĩ cugunnig hiita hĩĩtõ mẽẽlĩg gẽrrẽẽt, haauto hĩ mũnyũnya nẽ haaꞌnyĩha ĩhõõggõ looc icci vẽlẽk. Haari hatĩ naa lõhõlĩ cugunnig hĩĩ ꞌcĩg haggatanĩĩ loonyin vẽlẽk loota nĩnga. 5Hĩnĩngĩtĩ baa athĩkna Abũrahamĩ nganĩĩta, nẽ ũꞌthũũtĩ nyattal hĩ tilooinit caannĩ vẽlẽk.” 6Ma ho, õlõman Iꞌthaako ꞌGerara.

7Ma baa ajin eeta cĩg lootu Iꞌthaako thõõth cĩ ngaa cĩnnĩ ho, ẽdẽcĩ hinnia nẽẽ ĩhõõggõ anneek, “Ngõõna cieeni.” Hĩnĩngĩtĩ baa itieelli nẽẽ ngaatĩ aduhaakĩ ĩhõõggõ annẽẽkĩ ĩĩn Rẽbẽka ngaa cĩnnĩ. Baa ammuk nẽẽ aĩ, “Aruka mõnõ hatĩ eeta cĩg lootu, hĩnĩngĩtĩ ꞌlẽẽmĩth cĩ Rẽbẽka ho thõng!”

8Ma baa aau Iꞌthaako nĩngaata ĩꞌthõng, ẽdẽẽnya Abimẽlẽhĩ habuui cĩ Viliꞌthia Iꞌthaako hĩ Rẽbẽka hutulaa cĩnnĩ, ngaatĩ arabũũtõnĩ mĩnnaniitta. 9Ma nĩngaata, ũtũvvũ Abimẽlẽhĩ Iꞌthaako nẽ ĩĩnnĩk, “Ĩko ĩĩn Rẽbẽka ngaa cunni ẽlẽ? Nẽ baa ĩĩnnĩheet ĩĩn ngoonu inni?”

Ẽdẽcĩ Iꞌthaako ĩnõõnnõ anneek, “Baa hiꞌngolli haini, aruka mõnõ hatĩ maajihi lootu hatĩ hanneehi ĩĩn Rẽbẽka ngaa caannĩ thõng.”

10Ẽdẽcĩ Abimẽlẽhĩ anneek, “Ne ꞌyioko ꞌthẽk ciee adĩmaneekeet nii ngagĩĩt ko? ꞌYioko ꞌthẽk baa hatagguutho eet umwaa hĩ ngaa cunni, occa ꞌthẽk baa uukeet Nyekuci ngagĩĩt tananga ꞌgooleet nii thõng.” 11Nĩngĩtĩ irrioonĩkĩ habuui eet cĩgĩnnĩg annẽẽkĩ, “Má uhum ẽẽtĩ umwaa eet icci hode ngaa cĩnnĩ, haruhi hatĩ naa eet tĩho hadaak.”

12Ma nĩngaata, akat Iꞌthaako mana looccaa cĩ ꞌGerarĩ irkit tĩho, nĩngĩtĩ abbiirnĩ mana cĩnnĩ gẽrrẽẽt, hĩnĩngĩtĩ baa aggatan Makayyioohiti ĩnõõnnõ. 13Ma ho, ikia ĩĩ Iꞌthaako eet ꞌcĩ aballi gẽrrẽẽt. 14Baa aꞌnyak nẽẽ aꞌtha hĩ tĩĩn ꞌcĩg mẽẽlĩg gẽrrẽẽt nẽ ĩĩtõ mẽẽlĩg dticcianniooha buúk gẽrrẽẽt. Ma nĩngaata, iita ũbũratteek eeta cĩg Viliꞌthia hẽlẽggĩ cĩgĩnnĩg. 15Nĩngĩtĩ au adtibanĩ eeta cĩg Viliꞌthia wĩĩtanĩ vẽlẽk baag adawa dticcianniooha cĩg maaꞌnyĩ Iꞌthaako baa nga arũgĩ.

16Ma nĩngaata, ikia uduhaak Abimẽlẽhĩ Iꞌthaako ĩĩnnĩk, “Tũngeek looc cĩnaang, ikia tarĩ ĩllõõanneet nii ngagĩĩt gẽrrẽẽt.”

17Nĩngĩtĩ ũũnnĩkĩ Iꞌthaako looc niccia nẽ uluug ũũk õlõman unaahatõõ cĩ ꞌGerarĩ. 18Ma ho, ũũk uhutan nẽẽ wĩĩtanĩ baag adawa maaꞌnyia nẽ iita idtibanit eeta cĩg Viliꞌthia urutaa baa adaahĩ Abũrahaamõ ẽlẽk nẽ ikia akateek nẽẽ wĩĩtanĩ tĩko ꞌthaarriok ꞌcĩg aduhõõ hĩ baag akanneek maaꞌnyia.

19Ma unaahatõõ ꞌcĩ õlõmanĩ Iꞌthaako ho, õõt adaacõ dticcianniooha cĩgĩnnĩg wĩĩtaneec umwa, nĩngĩtĩ ammũdaanĩ maam ꞌcĩg tẽllĩg. 20Ma ho, iita ẽggẽrẽnytõõĩ tũhayyiooha cĩg ꞌGerarĩ hĩ cĩg Iꞌthaako wĩĩtaneec nicci. Aĩ tũhayyiooha cĩg ꞌGerarĩ, “Maam cĩggĩĩng.” Nĩngĩtĩ akannẽẽkĩ Iꞌthaako wĩĩtaneec tĩho ꞌthaar ꞌcĩg haĩ Ethek,#26:20 Ethek: Aĩ ꞌthaara ꞌcĩg haĩ Ethek ko Ebereeiyyi, jore. hĩnĩngĩtĩ baa aruhõõnĩ tũhayyiooha wĩĩtaneec tĩho. 21Ma nĩngaata, adayyia dticcianniooha cĩg Iꞌthaako wĩĩtaneec umwa tarĩ nẽ iita ẽggẽrẽnytõõĩ hĩ eet nicciag tarĩ, nĩngĩtĩ akannẽẽkĩ Iꞌthaako wĩĩtaneec niccia ꞌthaar ꞌcĩg haĩ Thĩtna.#26:21 Thĩtna: Aĩ ꞌthaara ꞌcĩg haĩ Thĩtna ho Ebereeiyyi, ꞌgẽrẽnyõõn. 22Ma ho, uluug Iꞌthaako nĩngaata nẽ ũũk adawa wĩĩtaneec umwa tarĩ. Baa aattĩ aitiõõ hõllõngaa ẽggẽrꞌnyõõ tũhayyiooha. Nĩngĩtĩ akannẽẽkĩ wĩĩtaneec tĩho ꞌthaar ꞌcĩg haĩ Rehoboth,#26:22 Rehoboth: Aĩ ꞌthaara ꞌcĩg haĩ Rehoboth ko Ebereeiyyi, nĩngĩtĩ ꞌcĩ padtacĩ. nẽ ĩĩ “Ĩbbaanneet Makayyioohiti nĩngĩtĩ haattiyyi lõꞌngõõc looccaa cĩ nẽ haballi hatĩ nĩnga.”

23Ma nĩngaata, ĩtĩnga Iꞌthaako ũũk ĩĩcĩ Bẽẽrthẽba. 24Ma baalin niccia, ũũk uppwaannak Makayyioohiti Nyekuci ĩnõõnnõ nẽ ĩĩnnĩk, “Hĩĩnĩ naa Nyekuc cĩ maaconu Abũrahaamõ. Ma hiteelli, haꞌthuunni hatĩ naa nganiit nẽ haggataniina nẽ haaꞌnyii lõhõlĩ ꞌcĩg mẽẽlĩg, hĩnĩngĩtĩ thõõth baa haduhaahi naa dticciannioohit caannĩ Abũrahaamõ.” 25Ma nĩngaata, ẽtẽhẽnya Iꞌthaako nĩngĩtĩ ĩbbõõrĩkĩ Makayyioohit ꞌgaarrieenit nẽ ala ĩnõõnnõ. Ma ho, õlõman nĩngaata nẽ adayyia dticcianniooha cĩgĩnnĩg wĩĩtaneec umwa tarĩ.

Ganõn cĩ Iꞌthaako hĩ Abimelek

26Ma kõr umwa, ĩtĩngaayyia Abimẽlẽhĩ ꞌGerara, õõkõra hĩ Ahutha ꞌcĩ baa ĩĩn tilooyyiohit cĩnnĩ hĩ Vikol, makayyioohit cĩ ũũrũta. Baa au acĩn nẽẽg Iꞌthaako. 27Nĩngĩtĩ ajini Iꞌthaako ĩhõõggõ annẽẽkĩ, “Auunnu aattĩ hatĩ hĩ nganĩĩt inni? Ma baa aaburreekaangu nẽ itiggiayyiaangu looccaa cunuung?”

28Ẽdẽcĩ Abimẽlẽhĩ hĩ eet cĩgĩnnĩg ko aĩ, “Hagayyia naag dĩdĩ, aaĩ Makayyioohiti Nyekuci hĩ nganiita nẽ hammuka haĩnna, ‘Hiita haꞌnyahit lõbũtĩ cĩ lohoto.’ Haĩnna naag hũbũtanit hĩĩtõ, 29hõllõngaa hatĩ adĩmanneetu niig ngagĩĩt ꞌbuth tarĩ, hĩ baa hõllõngaa hadĩmannii naag nganiit buúk ꞌbuth. Baa huunnikii naag tĩnga looccaa cĩnaang lõꞌngõõc. Nẽ baa aggatannii nganiit Makayyioohiti Nyekuci buúk bĩĩt lõꞌngõõc.”

30Ma nĩngaata, aarĩhĩ Iꞌthaako ĩhõõggõ karrama, nĩngĩtĩ aduhẽẽnĩ nẽ uhuddi lõꞌngõõc. 31Ma loohoth cĩnnĩ, ĩdĩmanit nẽẽg ganõn hõdẽĩ. Nĩngĩtĩ ĩꞌthaaĩkĩ Iꞌthaako ĩhõõggõ ꞌgõõl hõõt lõꞌngõõc nẽ ũtũngteek nẽẽg buúk Iꞌthaako haau lõꞌngõõc.

32Ma kõr tĩho, iita uduktaak Iꞌthaako dticcianniooha cĩgĩnnĩg ĩĩttĩk, “Hibboorriawa maam wĩĩtaneecaa ĩbaa hadayya.” 33Nĩngĩtĩ akannẽẽkĩ Iꞌthaako wĩĩtaneec tĩho annẽẽkĩ Thiba.#26:33 Thiba: Aĩ ꞌthaara ꞌcĩg haĩ Thiba ho Ebereeiyyi, lõhõt. ꞌGõõl ꞌcĩ baa aku akannõõthĩkĩ ꞌtaaũn cĩ Bẽẽrthẽba ꞌthaara cieeg hĩĩ kõr hĩ nicciee ho cieeni.

Ngaaĩ cĩg Eꞌthaau ꞌcĩg ĩĩn mĩrõk

34Ma baa õdõlanit Eꞌthaau irkiꞌnyia ĩĩtõ hẽẽn ꞌwec, ikia ũꞌthũwan nẽẽ ꞌJudita tĩnaatĩ Bẽẽrĩ hĩ Bathemath tĩnaatĩ Elonĩ, ꞌcĩg baag ĩĩn lõhõlĩ cĩg looc cĩ Hiiti. 35Nẽ baa aꞌnyahaak thõõth cĩ ngaaĩ iccig Iꞌthaako hĩ Rẽbẽka liilii cobbi gẽrrẽẽt.

Currently Selected:

ꞌThianaattõ 26: did

Highlight

Copy

Compare