ꞌThianaattõ 27
27
Aggatan Iꞌthaako Yakobo
1Ma baa atahaany Iꞌthaako ĩĩ ruben, ikia ũtũvvũ nẽẽ ngeerĩnĩ cobbi Eꞌthaau nẽ ĩĩnnĩk, “Loholeec caannĩ.”
Ẽdẽcĩ Eꞌthaau maaꞌnyĩ anneek, “Ee, nganĩĩt cieeni.”
2Ma nĩngaata, ikia uduhaak Iꞌthaako Eꞌthaau ĩĩnnĩk, “Hatahaanya ꞌyioko naana nẽ hõllõngaa haga kõr cĩ daahĩth caannĩ. 3ꞌTiha irigi hĩ lĩꞌthaanĩt cugunnig, bĩĩt lĩhaahaa iding cĩ moru. 4Nẽ ikia ĩwaadu ꞌgõõlaa ĩgõõng haccamanaa naana nẽ aꞌnyahaahaa hátĩ haggatanii nga hadaahõ.”
5Baa athĩkna Rẽbẽka thõõth ꞌcĩ õthõõth Iꞌthaako hĩ Eꞌthaau ho. Ma baa ĩꞌngaathĩ Eꞌthaau õkõ lĩka ho, 6ikia uduhaak Rẽbẽka Yakobo ĩĩnnĩk, “Hathihi naa maaꞌnyu aa ꞌyiohoothong aduhaak Eꞌthaau anneek, 7‘Bĩĩt lĩhaahaa iding nẽ ikia ĩwaadu ꞌgõõlaa ĩĩ gõõng haccamanaa naana nẽ aꞌnyahaahaa, hátĩ haggatanii muumaa cĩ Makayyiookto nga hadaahõ.’ ” 8Nĩngĩtĩ annẽẽkĩ Rẽbẽka Yakobo, “Nẽẽthĩ ꞌyioko, loholeec caannĩ, thĩhaa jurrung nẽ ĩdĩmanuu thõõth ꞌcĩ haduhaakii naa ngaanu ho. 9Bĩĩt hẽlẽggẽẽnnĩtõõ nẽ ẽbẽra mĩꞌnyõ ꞌramma ꞌcĩg ĩĩn ꞌthõrõk nẽ aꞌnyahaahaa hátĩ hĩwaadĩk maaꞌnyu ꞌgõõlaa gõõng accamana nẽẽ gẽrrẽẽt. 10Nẽ hatĩ aꞌnyahoothihuu ĩnõõnnõ hũũk hadak, hátĩ haggatanii nẽẽ nganiit nga hadaak.”
11Aduhaak hinnia Yakobo aattĩnnĩ Rẽbẽka anneek, “Aga nii buúk õlõõ Eꞌthaau ẽlẽ nẽ ĩĩ nganĩĩt ẽlẽ lũlũlũlũ. 12Má da hatĩ huhuma baaba nẽ ũmmũda ngaatĩ hĩggõõlĩ naa ĩnõõnnõ thõng, aĩnanaaka mõnõ hinnia hatĩ nganĩĩt thõõth ciee ꞌcĩĩnẽnĩt thõng!”
13Ẽdẽcĩ ngaannia ĩnõõnnõ anneek, “Aꞌnyĩĩk ꞌcĩĩnẽnĩt tĩho hikia hĩ nganĩĩta. Dĩman nẽẽ nii hĩcĩ haduhaakii naa ho. Bĩĩt ꞌnyahaahaa mĩꞌnyõ ꞌcĩg hanneekii ho.”
14Nĩngĩtĩ õkõ aꞌnyahaanĩ Yakobo mĩꞌnyõ ꞌcĩg anneek ngaannia ho nẽ aaꞌnyĩk aattĩnnĩ hĩwaadĩk maaꞌnyĩ ꞌgõõlaa ꞌcĩ gõõng accamana maaꞌnyia. 15Ma ho, ittiha Rẽbẽka ceremwa cĩg Eꞌthaau ꞌcĩg ẽllẽẽmĩth gẽrrẽẽt, ꞌcĩg gõõng aattĩg ꞌcieetõõ nẽ itihimẽẽhĩ Yakobo ngeerĩnĩ ꞌcĩ hidici ho. 16Nẽ ũmmũt ĩbaati hĩ iꞌnyia cĩ Yakobo buúk ceremwaanĩĩ cĩg ẽẽthak. 17Nĩngĩtĩ aaꞌnyĩkĩ Rẽbẽka Yakobo iding hĩ ũbũnẽẽt haꞌnyahoothĩk maaꞌnyĩ.
18Ma nĩngaata, ũũk Yakobo hĩ maaꞌnyĩ nẽ ĩĩnnĩk, “Baaba.”
Ẽdẽcĩ maaꞌnyia anneek, “Ee.”
Ma ho, ijin Iꞌthaako Yakobo ĩĩnnĩk, “Loholeec caannĩ iina nii?”
19Ẽdẽcĩ Yakobo maaꞌnyĩ anneek, “Nganĩĩt ngeeruni cobbi Eꞌthaau, hũmmũda iding aa adiimi niina. Tĩnga daak iding cieeni nẽ aggatanaanĩ.”
20Ẽdẽcĩ hinnia Iꞌthaako ngeerĩnĩ anneek, “Õkõ hatĩ õbõha nii iding hĩdĩĩkoothong hutuno?”
Ẽdẽcĩ Yakobo anneek, “Iyyia ẽẽlla Makayyioohiti Nyekuci cunni hũmmũda!”
21Ma nĩngaata, uduhaak Iꞌthaako Yakobo ĩĩnnĩk, “Ẽjẽẽha da ngaati huhumii naa hatĩ ĩĩnĩ Eꞌthaau dĩdĩ?”
22Nĩngĩtĩ ẽẽjẽhõõthĩkĩ Yakobo maaꞌnyĩ Iꞌthaako nẽ uhum Iꞌthaako ĩnõõnnõ nẽ ĩĩnnĩk, “Aaĩ mõlõõhĩ cunni hĩcĩ Yakobo nẽ aauto ibaati hĩcĩg Eꞌthaau.” 23Baa hinnia hõllõngaa aga Iꞌthaako ngaatĩ ĩĩnnĩ Yakobo niccieeni, hĩnĩngĩtĩ baa õlõõ ĩnõõnnõ ibaati haauto hĩcĩg Eꞌthaau. Nĩngĩtĩ adiim aggaatanĩ Iꞌthaako Yakobo. 24Ma nĩngaata ijin Iꞌthaako Yakobo ĩĩnnĩk, “Ĩĩnĩ nẽẽꞌthẽk nii loholeec caannĩ Eꞌthaau dĩdĩ?”
Ẽdẽcĩ Yakobo aĩ, “Eei! Nganĩĩt ꞌthẽk dẽẽdẽ cieeni!”
25Ma ho ĩĩnnĩk Iꞌthaako Yakobo, “Daaĩ thĩ dako iding cunni ho hátĩ haggataniina.”
Ma nĩngaata, aaꞌnyĩk Yakobo maaꞌnyĩ iding hĩ mẽrtĩ cĩ viinoo hũhũd. 26Ma ho, ĩĩnnĩk Iꞌthaako ĩnõõnnõ, “Ẽjẽẽha ngaati, ijjia ꞌthaawaanĩ loholeec caannĩ.”
27Nĩngĩtĩ ẽẽjẽhõõthĩkĩ Yakobo maaꞌnyĩ nẽ ĩꞌtha ĩnõõnnõ. Ma baa akatĩ Iꞌthaako muyuuhi cĩ ceremwa cĩg Eꞌthaau ꞌcĩg ahimit Yakobo ho, ikia aggatan ĩnõõnnõ ĩĩnnĩk,
“Õꞌngõlĩ loholeec caannĩ ẽmmẽdĩ
aaĩ hĩ mana ꞌcĩ aggatan Makayyioohiti.
28Aꞌnyĩĩk Nyekuc haaꞌnyi tammu, hátĩ hũbũtha mana cunni jurrung.
Aꞌnyĩĩk ĩnõõnnõ haaꞌnyi ꞌgẽẽn hĩ viino ꞌcĩ maka.
29Aꞌnyĩĩk eet cĩg looc nicci hidticattoothihii nganiit
nẽ akattieehi huruꞌnya.
Aꞌnyĩĩk Nyekuc haaꞌnyi ĩĩ makayyioohit cĩ ꞌgotoonogu vẽlẽk.
Aꞌnyĩĩk ĩhõõggõ hitingollieei nganiita.
Aꞌnyĩĩk Nyekuc haggatan eet ꞌcĩg aggatannii nganiit
nẽ ĩccĩĩn eet ꞌcĩg acciinni nganiita.”
Ala Eꞌthaau Iꞌthaako ꞌgattan
30Ma baa ẽdẽcaak Iꞌthaako ꞌgattan cĩnnĩ ho, ikia ĩtĩnga Yakobo nĩngĩtĩ õkõõĩ. Ma baa nga ĩꞌngaathĩ nẽẽ thõng, õbõda hinnia Eꞌthaau lĩka ĩĩ aa õkõõĩ. 31Nĩngĩtĩ aku ĩwaadĩ nẽẽ buúk iding ꞌcĩ aꞌnyaha ho nẽ aꞌnyahoothĩk maaꞌnyĩ nẽ ĩĩnnĩk, “Baaba, tĩnga daak iding ciee haꞌnyahaahi naa ho hátĩ ꞌgattanaanĩ.”
32Ajin hinnia Iꞌthaako Eꞌthaau anneek, “Nganĩ tarĩ nii?”
Ẽdẽcĩ Eꞌthaau maaꞌnyĩ anneek, “Nganĩĩt Eꞌthaau, ngeeruni cobbi.”
33Nĩngĩtĩ abarti Iꞌthaako gẽrrẽẽt nẽ ijin ngeerĩnĩ ĩĩnnĩk, “Nganĩ hatĩ aa aꞌnyahaaka iding ngaati? Nga hẽdẽcaahi iding tĩho ꞌyioko noho. Haggatana ĩnõõnnõ ẽlẽk, ũũhĩ nẽẽ ꞌgattan cunni ũdũt.”
34Ma baa athĩhĩ Eꞌthaau thõõth icci ho, akatĩ ulwa habath dtẽc nẽ ĩĩ, “Baaba, ꞌgattaanaa thĩ mĩĩ ꞌthẽk nganĩĩt buúk.”
35Ẽdẽcĩ hinnia maaꞌnyia anneek, “Ĩggõõla ꞌgotonu, nĩngĩtĩ haaꞌnyĩkĩĩ ꞌgattan cunni.”
36Ẽdẽcĩ Eꞌthaau Iꞌthaako anneek, “Ĩggõõla ꞌyioko nẽẽ nganĩĩt ĩĩ tabattĩ ꞌramma, ĩnõõ ꞌcĩ haĩnnĩ ꞌthaar cĩgĩnnĩg Yakobo#27:36 Yakobo: Aĩ ꞌthaara ꞌcĩg haĩ Yakobo ho, “Eet ꞌcĩ ĩggõõl eet.” ho. Baa nõõ nga aggamaanna makaaꞌthĩt ꞌcĩ hĩĩnnĩ loholeec ꞌcĩ oou, ma thĩ aattĩ ꞌyioko, ikia aggamaawa ꞌgattan caannĩ buúk. Iittiõõ ꞌyioko ꞌgattanĩ umwaa ꞌcĩ nga aꞌthũũnnĩka nii nganĩĩt tõõ?”
37Baa nẽ ẽdẽc Iꞌthaako ĩnõõnnõ ĩĩnnĩk, “Iittiõõ ꞌgii ꞌcĩ occa nga haaꞌnyii nganiit tõõ loholeec caannĩ! Iyyia ꞌthẽk haaꞌnyĩha naa ĩnõõnnõ ĩĩ makayyioohit cunni ẽlẽk nẽ haaꞌnyĩha ittioonniok hĩ appahacaaꞌnya vẽlẽk hĩĩtõ dticcianniook cĩgĩnnĩg. Haggatanaaha ꞌgẽẽn buúk ẽlẽk.”
38Õbõdẽẽkĩ Eꞌthaau tarĩ aĩ, “Baaba, aꞌnyahi gõõng nii ꞌgattan hõdẽẽthõng? ꞌGattaanaa mĩĩ ꞌthẽk nganĩĩt buúk.” Nĩngĩtĩ õkõlẽẽkĩ Eꞌthaau luulu.
39Ma nĩngaata, uduhaak maaꞌnyia ĩnõõnnõ ĩĩnnĩk, “Abathĩ hatĩ gõõng ꞌthẽẽma cĩg manẽẽn cugunnig nẽ akadan hatĩ gõõng tammu. 40Ammũda hatĩ gõõng nii ꞌgẽẽn cunni vẽlẽk joratõõ, nẽ iinu dticciannioohit cĩ ꞌgotonoonu. Nẽẽthĩ, ma idiimu õõga ẽlẽ cunni,#27:40 Iittiõõ hõllõngaa ĩĩnĩ appahaca: Aĩ thõõth ciee nẽ ĩllõõan hatĩ lohollia cĩg Eꞌthaau lõhõlĩ cĩg Yakobo jora. Tigiil ꞌBuuk ꞌcĩ ĩĩn 2 cĩ Habueetu 8:20-22. iittiõõ thĩ hatĩ hõllõngaa iini apahaca tarĩ.”
Ukul Yakobo ũũk õlõõ cĩ maalõnĩ
41Ma baa ho, aꞌnyaheek Eꞌthaau Yakobo mẽdẽr, hĩnĩngĩtĩ thõõth ꞌcĩ aggatanĩ maaꞌnyia Yakobo ho. Baa ammuk Eꞌthaau aĩ, “Õbõhĩ kõrra ꞌcĩ hatĩ adaaknĩ nyakangaana, ma edeccia ulwaanĩ, haruhi hatĩ naa Yakobo.”
42Ma baa athĩhĩ Rẽbẽka mẽdẽr ꞌcĩ aꞌnyaheek Eꞌthaau Yakobo ho, ikia ũtũvvũ nẽẽ Yakobo nẽ ĩĩnnĩk, “Adiim ꞌgotonu Eꞌthaau aruki nganiita. 43Viir hĩdĩĩkoothong bĩĩt hĩ ꞌgõtõna Laban, looccaa cĩ Haraanĩ. Dĩman hĩcĩ haduhaakii naa ho. 44Õõt nõõ ũrũmtĩ hĩ ĩnõõnnõ hĩdĩĩc ĩꞌthõng halalõõthĩ ꞌthĩnĩt cĩ ꞌgotonoonu. 45Ma ataarõthĩ Eꞌthaau thõõth ꞌcĩ adĩmaneehi nii ĩnõõnnõ ho, hĩꞌthõõa hatĩ naa eet umwa hikia hõbõdaayyiina. Ne occa gõõng hatĩ ꞌcĩ occa hadhuhẽẽkĩ lõhõlĩ ꞌramma vẽlẽk tuu kõr hõdẽẽthõng ko?”
46Nĩngĩtĩ annẽẽkĩ Rẽbẽka maac cĩnnĩ Iꞌthaako, “Alĩĩlĩ nganĩĩt ꞌthĩnĩt thõõth ꞌcĩ aꞌthũwanaanĩ Eꞌthaau ngaaĩ ꞌcĩg ĩĩn Hiiti cĩg looc cĩ Kanaanĩ ho gẽrrẽẽt. Nẽ má aꞌthũwanni Yakobo buúk looccaa ꞌcĩ ꞌrĩĩng ko hĩ Eꞌthaau, occa hinnia hatĩ hadaahi.”
Currently Selected:
ꞌThianaattõ 27: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
