ꞌThianaattõ 17

Lõhõt cĩ ꞌteedinit cĩ eleetinu

1Ma baa õdõlanit Abũraamõ irkiꞌnyia ĩĩtõ hẽẽn tũrkũwwec hĩ tũrkũwwec (99), ikia uppwaannak Makayyioohiti ĩnõõnnõ nẽ ĩĩnnĩk, “Nganĩĩt Nyekuc ꞌTirriannioohit ꞌcĩ hĩllõõani vẽlẽk. Má athihi thõõth caannĩ hõdõõkõthĩ, dĩman thõõth ꞌcĩ aũlanĩ. 2Haꞌthũũnnĩ hatĩ naa lõhõt cĩnaac ko nẽ hĩttõõra lõhõlĩ cugunnig hĩĩtõ mẽẽlĩg ꞌrĩng.”

3Nĩngĩtĩ akannĩ Abũraamõ huruꞌnyia nẽ ĩĩnnĩk Nyekuci ĩnõõnnõ, 4“Hĩ ꞌyioko hadahit naag hĩ nganiit lõhõt icci ho, haduha naa haini, ĩĩnĩ hatĩ nii maaꞌnyĩ eet ꞌcĩg mẽẽlĩg ꞌrĩng. 5Iittiõõ hatĩ hõllõngaa hainni nganiit Abũraamõ tarĩ, hiitti hatĩ Abũrahaamõ,#17:5 Abũrahaamõ: Aĩ ꞌthaara ꞌcĩg haĩ Abũrahaamõ ho Ebereeiyyi, Maaꞌnyĩ eet ꞌcĩg mẽẽlĩg. hĩnĩngĩtĩ haaꞌnyii naa nganiit ĩĩ baattĩ loonyin ꞌcĩg mẽẽlĩg. 6Haaꞌnyii hatĩ naa nganiit lõhõlĩ ꞌcĩg mẽẽlĩg ꞌrĩng. Nẽ lõhõlẽẽnĩĩ tĩko, au hatĩ habuẽẽta ꞌcĩg aggam loonyin ꞌcĩg mẽẽlĩg gẽrrẽẽt. 7Haꞌthũũnnĩ hatĩ naa lõhõt ꞌcĩ hadak hĩ nganiit ko, ĩꞌthõng hõdõlan lõhõlĩ cĩg lõhõlĩ cugunnig vẽlẽk irkiꞌnyia hĩ irkiꞌnyia. Hĩĩnĩ hatĩ naa Nyekuc cunni hĩ cĩ lõhõlĩ cugunnig urutaa cunni buúk. 8Haaꞌnyuung hatĩ naa nganiit hĩ lõhõlĩ cugunnig looc cĩ Kanaanĩ ꞌcĩ ꞌyioko aayyi nii ho, hĩĩ cunuung ũdũt. Hĩĩnĩ hatĩ naa Nyekuc cĩ lõhõlĩ cugunnig.”

9Nĩngĩtĩ annẽẽkĩ Nyekuci Abũrahaamõ, “ꞌThũũtĩ nii buúk lõhõt cĩnaac ko jurrung nẽ tarĩ aaꞌnyĩhuu lõhõlĩ cugunnig buúk hĩ lõhõlĩ ꞌcĩg hatĩ au urutaa cĩnĩĩng vẽlẽk, huꞌthuutti lõhõt icci ũdũt. 10Ĩĩn ciee lõhõt caannĩ hĩ nganiita hĩ lõhõlĩ cugunnig, nẽẽꞌthẽk hĩ lõhõlĩ ꞌcĩg nga hatĩ arrittiaa irkiꞌnyiaannĩ vẽlẽk. ꞌTẽẽd eleeti cĩg lõhõlĩ ꞌcĩg maacĩg#17:10 ꞌTẽẽd eleeti cĩg lõhõlĩ ꞌcĩg maacĩg: Baa aduhaak Nyekuci Abũrahaamõ anneek ꞌtẽẽda rucci cĩg eleeti cĩg eet ꞌcĩg maacĩg lõhõlẽẽnĩĩ ꞌcĩg maacĩg urutaa cĩ waathinniook turkiyyio, ĩnõõ ꞌcĩ ẽttẽẽdĩ nẽẽ eleeti cĩg lõhõlĩ ꞌcĩg maacĩg, hátĩ hiita hĩĩtõ lõhõlĩ cĩg Nyekuci. ꞌBuuk cĩ ꞌThianaattõ 17:10-14. hĩ eet ꞌcĩg maacĩg ꞌcĩg aattĩg õlõõ cunni vẽlẽk. 11Iꞌthianaanĩ kõr nicci, adiim etteeddu eleeti cugguung vẽlẽk nẽ ĩĩn hatĩ ciee terethiinit cĩ lõhõt ꞌcĩ hadak naag hĩ nganiit ko. 12Aꞌnyĩĩk lõhõlĩ ꞌcĩg maacĩg vẽlẽk ꞌcĩg hatĩ arrittiaa irkiꞌnyiaannĩ hetteeddi eleeti, hatĩ ĩĩtõ waathinniooha turkiyyio urutaa cĩ tuhuyyiaattõ. Aꞌnyĩĩk hetteeddi eleeti ꞌcĩg eet ꞌcĩg arrittiaa halaꞌngiõõhĩtõõ cugguung, hĩ eet ꞌcĩg baag uuttiaa ꞌrabbẽẽtĩ, eetaa cĩ looc ꞌcĩ ꞌrĩĩng. 13Adiim appahacaaꞌnya ꞌcĩg hatĩ arrittiaa õlõõ cunni hode ꞌcĩg uuttiaa ꞌrabbẽẽtĩ eetaa cĩ looc ꞌcĩ ꞌrĩĩng buúk, hetteeddi eleeti cĩggĩĩng. Ĩĩn hatĩ nyamacaar cĩ eleeti cugguung ko, terethiinit cĩ lõhõt ꞌcĩ hatĩ aalla irkiꞌnyia hĩ irkiꞌnyia. 14Nẽ ẽẽtĩ umwaa ꞌcĩ nga hẽttẽẽdĩ ẽlẽ cĩnnẽẽnĩ, iiggiayyi hatĩ hõrggẽẽnaa cunuung, hĩnĩngĩtĩ abũrĩ nẽẽ lõhõt caannĩ ho.”

Akateek Nyekuci Tharaĩ ꞌthaar ꞌcĩg ĩĩn ngeju

15Ma ho, uduhaak Nyekuci Abũrahaamõ tarĩ ĩĩnnĩk, “Iꞌthianaanĩ kõr nicci, iittiõõ hatĩ nii hõllõngaa avvĩ ngaa cunni anneehi Tharaĩ tarĩ. Hĩĩtõ hatĩ ꞌthaar cĩgĩnnĩg Thaara.#17:15 Thaara: Aĩ ꞌthaara ꞌcĩg haĩ Thaara ho Ebereeiyyi, aattĩ loonyinu hĩ cĩ habueetu. 16Haggatani hatĩ naa ĩnõõnnõ hittira loholeec ꞌcĩ maacĩ nẽ haggatana ĩnõõnnõ hikia hĩĩ aattĩ eet ꞌcĩg mẽẽlĩg loota nĩnga. Au hatĩ habuẽẽta cĩg eetuk lõhõlẽẽnĩĩ ĩcĩgĩnnĩg ko.”

17Ma nĩngaata, akatĩ Abũrahamĩ hẽbẽrĩ looc nẽ ikidan ĩĩ, “Ĩcca occa gõõng aꞌnyaki Thaara ngaa ꞌcĩ aꞌnyak irkiꞌnyia hẽẽn tũrkũwwec ko hutuno?” Nẽ ĩccaad tarĩ ĩĩ, “Nẽ tarĩ ꞌyioko, hatahaanya naa buúk haꞌnyaha irkiꞌnyia ꞌmiia hõdẽĩ, ĩcca occa ꞌthẽk hatĩ nga haꞌnyaka lõhõlĩ dĩdĩ?” 18Nĩngĩtĩ annẽẽkĩ Abũrahamĩ Nyekuc, “Aꞌnyĩĩk nuun ꞌgattan cunni ho hũũppan Ĩthĩmaĩlĩ diooni!”

19Ẽdẽcĩ hinnia Nyekuci anneek, “Aitiõõ hõllõngaa occa aaĩ noho, arrita hatĩ Thaara ngaa cunni dẽẽdẽ loholeec ꞌcĩ maacĩ ꞌcĩ hatĩ akanneehi ꞌthaar ꞌcĩg haĩ Iꞌthaako. Haꞌthũũnnĩ hatĩ naa lõhõt caannĩ hĩ ĩnõõnnõ hĩ lõhõlĩ cĩgĩnnĩg vẽlẽk ũdũt. 20Nẽ hĩ ꞌyioko hĩthĩha naa thõõth cunni ho, haggatani hatĩ naa Ĩthĩmaĩl buúk nẽ haaꞌnyĩha lõhõlĩ ꞌcĩg mẽẽlĩg. Arrita hatĩ lohollia cĩgĩnnĩg ko, lõhõlĩ ꞌcĩg mẽẽlĩg ꞌrĩng buúk. Aku hatĩ Ĩthĩmaĩlĩ ĩĩn maaꞌnyĩ lõhõlĩ õmmõtõ hĩ ꞌramma, ꞌcĩg hatĩ au ĩĩn habuẽẽta. Haaꞌnyihi hatĩ naa lõhõlĩ cĩgĩnnĩg hĩĩtõ eet cĩg looc ꞌcĩ abuli. 21Nẽẽthĩ, hadaka hatĩ naag lõhõt hĩ Iꞌthaako ꞌcĩ hatĩ arritaaki Thaara ho. Arrittiaa hatĩ Iꞌthaako kõr ꞌcĩ aaĩ hĩ ciee irkit ꞌcĩ gõlla.” 22Ma baa ẽdẽcaak Nyekuci ngaatĩ õthõõthõnĩ hĩ Abũrahaamõ ho, ikia ũtũngeek nẽẽ Abũrahaamõ nĩngaata nẽ õbõdõõthĩ hẽẽtahujjieen.

23Ma kõr niccia noho, ikia ũũhĩ Abũrahamĩ ngeerĩnĩ Ĩthĩmaĩl hĩ lõhõlĩ vẽlẽk ꞌcĩg arrittiaa halaangatõõ cĩnnĩ, hĩ ꞌcĩg uuttiaa ꞌrabbẽẽtĩĩ cĩgĩnnĩg, hĩ lõhõlĩ vẽlẽk ꞌcĩg maacĩg ꞌcĩg aattĩg halaangatõõ cĩnnĩ, hĩ appahacaaꞌnya ꞌcĩg arrittiaa õlõõ cĩnnĩ nẽ ẽttẽẽd eleeti cĩggĩĩng, hĩ baa aduhaak Nyekuci ĩnõõnnõ. 24Baa etteeddi Abũrahaamõ ẽlẽ baa ĩĩtõ irkiꞌnyia cĩgĩnnĩg hẽẽn tũrkũwwec hĩ tũrkũwwec (99). 25Baa ĩĩtõ ngeerĩnĩ Ĩthĩmaĩl irkiꞌnyia õmmõtõ hĩ iyyio. 26Nẽ baa etteeddi Abũrahaamõ hĩ ngeerĩnĩ kõr niccia hõdẽĩ. 27Baa etteeddi eleeti cĩg eet vẽlẽk ꞌcĩg maacĩg ꞌcĩg arrittiaa õlõõ cĩ Abũrahamĩ hĩ appahacaaꞌnya, hĩ ꞌcĩg baag uuttiaa eetaa cĩ looc ꞌcĩ ꞌrĩĩng hĩ Abũrahaamõ hõdẽĩ.

Currently Selected:

ꞌThianaattõ 17: did

Highlight

Copy

Compare