ꞌThianaattõ 18
18
Uppwaattak heerinniooha iyyio Abũrahaamõ
1Baa uppwaannak Makayyioohiti Nyekuci Abũrahaamõ õlõõ cĩnnĩ hẽẽnĩĩ cĩg eet ꞌcĩ haĩ Mamre baa aaĩ kõrra lokora. Baa iccioloongan Abũrahamĩ ngaatĩ õbõhõõ hĩ hattũũg cĩ ꞌcieethu, hĩnĩngĩtĩ baa ammũdeek aaburii kõrra kõr tĩho gẽrrẽẽt. 2Ma baa abbuudi Abũrahamĩ ho, adtuuha hinnia eet ũgĩ iyyio abĩlĩ ngadiiha nĩngaata. Ma baa acĩn nẽẽ ĩhõõggõ ho, ĩtĩnga ũꞌthũkũcoothĩk ĩhõõggõ nĩngĩtĩ õkõ ĩꞌthaaĩ.
3Ma nĩngaata, ĩĩnnĩk Abũrahaamõ makayyioohit cĩnĩĩng, “Ma baaĩ nuun hedeceeku haaga, iita nuun nõõ iyyiomanit hĩdĩhĩdĩĩc õlõõ caannĩ, hátĩ haaꞌnyuung ꞌgẽẽn. 4Aꞌnyĩĩk nõõ haꞌnyaktaahuung eeta maam ꞌcĩg acũũrannu ꞌthoo nẽ iyyiomattu hẽẽta urutaa cĩ. 5Hĩ ꞌyioko uppwaattahaangu nganĩĩt dticciannioohit cunuung ko, ĩꞌnya nõõ haꞌnyahaahuung ꞌgiimwa ꞌcĩ abadtẽc adahit, hátĩ haaꞌnyuung ꞌtirrian ꞌcĩ ovvooyyu.”
Nĩngĩtĩ annẽẽkĩ eeta niccieeg ĩnõõnnõ, “Ĩlaallẽ, dĩman thĩ hĩcĩ aduha nii ho.”
6Ma nĩngaata, ũꞌthũkũc Abũrahamĩ ũũk uduhun ꞌcieeth nẽ ĩĩnnĩk ngaa cĩnnĩ, “Thaara, ꞌtiha tũkan nẽ ũthũha ũbũnẽẽt ũgĩ hĩdĩĩkoothong.”
7Ma tarĩ ho, ivvir Abũrahamĩ ũũk ngaatĩ aattiyyi hẽlẽggĩ nẽ ẽbẽra moolĩt ꞌcĩ adĩhĩ, nĩngĩtĩ aaꞌnyĩkĩ tũhayyioohit hucuhanneek hẽẽrõn niccig hĩdĩĩkoothong. 8Ma baa ũkũmaneek Thaara ꞌgẽẽn ẽlẽk, ikia aꞌnyaha Abũrahamĩ ira ꞌcĩg ĩĩn mũcahar hĩ callang hĩ iding ꞌcĩ ĩwaaddi ho nẽ aꞌnyahoothĩk hẽẽrõn niccig. Baa abĩlĩ Abũrahamĩ ngadiiha hẽẽta uruta nĩngaata, baa nga aduhi hẽẽrõnĩ.
9Ma ho, ijinit eeta niccieeg Abũrahaamõ ĩĩttĩk, “Aaĩ ngaa cunni Thaara ngaana?”
Ẽdẽcĩ Abũrahamĩ anneek, “Ĩnõõnnõ caa aaĩ ꞌcieetõõ hata.”
10Nĩngĩtĩ õthõõthĩ Makayyioohiti cĩ hẽẽrõn niccig aĩnnĩ, “Má hõbõda naa irkit ꞌcĩ gõlla kõr ꞌcĩ aaĩ hĩ cieeni, hũmmũdeeha hatĩ ngaa cunni Thaara ũtũhũa loholeec ꞌcĩ maacĩ.”
Baa athĩkna Thaara buúk thõõth cĩ eet nicci ho, hĩnĩngĩtĩ baa aaĩ nẽẽ hattũũgaa cĩ ꞌcieethu ĩcĩ bahuc cĩ Abũrahamĩ. 11Baa ũmmũdeek atahaanyito Abũrahaamõ hĩ Thaara nẽ allanganit irkiꞌnyia ꞌcĩg occa arritaanĩ Thaara loholeec. 12Ma ho, atarar Thaara ẽmmẽn ĩĩ, “ꞌYioko ꞌthẽk naag hĩ maac caannĩ ꞌcĩg hĩĩtta morwak haaga ho, ĩcca occa nga harritaanna loholeec?”
13Nĩngĩtĩ ajini Makayyioohiti Nyekuci Abũrahaamõ annẽẽkĩ, “Inni Thaara hatarar ẽmmẽn hĩĩ, ‘Occa ꞌthẽk naa dẽẽdẽ nga haꞌnyaki ngaa ꞌcĩ hatahaanya ho?#18:13 Makayyioohit: Baa ĩĩn heerinnioohiti umwaa hõrggẽẽnaa cĩ hẽẽrõn ꞌcĩg ĩĩn iyyio ho, Nyekuc.’ 14Aaĩ occa ꞌthẽk ꞌgiimwaa ꞌcĩ aꞌnyaman Makayyioohit? Hĩcĩ haduha naa ho, ma hõbõda naa irkit cĩ gõlla kõr ꞌcĩ aaĩ hĩ cieeni, hũmmũdeeha hatĩ Thaara ũtũhũa loholeec ꞌcĩ maacĩ.”
15Baa nẽ itiẽẽlĩ Thaara gẽrrẽẽt, nĩngĩtĩ ĩggõõlĩ Makayyioohit annẽẽkĩ, “Nga hatararõ.”
Nẽ ẽdẽc Makayyioohiti ĩĩnnĩk, “Eei, iyyia ꞌthẽk atararuu.”
Ĩĩlaleek Abũrahamĩ Makayyioohit
16Ma baa udukto eeta cieeg ẽlẽk, iita ĩtĩngaacõ nẽ ẽdẽẽnytõthĩ looc ĩĩcĩ ꞌThõõdõmĩ, nĩngĩtĩ ittioonĩkĩ Abũrahamĩ ĩhõõggõ ꞌgõõla. 17Ma ho, ummuk Nyekuci Makayyioohiti ĩĩ, “Hõllõngaa hatĩ hammiꞌthẽẽkĩ naa Abũrahaamõ thõõth ꞌcĩ hatĩ hõkõ hadĩmani naana. 18Aku hatĩ Abũrahamĩ ĩĩn baattĩ loonyin ꞌcĩg aꞌthĩlan nẽ ubulli gẽrrẽẽt. Haggatani hatĩ naa eet loonyini vẽlẽk, hĩnĩngĩtĩ ĩnõõnnõ. 19Baa hẽbẽra naa ĩnõõnnõ, hátĩ heteretheek lõhõlĩ cĩgĩnnĩg hĩ lõhõlĩ cĩg lõhõlĩ cĩgĩnnĩg, hĩthĩhĩt hatĩ gõõng nẽ uꞌthuutti thõõth cĩ Makayyiookto, ngaatĩ adĩmanĩ thooꞌthiok ꞌcĩg aũlanĩ ꞌcĩg ĩĩn dĩdĩ, hátĩ haꞌnyahaak Makayyioohiti Abũrahaamõ thooꞌthiok baag aduhaak nẽẽ ĩnõõnnõ.”
20Ma ho, õthõõth tarĩ Makayyioohiti ĩĩ “Abũrahaamõ, hĩthĩha naa ngaatĩ adĩmanĩ eeta cĩg ꞌThõõdõmĩ hĩ cĩg ꞌGõmõõra thooꞌthiok ꞌcĩg ĩĩn ꞌriiring gẽrrẽẽt ũdũt. 21Hadiimi ꞌyioko naa hõkõ hacini nyeemuut ꞌcĩ hathĩkna ho hatĩ ĩĩn dĩdĩ.”
22Ma nĩngaata, ĩtĩngaacõ heerinniooha ꞌramma õõt ĩĩcĩ ꞌThõõdõmĩ nẽ idionganit Makayyioohiti dioo hĩ Abũrahaamõ uruta hĩdĩhĩdĩĩc. 23Nĩngĩtĩ ẽẽjẽhõõthĩkĩ Abũrahamĩ Nyekuc Makayyioohit nẽ ijin ĩĩnnĩk, “Õkõ ꞌyioko ꞌthẽk nii aruhi eet ꞌcĩg ĩĩn ꞌthẽccanniook hĩ ꞌcĩg abũnnaa hõdẽĩ? 24Má hĩĩ ꞌcĩ aattiyyi eeta hẽẽn ꞌtur ꞌcĩg abũnnaa, ĩcca occa ꞌthẽk hõllõngaa ammaannihi eet ꞌtaaũnaa hũtũrũũr, hĩnĩngĩtĩ eet ꞌcĩg ĩĩn hẽẽn ꞌtur ko? 25Nẽ dĩdĩ, occa ꞌthẽk hõllõngaa aruhi eeta ꞌcĩg abũnnaa hĩ ꞌthẽccanniook hõdẽĩ. Nganiit loota nĩnga ꞌcĩ etteedi thooꞌthiok jurrung nẽ occa hõllõngaa adĩmani eet ꞌcĩg ammĩrĩ ꞌbuth.”
26Ẽdẽcĩ Nyekuci Makayyioohiti anneek, “Má hõkõ hammũda naa eet hẽẽn ꞌtur ꞌcĩg abũnnaa ꞌtaaũnaa cĩ ꞌThõõdõmĩ ho, occa hatĩ huunnihi naa ꞌtaaũn hũtũrũũr, hĩnĩngĩtĩ ĩhõõggõ.”
27Ma ho, ĩĩlaleek Abũrahamĩ Makayyioohit tarĩ ĩĩnnĩk, “Makayyioohit, hĩĩnĩ nuun naa eet haaga, ma haharreekaanĩ, aꞌnyaa nuun hijinii tarĩ. 28Má hatĩ ĩĩn eeta hẽẽn ꞌwec hĩ ꞌtur ꞌcĩg abũnnaa, ĩcca occa nga atuuthi ꞌtaaũn noho?”
Ẽdẽcĩ Nyekuci anneek, “Má hammũdoothihi naa eet hẽẽn ꞌwec hĩ ꞌtur ꞌcĩg ammĩrĩ, occa hatĩ huunnihi ꞌtaaũn hũtũrũũr.”
29Ẽdẽcĩ Abũrahamĩ tarĩ aĩ, “Má ꞌyioko mũdoothĩk eet ꞌcĩg ammĩrĩ ꞌcĩg ĩĩn hẽẽn ꞌwec haaga?”
Ẽdẽcĩ Nyekuci anneek, “Má hammũdoothihi eet hẽẽn ꞌwec, occa hatĩ hõllõngaa hatuuthi ꞌtaaũn.”
30Nĩngĩtĩ ĩĩlalẽẽkĩ Abũrahamĩ Makayyioohit tarĩ annẽẽkĩ, “Ma nuun haharreekaa ngaatĩ hajinni hiriiri, má ꞌyioko ꞌthẽk mũdoothĩk hĩĩtõ hẽẽn iyyio thõng?”
Ẽdẽcĩ Nyekuci anneek, “ꞌYioko hũmmũdoothĩk hẽẽn iyyio thõng, occa hõllõngaa hatuuthi ꞌtaaũn cĩnĩĩng ko.”
31Nẽ õthõõth Abũrahamĩ tarĩ ĩĩ, “Makayyioohit, ma nuun haharreekaa thõõthaa ꞌcĩ haraeekii ho, má mũdoothĩk eet hẽẽn ꞌramma thõng?” Ẽdẽcĩ Makayyioohiti anneek, “Má hammũdoothihi eet hẽẽn ꞌramma thõng, occa hõllõngaa hatuuthi ꞌtaaũn cĩnĩĩng ko.”
32Nẽ ĩĩlaleek Abũrahamĩ ĩnõõnnõ tarĩ ĩĩnnĩk, “Makayyioohit caannĩ, ma nuun halĩĩllĩkaanĩ. Má ꞌyioko mũdoothĩk eet õmmõtõ haaga?”
Ẽdẽcĩ Makayyioohiti aĩ, “Má hammũdoothihi eet õmmõtõ haaga, occa ꞌthẽk huunnihi eet ꞌtaaũna hũtũrũũr, hĩnĩngĩtĩ ĩhõõggõ.”
33Ma baa edecciaak nẽẽg ngaatĩ õthõõthõnĩ, ĩtĩnga Makayyioohiti ũũha. Nĩngĩtĩ õbõdõõꞌthĩ Abũrahamĩ buúk ĩĩcĩ õlõ cĩnnĩ.
Currently Selected:
ꞌThianaattõ 18: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
