ꞌThianaattõ 13

Eꞌngerrio Abũraamõ hĩ Loot

1Ma baa ũtũngteek Abũraamõ hĩ ngaa cĩnnĩ hĩ hẽlẽggĩ cĩgĩnnĩg vẽlẽk Ijjib, ikia õbõdõõthĩ nẽẽ looccaa cĩ Negeve. Nẽ baa nga õõkõr nẽẽ hĩ Loot buúk. 2Baa ĩĩn Abũraamõ eet ꞌcĩ aballi gẽrrẽẽt. Baa abal nẽẽ aꞌtha hĩ ẽẽtha hĩ tĩĩna nẽ tarĩ aꞌnyak maccĩrẽẽn hĩ ꞌdaab buúk. 3Ma nĩngaata, ikia ũtũngeek Negeve nẽ õtõõĩ looc ĩꞌthõng Bẽthẽl, nga baa ẽhẽnytĩ nẽẽ tuggu, hõrggẽẽnaa cĩ ꞌtaaũn cĩ Bẽthẽlĩ hĩ Ai, 4baa nĩngĩtĩ ẽhẽnyĩt nẽẽ nẽ ĩbbõõrĩhĩĩ Nyekuc ꞌgaarrieenit baa ĩĩcĩ oou nẽ ala Makayyioohit nĩngaata niccia.

5Nẽ baa ĩĩn Lõõtĩ buúk ballioohit ꞌcĩ baa abal aꞌtha hĩ ẽẽtha hĩ tĩĩna nẽ aꞌnyak tuggẽẽt buúk. Baa õõkõr nẽẽ hĩ Abũraamõ. 6Nẽ hĩnĩngĩtĩ baa aꞌnyak nẽẽg vẽlẽk nyalõmaarwa ꞌcĩg obbitig gẽrrẽẽt, ikia akadanõõ arteeniti ꞌcĩ occa ẽgĩ hẽlẽggĩ. 7Nĩngĩtĩ au ẽggẽrꞌnyõõnĩ tũhayyiooha cĩg Abũraamõ hĩ cĩg Lõõtĩ. Baa nohota, baa nga aattĩg eeta cĩg Kanaanĩ hĩ eet cĩg Peri looccaa nĩĩca.

8Ma baa acĩn Abũraamõ ngaatĩ abathĩ authetĩ ho, ikia uduhaak Loot ĩĩnnĩk, “Ẽlẽ, hĩĩgĩnnõõ naag ꞌgõtõn, occa hõllõngaa hẽggẽrnyõõ naag hode tũhayyiooha cĩggaac, hĩnĩngĩtĩ arteenit. 9Maka lõõcĩ gẽrrẽẽt, bẽra dhoorit ꞌcĩ ũũppan hẽbẽrĩ cugunnig nẽ ũũhĩ, hátĩ heꞌngerrio. Má adiimi õkõõĩ looc ĩĩcĩ hujjieen, hõkõõĩ hatĩ naa ĩĩcĩ holooc hode má adiimi õkõõĩ looc ĩĩcĩ holooc, hõkõõĩ hatĩ naa ĩĩcĩ hujjieen.”

10Ma nĩngaata, ikia ẽlẽm Lõõtĩ muhẽẽnĩt cĩ Abũraamõ ho, nẽ ĩtĩnga ĩcĩnõõthĩ unak cĩ ꞌJõrdanĩ ĩĩcĩ ꞌThõõarĩ. Baa ammũdeek aꞌnyak unahĩ cĩ ꞌJõrdanĩ maam hĩ arteenit ꞌcĩ cũlakĩc, haau hĩ Ẽẽdẽnĩ mana cĩ Makayyiookto hode hĩ lõõcĩ ꞌcĩ ẽllẽẽmĩth cĩ Ijjibi. Baa aku thõõth ciee õõa ꞌcĩ nga hũtũũthĩ Makayyioohiti ꞌtaaũnniook cĩg ꞌThõõdõmĩ hĩ cĩ ꞌGõmõõra. 11Nĩngĩtĩ ẽbẽraanĩ Lõõtĩ unak cĩ ꞌJõrdanĩ hĩĩ cĩnnĩ nẽ ĩtĩnga ũũk õlõman ĩĩcĩ uruto. ꞌGõõl ꞌcĩ baa au ẽꞌngẽrõõnĩ eeta cieeg ko cieeni. 12Baa nẽ idiongan Abũraamõ looccaa cĩ Kanaanĩ nẽ ũũk õlõman Lõõtĩ hõrggẽẽnaa cĩ ꞌtaaũnniook ꞌcĩg aattĩg unaahatõõ cĩ ꞌJõrdanĩ, nĩngĩtĩ õkõ ẽhẽnytĩ tuggẽẽt ngaatĩ õbõhõõ hĩ ꞌtaaũn cĩ ꞌThõõdõmĩ. 13Baa ĩĩn eeta cĩg ꞌtaaũn cĩ ꞌThõõdõmĩ ho ꞌthẽccanniook gẽrrẽẽt muumaa cĩ Makayyiookto.

Uluug Abũraamõ ũũk Heborona

14Ma baa urutaa ꞌcĩ eꞌngerriõõĩ Abũraamõ hĩ Loot, ikia ĩĩnnĩk Makayyioohiti Abũraamõ, “ꞌBuudi da nõõ cĩnooth looc ngaatĩ abĩllĩ nii hataa, cĩnooth da looc ĩĩcĩ holooc nẽ icinoothu ĩĩcĩ uruto nẽ icinoothu ĩĩcĩ hujjieen nẽ icinoothu ĩĩ gõõng õkõlõõthĩkĩ kõrra. 15Hõkõ hatĩ haaꞌnyii naa nganiit hĩ lõhõlĩ cugunnig looc ꞌcĩ acini nii ho vẽlẽk hĩĩ cunuung ũdũt. 16Haaꞌnyii hatĩ naa nganiit lõhõlĩ ꞌcĩg mẽẽlĩg ꞌcĩg ĩĩkĩ ꞌthẽẽm loota nĩnga. Nẽ ma aaĩ ẽẽtĩ ꞌcĩ occa agiil ꞌthẽẽm, occa hatĩ agiil nẽẽ lõhõlĩ cugunnig buúk. 17Nẽ ꞌyioko, hanneekii naa bĩĩt tõõĩ looc nicci vẽlẽk, hĩnĩngĩtĩ hõkõ hatĩ haaꞌnyii naa hĩĩ cunni.”

18Ma baa õtõõĩ Abũraamõ looc vẽlẽk, ikia uluugi õlõ nẽ ũũk õlõmaneek ngaatĩ õbõhõõ hĩ hẽẽn ꞌcĩg obbitig cĩg eet ꞌcĩ haĩ Mamre, ngaatĩ õbõhõõ hĩ ꞌtaaũn cĩ Heboronĩ. Nĩngĩtĩ ẽhẽnytaanĩ nĩngĩtĩ ĩbbõõrĩkĩ Makayyioohit ꞌgaarrieenit nĩngaata.

Currently Selected:

ꞌThianaattõ 13: did

Highlight

Copy

Compare