ꞌThianaattõ 12

Ĩꞌthooĩk Makayyioohiti Abũraamõ Kanaana

1Ma baa aau Abũraamõ looccaa cĩ Haraanĩ ĩꞌthõng, ikia ũtũvvũ Nyekuci Makayyioohiti ĩnõõnnõ ĩĩnnĩk, “Abũraamõ, tũngeek looc cunni hĩ eet cugunnig hĩ õlõ cĩ maaconu vẽlẽk nẽ uuhu looccaa ꞌcĩ hatĩ hõkõ heterꞌtheekii naana.”

2“Hõkõ hatĩ haaꞌnyii naa nganiit lõhõlĩ ꞌcĩg mẽẽlĩg ꞌrĩng ꞌcĩg hatĩ õlõman looc cobbi gẽrrẽẽt.

Haggatannii hatĩ naa nganiit

nẽ haaꞌnyĩha ꞌthaar cugunnig hubulli, hátĩ haggatattĩ eeta vẽlẽk, hĩnĩngĩtĩ nganiita.

3Haggatani hatĩ naa eet ꞌcĩg aggatannii nganiita,

nẽ hĩccĩĩna eet ꞌcĩg acciinni nganiita.

Haggatani hatĩ naa eet loonyini vẽlẽk,

hĩnĩngĩtĩ nganiita.”

4Nĩngĩtĩ ĩꞌngaannĩ Abũraamõ õkõõĩ hĩ baa aduhaak Makayyioohiti ĩnõõnnõ nẽ baa õõkõr Lõõtĩ hĩ ĩnõõnnõ. Baa ĩĩn Abũraamõ irkiꞌnyia hẽẽn tũrkĩramma hĩ ꞌtur (75), baa ũũnnĩk nẽẽ looc cĩ Haraanĩ. 5Baa õõkõr nẽẽ hĩ ngaa cĩnnĩ Tharaĩ, hĩ ngeertĩ ꞌgõtõnõõnĩ ꞌcĩ haĩ Loot, hĩ appahacaaꞌnya cĩgĩnnĩg. Baa aꞌngĩd nẽẽ hẽlẽggĩ cĩggĩĩng vẽlẽk baa aꞌnyak nẽẽ looccaa cĩ Haraanĩ buúk. Nĩngĩtĩ õdõlanĩ Abũraamõ looc ꞌcĩ haĩ Kanaan.

6Ma baa õdõlanit nẽẽg Kanaan, ikia õtõõĩ Abũraamõ looc ĩꞌthõng hõdõlan hẽẽt cobbi ngaatĩ haĩ Mõõrẽ ꞌcĩ õbõhõõ hĩ ꞌtaaũn cĩ ꞌThẽkẽmĩ. Baa nohota, baa nga aattĩg eeta cĩg Kanaanĩ looccaa cĩnĩĩng. 7Ma nĩngaata, uppwaannak Makayyioohiti Nyekuci Abũraamõ tarĩ nẽ ĩĩnnĩk ĩnõõnnõ, “Ĩĩn lõõcĩ ciee looc ꞌcĩ hatĩ haaꞌnyihi naa ngeeruni.” Ma nĩngaata, etehenyeek Abũraamõ Makayyioohit ꞌcĩ uppwaannak ĩnõõnnõ ho, nĩngĩtĩ ĩbbõõrĩkĩ Nyekuc ꞌgaarrieenit.

8Ma nĩngaata, ikia ũũk nẽẽ ĩĩcĩ muurriok ꞌcĩg aattĩg ĩĩcĩ uruto cĩ ꞌtaaũn cĩ Bẽthẽlĩ, nĩngĩtĩ õkõ ẽhẽnytĩ tuggu cĩnnĩ nĩngaata. Baa aaĩ Bẽthẽlĩ ĩĩ gõõng õkõlõõthĩkĩ kõrra nẽ aau Ai ĩĩcĩ uruto, ĩĩ gõõng uppwaannanĩ kõrra. Ma tarĩ nĩngaata, ẽtẽhẽnya nẽẽ nĩngĩtĩ ĩbbõõrĩkĩ Makayyioohit ꞌgaarrieenit nẽ ubuluth ĩnõõnnõ nĩngaata. 9Ma tarĩ ho, ũllũũcĩ Abũraamõ ũũk ĩĩcĩ horu ꞌcĩ õdõhõhĩĩ kak ꞌcĩ haĩ Negeve.

Õdõlan Abũraamõ Ijjib

10Aku Abũraamõ annõõ hĩ nyarõn ꞌcĩ baa aaĩ Kanaana noho ꞌtur. Nẽ hĩnĩngĩtĩ baa maka nyarõnĩ tĩho gẽrrẽẽt, ikia ummuk Abũraamõ ĩĩ, “Ĩꞌnya nõõ hũũk hĩbĩlẽẽhĩ Ijjiba hĩdĩhĩdĩĩc.” 11Ma baa õbõktõ nẽẽ hĩ Ijjib, ikia uduhaak ngaa cĩnnĩ Tharaĩ ĩĩnnĩk, “Ĩĩnĩ nii ngaa ꞌcĩ elleemi gẽrrẽẽt. 12Ma icitti nganiit eeta cĩg Ijjibi, ammuhuneek hatĩ nẽẽg aĩ iini nii ngaa caannĩ nẽ urukta nganĩĩt, hátĩ hootti nganiita. 13Ma hõdõlanit ĩĩca, ꞌgõõl nẽẽ nii ĩhõõggõ ĩĩnnĩk, iini nii ngõõna. Ĩnõõ hatĩ ꞌcĩ hõllõngaa õõ aruka nẽẽg nganĩĩta. Ma ĩĩnnĩhuu noho, au hatĩ akũmaneeka nẽẽg nganĩĩt jurrung, hĩnĩngĩtĩ nganiita.”

14Ma baa õdõlan Abũraamõ lõkõõrĩ cĩ Ijjibi ho, adtuuha hinnia eeta cĩg Ijjibi dĩdĩ ngaatĩ ĩĩnnĩ Tharaĩ ngaa ꞌcĩ ẽllẽẽmĩth gẽrrẽẽt. 15Ma baa adtuuha athegereeꞌnya cĩg habu cĩ Ijjibi#12:15 Habu cĩ Ijjibi: Baa avvĩ eeta cĩg Ĩꞌthĩraẽlĩ habu cĩ Ijjibi ho anneek Varaõõnẽ, nĩngĩtĩ aĩ habu cĩ Ijjibi. ĩnõõnnõ ho, õõt uduktaak habu ĩĩttĩk, “Ẽllẽẽmĩth ngaa umwaa ngaati gẽrrẽẽt.” Nĩngĩtĩ au õõĩ nẽẽg Tharaĩ halaangatõõ cĩ habuuo. 16Ma baa ũũhĩ habuui Tharaĩ haar hĩĩ ngaa cĩnnĩ, ikia ũkũmaneek habuui Abũraamõ jurrung nẽ aaꞌnyĩk ĩnõõnnõ aꞌtha hĩ ẽẽtha, hĩ tĩĩna, hĩ thigirẽẽta hĩ nyaakaalnya hĩ appahacaaꞌnya ꞌcĩg maacĩg hĩ ꞌcĩg ngayyig ꞌcĩg mẽẽlĩg ꞌrĩng.

17Nẽ hĩnĩngĩtĩ thõõth ꞌcĩ õkõõĩ habuui ngaa cĩ Abũraamõ Tharaĩ haar hĩĩ ngaa cĩnnĩ ho, ikia ĩꞌthõõak Makayyioohiti habu hĩ eet cĩg halang cĩnnĩ vẽlẽk mooriꞌthiook ꞌcĩg abathĩ gẽrrẽẽt. 18Ma nĩngaata, okoleek habuui Abũraamõ ꞌthooc hikia halaangatõõ cĩnnĩ nẽ ijin ĩnõõnnõ ĩĩnnĩk, “Ẽlẽ, adĩmannaa hutuno? Hõllõngaa baa occa aduhaakaa lõꞌngõõc anneekaa ĩĩn ngaa cunni inni? 19Inni baa nõõ ĩnnĩhaa ĩĩn nẽẽ ngoonu nẽ ĩtĩhĩĩnaa haar ĩnõõnnõ hĩĩ ngaa caannĩ ho? Nẽ ꞌyioko, ngaa cunni cieeni, bĩtĩ ĩnõõnnõ õõtõ!” 20Nĩngĩtĩ aaꞌnyĩkĩ habuui athegereeꞌnya hittioonito Abũraamõ hĩ ngaa cĩnnĩ, hĩ hẽlẽggĩ cĩgĩnnĩg vẽlẽk hoboddiõõthĩ looccaa ꞌcĩ baa auuni.

Currently Selected:

ꞌThianaattõ 12: did

Highlight

Copy

Compare