ꞌGalaaꞌthia 5

Õõganneet Krĩstõ

1Nẽẽthĩ ꞌyioko, õõgaeet ngagĩĩt Yeesu Krĩstõ haaut lõꞌngõõc. Nẽ tarĩ, uꞌthuutti thõõth ꞌcĩ aattiyyu lõꞌngõõc ko jurrung, ma nga hĩĩgĩnnu appahacaaꞌnya cĩg nyattal cĩ Mũũꞌtha tarĩ.

2Ĩthĩhĩt thõõth caannĩ! Haduhaakuung naa Paaulo hanneekuung, má nga aaꞌnyiku eleeti cugguung hetteeddi, iittiõõ thĩ mĩĩ Krĩstõ hõllõngaa ĩĩn eet ꞌcĩ tiiri hĩ ngagiit vẽlẽk. 3Ma adĩman ẽẽtĩ umwa noho, anneek eet tĩho nũũ nyattal cĩ Mũũꞌtha hũtũrũũr. 4Nẽ ma adiimmu niig hataluung Nyekuci ꞌgõõlaa ꞌcĩ anuyyu nyattal cĩ Mũũꞌtha, eꞌngerrioou niig hĩ bũnnai cĩ Krĩstõ ꞌcĩ ĩllõõan vẽlẽk. 5Nẽẽthĩ, aaꞌnyeet Lorii ꞌcĩ Ẽllẽẽmĩth hagaac ngaatĩ aaꞌnyeet Nyekuci hũbũttaath, hĩnĩngĩtĩ helemit naag Krĩstõ. 6Aitiõõ Yeesu Krĩstõ hõllõngaa aꞌnyak thõõth umwa hĩ eet ꞌcĩ ẽttẽẽdĩ ẽlẽ, hode nga hẽttẽẽdĩ ẽlẽ. Aaddi lemiiniti dioo ꞌcĩ hammĩnanõõnĩ naaga.

7Baa elemtu niig ngaatĩ ookorru hĩ Yeesu Krĩstõ nẽ ĩĩ nganĩ ꞌcĩ occa aku ataddaannuung ngagiit ꞌgõõlaa ꞌcĩ elemmu thõõth ꞌcĩ ĩĩn dĩdĩ ho? 8Aitiõõ hõllõngaa aku ẽẽtĩ ꞌcĩ ataddaannuung ko, hĩ Nyekuc baa ẽbẽraannuung ngagiit ĩĩtõ lõhõlĩ cĩgĩnnĩg. 9Aattĩg eeta ũgẽẽgĩ hõrggẽẽnaa cunuung, ꞌcĩg alliman thõõth ꞌcĩ ĩĩn õlõng, ꞌcĩg ĩꞌthanothoothikuung ngagiit haau hĩcĩ ĩꞌthanothoothĩk abũũlana ꞌcĩg abadtẽc mẽrtĩ vẽlẽk. 10Nẽẽthĩ, iiginnu niig eet cĩg Makayyiooktak. Nẽ haini naa dĩdĩ, anuyyu hatĩ niig thõõth ꞌcĩ haduha naana nẽ utuburru nyeemuut ꞌcĩ aduha eet umwaanĩ. Nẽẽthĩ, uuk hatĩ Nyekuci eet ꞌcĩ ataddaannuung ngagiit ko.

11ꞌGotoonoga hĩ ngoonoga, má nga hallimani naa thõõth ꞌcĩ occa etteedini eleeti cĩg eet ꞌcĩg maacĩg, inni haccanattaa eeta cĩg ꞌJudeei nganĩĩt ko? Occa hõllõngaa ĩĩn nyeemuut cĩ hurucceeo, thõõth umwa ꞌcĩ abathĩ, hatĩ nga hanneehi naa eet etteedit eleeti. 12Haini naa aitiõõ hatĩ eeta ꞌcĩg aaꞌnyuung ngagĩĩt ĩlĩĩllẽẽc ko, hõllõngaa ẽttẽẽd eleeti diooni, eꞌngerrio hĩ ĩhõõggõ ũdũt.

Rũgẽt Loriiaa

13Niig ꞌgoonoga cieegi, baa ẽbẽraauung Nyekuci ngagiit aaut lõꞌngõõc. Nẽẽthĩ, ma hõꞌngõõtaneeku rũgẽt ꞌcĩ aattiyyu lõꞌngõõc ko, hĩ authet cĩ ꞌthẽccaanõ, idticattoothĩk ꞌgotoonogu hĩ ngoonogu cugguung ꞌgõõlaa ꞌcĩ ammĩnanoonnu thõng. 14Arummiaa nyattalĩ vẽlẽk hĩĩ hõdẽẽthõng aĩ, “Mĩnnan eet ꞌcĩ aaronnu haau hĩcĩ ammĩnani ẽlẽ cunni.”#Tigiil ꞌBuuk cĩ Levitiko 19:18 15Nẽ má õyõyyõõhanoonnu nyaagwaana nẽ adaktu eleeti ẽmmẽn hĩ idiꞌngwaana cĩg moru, aaut jurrung! Acũdaannu hatĩ ho eleeti ĩĩtõ ꞌthĩĩ.

Rũgẽt ꞌcĩ aaꞌnyeet Lorii ꞌcĩ Ẽllẽẽmĩthĩ

16Nẽẽthĩ, hĩĩna naa nẽẽ, aꞌnyahit rũgẽt cunuung Loriiaa ꞌcĩ Ẽllẽẽmĩthĩ, nẽẽthĩ hatĩ iittiõõ hõllõngaa adticannu ꞌthẽccanẽẽt ꞌcĩg abathĩ ꞌcĩg abũraneeku niiga. 17Adiim ẽlẽ baa ꞌrẽẽnĩ ꞌthẽccanẽẽt ꞌcĩg abathĩ, ꞌcĩg hõllõngaa adiim Lorii ꞌcĩ Ẽllẽẽmĩthĩ. Aruhõõ Lorii ꞌcĩ Ẽllẽẽmĩth hĩ ẽlẽ baannaac ꞌrẽẽnĩ nẽ iittiõõ hõllõngaa adĩmani nii thõõth ꞌcĩ adiimi niina. 18Nẽ má adticannu niig thooꞌthiok ꞌcĩg aduha Lorii ꞌcĩ Ẽllẽẽmĩthĩ, occa aitiõõ nyattalĩ hõllõngaa aggammuung ngagiita.

19Muhẽẽnĩt ꞌcĩ abathĩ ꞌcĩ aaꞌnyĩk eet helemit thooꞌthiok ꞌcĩg ĩĩn ꞌriiring, hĩ dtiicanĩ ꞌcĩg abathĩ. 20Ala nẽẽg hẽlẽggĩ ꞌcĩg aar eeta hĩĩtõ nyekuꞌnya, adtican thooꞌthiok cĩg ngaritu, aaburreek ꞌgõõnõgĩ nẽ ẽppẽhan thooꞌthiok, abũraneek hẽlẽggĩ cĩg eetuk, alĩĩlĩ gẽrrẽẽt, athĩngõõnyanĩ, ẽꞌngẽr eeta nẽ õtõõcõ ẽmmẽn, 21iinan hẽlẽggĩ cĩg eetuk nẽ ĩĩn duuttiak nẽ adĩman thooꞌthiok ꞌcĩg abathĩ ꞌcĩg aattĩg hĩ cieeg karramẽẽtĩ. Ĩꞌnya da huduhaahuung thõõth umwa tarĩ hĩ baa haduhaakuung baa ĩĩcĩ oou, eeta ꞌcĩg adtican thooꞌthiok iccig, hõllõngaa hatĩ aduhun nẽẽg habuccieet cĩ Nyekuci nẽ ĩĩtõ lõhõlĩ cĩgĩnnĩg.

22Nẽẽthĩ, aaꞌnyeet Lorii ꞌcĩ Ẽllẽẽmĩth hĩmmĩnattõ, haccamattoothĩk, haaut lõꞌngõõc, haꞌnyahit ꞌthinneeti ꞌcĩg makatĩg, hĩĩtõ tarbalĩg, hũbũttaath, huꞌthuutti lemiinit, 23nẽ hĩĩtõ tarbalĩg, huꞌthuutti eleeti. Nẽ má adticannu niig thooꞌthiok iccig, hõllõngaa ẽꞌthẽcannu niig nyattal.

24Eeta cĩg Yeesu Krĩstõ, ĩĩn eet ꞌcĩg otoddoyyieek thooꞌthiok ꞌcĩg abathĩ ꞌcĩg abũraneek nẽẽg vẽlẽk hurucceea. 25Aaꞌnyeet ngagĩĩt Lorii ꞌcĩ Ẽllẽẽmĩth rũgẽt nẽ ꞌyioko hũnnẽẽc naag buúk Lori ꞌcĩ Ẽllẽẽmĩthĩ. 26Nẽẽthĩ ꞌyioko, occa hõllõngaa hathĩngõõnyan, nẽ hongoongoyyiõõ ngaatĩ haĩnnĩ hĩllõõan ꞌgoonogeet.

Currently Selected:

ꞌGalaaꞌthia 5: did

Highlight

Copy

Compare