ꞌGalaaꞌthia 6
6
Heelit eet vẽlẽk
1ꞌGotoonoga hĩ ngoonoga, má ẽꞌthẽcanõõ ẽẽtĩ umwaa hõrggẽẽnaa cunuung, oboddiaaĩ niig ꞌcĩg okomtu Loriiaa cĩ Nyekuci ho eet nicci nẽ irrioottihu haau ꞌgõõlaa ꞌcĩ abũnnaa. Ma hataarroꞌthu ngaatĩ occa ẽꞌthẽcannu niig buúk kõr umwa. 2Eellio nyaagwaana hatĩ adĩddĩngĩĩ thooꞌthioha nẽ ꞌgõõlaa cĩ, adĩmannu thooꞌthiok ꞌcĩg õthõõth nyattalĩ cĩ Yeesu Krĩstõ. 3Má ammuk ẽẽtĩ umwaa aĩ hĩllõõani ꞌgõõnõgĩ nẽ hõllõngaa ĩllõõan buúk, ĩggõõl eet tĩho ẽlẽ cĩnnĩ. 4Dticcian dtiic cunni jurrung, nẽẽthĩ hatĩ irrianu. Nẽ ma hĩthakꞌtheehi ẽlẽ cunni hĩ cĩ ꞌgoonogu ũgĩ. 5Hadiim naag hõdẽĩ hõdẽĩ, huꞌthuutti dtiicanĩ cĩggaac.
6Abũnnaa eeta ꞌcĩg allimanoothĩk thõõth cĩ Nyekuci ngaatĩ õthõlĩ hẽlẽggĩ vẽlẽk ꞌcĩg abũnnaa, hĩ eet ꞌcĩg alliman ĩhõõggõ ho.
Tiboolaniinit hĩ janiinit
7Ma higgoollu eleeti cugguung ẽmmẽn. Aitiõõ ẽẽtĩ ꞌcĩ occa aggiith Nyekuc tõõ, hĩnĩngĩtĩ ajana hatĩ ẽẽtĩ ꞌgii ꞌcĩ baa ꞌthẽk athacĩ nẽẽnĩ. 8Ẽẽtĩ ꞌcĩ athacĩ hinyomo cĩg thooꞌthiok ꞌcĩg abathĩ, hĩnĩngĩtĩ abũraneek ẽlẽ cĩnnẽẽnĩ, ajana ꞌthẽk hatĩ nẽẽ bathi. Nẽẽthĩ, ẽẽtĩ ꞌcĩ athacĩ hinyomo, hátĩ hatal Lorii ꞌcĩ Ẽllẽẽmĩthĩ, ajana ꞌthẽk hatĩ nẽẽ rũgẽt ꞌcĩ aalla ooo. 9Ma haharru ngaatĩ eellu ꞌgoonogu, hĩnĩngĩtĩ ajanaannu hatĩ niig ꞌbaaninit, kõr ꞌcĩ uduhaaĩ Nyekuci, hatĩ hõllõngaa aireeku dtiic cĩnnĩ. 10Nẽẽthĩ, hĩdĩmanit eet vẽlẽk jurrung, hatĩ hummuddia ꞌrõtĩ ꞌcĩ hadĩmanĩ ĩhõõggõ jurrung, ettebehini hatĩ ĩĩn nẽẽg eet ꞌcĩg ẽlẽmĩ Makayyioohit Yeesu.
Tilooinit cĩ Paaulo ꞌcĩ adtuurna
11Akatti hẽbẽrĩ ꞌgõõl ꞌcĩ hẽhẽẽdakuung naa ngagiit waraga nyamacaarwaanĩĩ ꞌcĩg obbitig attiaa caannĩ ho jurrung.
12Eeta ꞌcĩg aduhaakuung ngagiit anneekuung etteedit eleeti cĩg eet ꞌcĩg maacĩg ko, adiim nẽẽg ẽtẽrꞌtha makaaꞌthĩt cĩ eleeti cĩggĩĩng. Nẽ adiim alĩĩta nẽẽg ukẽẽnĩt ꞌcĩ allimanĩ thõõth cĩ hurucce cĩ Krĩstõ. 13Aitiõõ eeta ꞌcĩg etteeddi eleeti hõllõngaa anũ nyattal nẽ adiimmuung nẽẽg ngagiit etteeddi, hátĩ hirrianit nẽẽg, hĩnĩngĩtĩ eleeti cugguung. 14Occa hirriani, hĩnĩngĩtĩ hurucce cĩ Makayyioohit cĩnaac Yeesu Krĩstõ diooni, hĩnĩngĩtĩ hurucce cĩnnĩ, ikia adaak lõõcĩ hĩ thooꞌthiok ꞌcĩg abathĩ vẽlẽk hĩ nganĩĩta nẽ hadaaha naa buúk hĩnĩngĩtĩ thooꞌthiok ꞌcĩg abathĩ cĩg looc nicci. 15Aitiõõ hõllõngaa aaddi hatĩ etteeddi ẽẽtĩ hode nga hẽttẽẽdĩ, thõõth ꞌcĩ aaddi hĩ Nyekuc diooni, ꞌcĩ occa hĩĩgĩnnĩ naag ngeju.
16Aaꞌnyĩk hatĩ Nyekuci eet vẽlẽk ꞌcĩg anũ thõõth icci, authet ꞌcĩ aattiyyi lõꞌngõõc hĩ tamaati cĩnnĩ, tananga eet cĩg Ĩꞌthĩraẽlĩ cĩg Nyekuci.
17Nẽẽthĩ, dtuurnattaa cĩnnĩ, hõllõngaa hadiimi eet ꞌcĩ accanannaa nganĩĩta, hĩnĩngĩtĩ haꞌnyahi naa ẽllaa caannĩ carrahulit, hĩnĩngĩtĩ hanũ Yeesu.
18ꞌGotoonoga hĩ ngoonoga ꞌcĩg iiginnu lemmiook cĩgannĩg ko, aꞌnyĩĩk bũnnai cĩ Makayyioohit Yeesu Krĩstõ haau loriẽẽtĩĩ cugguung vẽlẽk. Aamẽn.
Currently Selected:
ꞌGalaaꞌthia 6: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
