ꞌGalaaꞌthia 4

1Haini naa thõõthaa cĩ nẽẽ, ma nga hĩdĩĩc loholeeca, aduhõõ hĩ appahaca thõng, tananga arigith loholeec õlõ cĩnĩĩng hatĩ adaak maaꞌnyia. 2Aꞌthũũnnĩ tilooyyiohiti loholeec, ĩꞌthõng hikia kõrra ꞌcĩ hatĩ aduhaanĩ maaꞌnyia aĩnnĩ, ũũppan loholeec ngaatĩ aggamĩ õlõ. 3Baa haattĩg naag ꞌJudeei buúk noho, baa hĩĩgĩn naag buúk appahacaaꞌnya nyattaalaa cĩ looc nicci hĩ lohollia ꞌcĩg hidiciẽẽgĩ.

4Ma baa õdõlan kõrra niccia dẽẽdẽ, ikia ĩꞌthõõa Nyekuci Ngeerĩnĩ, ꞌcĩ baa ũũkca ngaa baa aꞌthũũnnĩ nyattal cĩ Mũũꞌtha, 5hikia hõõgaeet ngagĩĩt nyattaalaa cĩ Mũũꞌtha, hĩĩtõ lõhõlĩ dĩdĩ ꞌcĩg harigith ꞌgii vẽlẽk õlõõ cĩ Nyekuci. 6Nẽẽthĩ, hĩnĩngĩtĩ hĩĩtõ naag lõhõlĩ cĩgĩnnĩg, ikia ĩꞌthõõa Nyekuci Lori cĩ Ngeerĩnĩ, hikia haau ꞌthinneetinii cĩggaac. Nẽ aduhaakeet Lorii cĩnnĩ anneekeet, “Ĩĩn Nyekuci Baangeet.” 7Nẽẽthĩ ꞌyioko, iittiõõ niig hõllõngaa iiginnu appahacaaꞌnya tarĩ, hĩnĩngĩtĩ iittu niig lõhõlĩ cĩg Nyekuci, nẽ hĩnĩngĩtĩ iittu lõhõlĩ cĩgĩnnĩg, iita ĩĩtõ hẽlẽggĩ cĩgĩnnĩg vẽlẽk cugguung.

Arrĩcana Paaulo eet cĩg ꞌGalaaꞌthia

8Baa hũnũũk, baa nga agaac niig Nyekuc, baa nga iiginnu niig appahacaaꞌnya cĩg hẽlẽggĩ ꞌcĩg aar eeta hĩĩtõ nyekuꞌnya. 9Nẽẽthĩ, hĩcĩ ꞌyioko agayyu niig Nyekuc ko, hode ĩꞌnya da hĩĩ naa, ikia agauung Nyekuci ngagiita, inni idiimit oboddiooth ĩĩtõ appahacaaꞌnya tarĩ cĩg loriẽẽt ꞌcĩg hõllõngaa attiran, ꞌcĩg abathĩ dtẽc cĩg looc nicci ho? 10Aꞌthuunnu niig korriook ꞌcĩg obbitig, hĩ nyĩlõhĩ hĩ irkiꞌnyia karramẽẽtĩĩ cĩg ꞌJudeei. 11Hiteelinnuung naa ngagiit, hĩnĩngĩtĩ haini, aaĩ hĩcĩ hatĩ hĩppĩĩraĩĩ dtiic caannĩ baa tiiri ho hĩ ngagiit haaga inni?

12ꞌGotoonoga hĩ ngoonoga, halayyuung naa ngagiit aaut hĩ naana, hĩnĩngĩtĩ, hikia haau naa buúk hĩ niiga. Nẽ nga ĩdĩmatteehaangu niig nganĩĩt thõõth ꞌcĩ abathĩ. 13Dĩdĩ, agayyu niig aĩ, baa hommoori naa baa hakuu hallimaneekuung nyeemuut ꞌcĩ abũnnaa ĩĩcĩ oou. 14Nẽ tananga baa hommoori gẽrrẽẽt, baa hõllõngaa aaꞌnyuung ngagiit mõõrĩthĩ caannĩ ꞌcannan nẽ tarĩ hõllõngaa appallaarannaangu hode iiggiayyiaangu thõng buúk. Baa akũmaneekaangu hinnia haau hĩcĩ akũmaneeku aajĩlõ cĩ Nyekuci, hode akũmaneeku Yeesu Krĩstõ dẽẽdẽ. 15Ũũk taliiniti baa gõõng haccamanõõthĩkĩ naag ĩĩna? Haga naa occa baa õttõccakaangu niig nganĩĩt hẽbẽrĩ cugguung hĩcĩnõõĩ naa waathinnioohĩĩ nĩĩcag, má baa hũbũna ngaatĩ occa adĩmannu noho. 16Hikia ꞌyioko hĩĩna naa mirohit cunuung ngaatĩ haduhaakuung thõõth ꞌcĩ ĩĩn dĩdĩ ho?

17Nẽ ꞌlimmanniooha ꞌcĩg ĩĩn oloꞌngiaak ꞌcĩg adiim alũllũmannuung ngagiit ko, hõllõngaa adiim bũnnai cunuung. Aĩ nẽẽg, hátĩ heꞌngerrio naag hĩ ngagiit nẽ iita elemtu thõõth cĩnĩĩng. 18Abũnnaa hatĩ gõõng aattiyyu hõdõõkõthĩ dĩkĩĩm nẽ ĩdĩmattu thõõth ꞌcĩ abũnnaa, tananga hĩĩ naa ꞌrẽẽn hĩ ngagiita. 19Lohollia cĩgannẽẽgĩ! Ahuccieeka nganĩĩt thõõth cunuung ꞌcĩ ũtũngteehu thõõth ꞌcĩ ĩĩn dĩdĩ, haau hĩ ngaa ꞌcĩ attur ꞌgoonnia nẽ aalla hatĩ huciithi ciee ĩꞌthõng iita elemit niig Yeesu Krĩstõ rũgẽtaa cunuung dĩdĩ. 20Nẽ hũbũranneeha hĩĩna, occa nuun nõõ aa hũrũmtĩ hĩ ngagiit hõdẽĩ ꞌyioko, hátĩ hĩĩ tarbal hĩ ngagiita. Nẽ ꞌyioko hĩcĩ nga haayyia ꞌrẽẽna ho, ẽrẽha thõõth ꞌcĩ occa hadĩmani buúk!

Hagaar hĩ ꞌThaara

21Ĩthĩktaangu dako niig nganĩĩt eeta ꞌcĩg adiimmu anuyyu nyattal cĩ Mũũꞌtha ho. ꞌYioko ꞌthẽk agayyu niig thõõth ꞌcĩ aduha nyattalĩ ho? 22Eheeddi ꞌBuuhaa cĩ Nyattaalõ aĩ, baa aꞌnyak Abũrahamĩ lõhõlĩ ꞌramma. Arritaak loholeec umwa ngaa ꞌcĩ ĩĩn appahaca nẽ ittira umwa ngaa cĩ olu.#Tigiil ꞌBuuk cĩ ꞌThianaattõ 16:15; 21:2 23Baa arrita ngaa ꞌcĩ ĩĩn appahaca ho loholeec cĩnnĩ, hĩgõõng hõdõõkõthĩ nẽ ittira ngaa cĩ olu ho loholeec cĩnnĩ, hĩ baa aduhaak Nyekuci Abũrahaamõ.

24Eterꞌtheekeet thõõth cĩ ngaaĩ ꞌcĩg ĩĩn ꞌramma ho, lõhõtnya ꞌramma cĩg Nyekuci. Ĩthakꞌthoothĩk Hagaarĩ ngaa baa ĩĩn appahaca Muur cĩ ꞌThĩnaĩ, nga baa au ĩĩnĩ eeta appahacaaꞌnya cĩg nyattal cĩ Mũũꞌtha ĩĩcĩ oou. 25Nẽẽthĩ ꞌyioko, ĩthakꞌthoothĩk Hagaarĩ Muur cĩ ꞌThĩnaĩ ꞌcĩ aaĩ looccaa cĩ Arabia nẽ ĩthahĩthoothĩk eet cĩg ꞌJeruꞌthalẽmĩ, hĩnĩngĩtĩ ĩĩn nẽẽg hĩ lõhõlĩ cĩgĩnnĩg vẽlẽk appahacaaꞌnya cĩg nyattaalak. 26Nẽ ĩthakꞌthoothĩk ꞌThaara ngaa cĩ olu ho, ꞌJeruꞌthalẽm cĩ hẽẽtkujjieen nẽ ĩĩn nẽẽ morwahit cĩnaac. 27Thõõth baa aduha põrõvẽtaacĩ Iꞌthaia ho niccia, baa õthõõth aĩ,

“ꞌCammanoothĩk nii ngaa

ꞌcĩ aitiõõ lohollia tõõ ho!

Bẽẽn tẽgẽl cĩ taliitto moloohaa cobbi,

tananga nga ꞌtira loholeec umwa,

hĩnĩngĩtĩ aꞌnyak ngaa baa aitiõõ lohollia tõõ ho,

lõhõlĩ ꞌcĩg ĩllõõan ꞌgõõnĩ baa aꞌnyak maaca.”#Tigiil ꞌBuuk cĩ Iꞌthaia 54:1

28Nẽ niig ꞌgotoonoga hĩ ngoonoga, iittu niig lõhõlĩ ꞌcĩg aduhoonnu hĩ Iꞌthaako#4:28 Iꞌthaako: Baa ĩĩn Iꞌthaako ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. thõng, hĩ thõõth baa aduha Nyekuci. 29Baa kõr niccia, loholeec ꞌcĩ arrittiaa hĩ gõõng hõdõõkõthĩ, ikia accanan loholeec ꞌcĩ arrittiaa ꞌtirriaanaa cĩ Lori ꞌcĩ Ẽllẽẽmĩthĩ. Nẽẽthĩ ꞌyioko, aaĩ thõõth ciee buúk noho. 30Ma ꞌBuuhi cĩ Nyekuci aĩ ne? “Tiggia appahaca nicci hĩ ngeerĩnĩ vẽlẽk hõõt, hĩnĩngĩtĩ aitiõõ loholeec cĩ ngaa icci hõllõngaa occa õthõl hĩ loholeec caannĩ baliinit ꞌcĩ hatĩ arigith ngeertĩ ngaa cĩ olu ho.”#Tigiil ꞌBuuk cĩ ꞌThianaattõ 21:10 31Nẽẽthĩ, ꞌgotoonoga hĩ ngoonoga, iittiõõ hõllõngaa hĩĩgĩn naag lõhõlĩ cĩg ngaa ꞌcĩ ĩĩn appahaca ho, hĩĩtõ naag lõhõlĩ cĩg ngaa cĩ olu ho.

Currently Selected:

ꞌGalaaꞌthia 4: did

Highlight

Copy

Compare