Dtiicanĩ cĩg ꞌThooyyiahu 21

Ũũk Paaulo ꞌJeruꞌthalẽma

1Ma baa heꞌngerriooa huciitha, hiita hoottia ĩĩcĩ bũlũcõ nẽ hotoddia haahũl hedeccieeha ꞌtaaũnaa ꞌcĩ haĩ Koth. Ma waathĩn ꞌcĩ ꞌrĩĩng, hoottia ĩcĩ ꞌtaaũn cĩ ꞌRoode, ma nĩngaata, hoyoyyorria ĩꞌthõng ꞌtaaũn cĩ Patara. 2Nĩngĩtĩ hõõ hammũdaanna haahũl ꞌcĩ õkõ ĩcĩ looc cĩ Venicia nẽ hotoddia hoottia. 3Ma urutaa ꞌcĩ hedeenyoꞌtha dtuung cĩ Ciporo ꞌcĩ aaĩ bũlũca hõrggẽẽna nẽ hẽꞌngẽrkẽẽthatta hoottia ĩĩcĩ hujjieen, hedeccieeha ĩꞌthõng looc cĩ Thiiria. Ma ho, hõõt hibillia ꞌtaaũnaa cĩ ꞌTire ngaatĩ baa õkõ adhuhaanĩ haahũlĩ cĩnaang ko ijjio. 4Ma baa hõõ hammũdaanna nuyyiook ũgĩ ĩĩca ho, hũrũmteea nõõ hĩ ĩhõõggõ lomidika hõdẽĩ. Loriiaa ꞌcĩ Ẽllẽẽmĩthĩ, baa irrioonĩk nẽẽg Paaulo hiittiõõ hõllõngaa õkõ ꞌJeruꞌthalẽma. 5Ma baa ũttũbattoothĩk waathinniooha cĩggaang, hoottia hedeccieeha ꞌgõõlaa cĩnaang tarĩ. Baa ittioonĩkeet eeta ngaaĩnĩ hĩ lõhõlẽẽnĩĩ cĩggĩĩng vẽlẽk ꞌtaaũnatõõ battaala. Ma baa õdõlatteet dẽmẽt cĩ bũlũcõ, hiita hakattia huruꞌnyia nẽ halayyiooa. 6Ma baa hĩꞌthaayyioa ẽlẽk, hottoddia naag haahũl nẽ oboddioothĩ nẽẽg buúk olooyyiohĩĩ cĩggĩĩng.

7Nĩngĩtĩ hõtõdda haahũl ꞌtaaũnaa cĩ ꞌTire nẽ hoottia hulluucciawa ꞌtaaũnaa cĩ Tolemai, ngaatĩ baa hĩꞌthaayyia nuyyiook nẽ hũrũmteea nõõ hĩ ĩhõõggõ waathĩn hõdẽẽthõng. 8Ma loohoth cĩnnĩ, hĩtĩngaayyia hoottia ꞌtaaũnaa cĩ Caetharea nẽ hoottia hiyyiomatta õlõõ cĩ Pilippo ꞌlimmannioohit cĩ thõõth cĩ Nyekuci. Baa ꞌthẽk ĩnõõnnõ baa eberriaa hĩ eet baag ĩĩn tũkĩramma,#21:8 Eet tũkĩramma: Tigiil thõõth cĩ eet ꞌcĩg ĩĩn tũkĩramma ho ꞌBuuhaa cĩ Dtiicanĩ cĩg ꞌThooyyiahu 6:1-6. baag ẽẽl ꞌthooyyiak. 9Baa aꞌnyak nẽẽ lõhõlĩ cĩgĩnnĩg ꞌcĩg nga ĩĩn buheeci ꞌcĩg ĩĩn põrõvẽtaaꞌnya.

10Baa hattiyyia naag Caetharea waathinniook ꞌcĩg mẽẽlĩg. Ma ho, uppwaannaheet põrõvẽtaacĩ umwaa ꞌcĩ haĩ ꞌthaar Agabu ꞌcĩ aku looccaa cĩ ꞌJudeea. 11Ma nĩngaata, ittiha hadẽẽngõ cĩ Paaulo nẽ ẽcẽbĩ athĩn hĩ ꞌthõõ cĩgĩnnĩg. Nĩngĩtĩ mĩĩ anneekeet ngagĩĩt nẽẽ, “Aduha Lorii ꞌcĩ Ẽllẽẽmĩth aĩ, ‘Aattĩg hatĩ makayyiooha ũgẽẽgĩ cĩg ꞌJudeei ꞌJeruꞌthalẽma nẽ ecebit baattĩ hadẽẽngõ icci. Nẽ tarĩ, hátĩ aanytĩk ĩnõõnnõ eet ꞌcĩg hõllõngaa ĩĩn ꞌJudeei.’ ”

12Ma baa uduha Agabu thõõth icci ẽlẽk, hĩĩlallieeha naag hĩ nuyyiook ꞌcĩg baag aattĩg nĩngaata Paaulo, hiittiõõ hõllõngaa õkõ ꞌJeruꞌthalẽma. 13Anneekeet hinnia Paaulo nẽẽ, “Inni urruuyyio ĩꞌthõng uduullaangu ꞌthĩnĩt caannĩ ho? Helemi naa ngaatĩ hecebiini baabuutha nẽ hadaaha, hĩnĩngĩtĩ ꞌthaar cĩg Makayyioohit Yeesu. Hẽlẽma naa ngaatĩ hadaaknĩ, hĩnĩngĩtĩ Yeesu ꞌJeruꞌthalẽma!” 14Ma baa anyamũtanaaeet Paaulo, hitiktoothĩha looc nẽ halayyiooa hĩĩtta, “Aꞌnyĩĩk tabiinit cĩ Makayyiookto hĩdĩmanĩ.”

15Nĩngĩtĩ hakũmanoothĩka nẽ hoottia ꞌJeruꞌthalẽma. 16Ma ho, ittiootteet nuyyiooha ũgẽẽgĩ cĩg Caetharea nẽ aꞌnyaktaaeet ĩꞌthõng halang cĩ eet umwa ꞌcĩ haĩ ꞌthaar Mĩnaathon, ꞌcĩ baa hooyyia haattiyyia. Baa ĩĩn nẽẽ eet cĩ Ciporo nẽ baa ũnũũhĩk ngaatĩ ĩĩnnĩ nuyyioohit nganĩngĩtĩ baarkit.

Aggamĩ Paaulo ꞌJeruꞌthalẽma

17Ma baa hõdõlatta ꞌJeruꞌthalẽm, iita atallieet nuyyiooha cĩg Makayyiooktak gẽrrẽẽt. 18Ma baa kõr ꞌcĩ ꞌrĩĩng, hookorria naag vẽlẽk hĩ Paaulo hõõt hĩcĩtta ꞌJeemith nẽ baa aattĩg makayyiooha vẽlẽk tõõ. 19Ĩꞌtha Paaulo ĩhõõggõ nẽ uduhaak ꞌgõõl ꞌcĩ baa adticaniini Nyekuci ĩnõõnnõ, hẽẽl eet ꞌcĩg hõllõngaa ĩĩn ꞌJudeei.

20Ma baa athĩhĩ eeta vẽlẽk thõõth icci ho, iita atalit Nyekuc gẽrrẽẽt. Ma ho, ĩĩttĩk Paaulo, “ꞌGõtõna, cĩĩn nõõ ꞌgõõl ꞌcĩ au ĩĩnnĩ eeta cĩg ꞌJudeei ꞌcĩg ĩĩn aalibꞌnya ꞌcĩg mẽẽlĩg ko nuyyiook! Nẽ aalla aꞌthũũnnĩ Nyattal cĩ Mũũꞌtha gẽrrẽẽt. 21Baa adukiaak lemmiook cĩg ꞌJudeei ꞌJeruꞌthalẽma ngaati aĩ, allimani nii eet ꞌcĩg ꞌJudeei ꞌcĩg arũmĩ hĩ eet ꞌcĩg hõllõngaa ĩĩn ꞌJudeei vẽlẽk, hũtũngteek nyattal cĩ Mũũꞌtha. Nẽ tarĩ ĩthĩhĩt aĩ, allimaneehi nii ĩhõõggõ hiittiõõ hõllõngaa ẽttẽẽd eleeti ꞌcĩg lõhõlĩ cĩggĩĩng ꞌcĩg maacĩg, hode hiittiõõ hõllõngaa anũ nyeppiteeꞌnya cĩg ꞌJudeei. 22Hadĩman ꞌyioko hatĩ hutuno? Athĩhĩ hatĩ nẽẽg ngaatĩ ikiaaĩ niina, 23nẽẽthĩ, dĩman nii ꞌgii ꞌcĩ haduhaaki naaga. Harũmeenna naag hĩ eet ꞌwec ꞌcĩg baag abũtan lõbũtĩ. 24Bĩtĩ eet iccig, õõt ũtũũnyĩt eleeti cugguung hĩ ĩhõõggõ nẽ ũdũmanuu ꞌrabbẽẽt cĩg tũhũũcẽttaak, hátĩ hutuhuucci nẽẽgĩ. Nẽẽthĩ hatĩ iita agaacõ eeta ngaatĩ ĩĩnnĩ thooꞌthioha ꞌcĩg adukiaa hĩnĩngĩtĩ nganiit ko, õlõng nẽ ꞌthẽk hatĩ iita agaacõ nẽẽg ngaatĩ anũĩ nii nyattal. 25Baa heteheeddiha naag waraga lemmiook ꞌcĩg hõllõngaa ĩĩn ꞌJudeei, hátĩ hũtũngteek ngaatĩ adahĩ ꞌgẽẽn ꞌcĩ aaꞌnyĩhoothĩk hẽlẽggĩ ꞌcĩg aar eeta hĩĩtõ nyekuꞌnya, hĩ ngaatĩ aamĩ biyyi hĩ ngaatĩ adahĩ idiꞌngwa ꞌcĩg acudi thõng, hĩ ngaatĩ attihi ngaaĩ cĩg eetuk tahatak.”

26Ma baa loohoth cĩnnĩ, ũũhĩ Paaulo eet ꞌcĩg ĩĩn ꞌwec ko, nẽ õõt ũtũũnyĩtõ hĩ ĩnõõnnõ eleeti hõdẽĩ. Nĩngĩtĩ õkõõyyĩ ꞌCieethaa cĩ Nyekuci hũũk huduha kõr ꞌcĩ hatĩ edecciaanĩ waathinniooha cĩg tũũnyẽttaak, hátĩ hĩdĩmanĩ ꞌgaarrieeniti cĩnĩĩng hõdẽĩ hõdẽĩ.

Aggamĩ Paaulo

27Ma baa õbõktĩ edeccia waathinniooha tũkĩramma, iita udtuukta eeta cĩg ꞌJudeei ũgẽẽgĩ cĩg dhoorit cĩ Aaꞌthia Paaulo ꞌCieethaa cĩ Nyekuci. Ma ho, ũlũtĩ lothippiti, nĩngĩtĩ aggami ĩnõõnnõ, 28nẽ urruuyyioĩ ĩĩtõ, “Eeta cĩg Ĩꞌthĩraẽlĩ, eellieetu! Eet gõõng alliman eet vẽlẽk lokor nicci thõõth ꞌcĩ abathĩ hĩ eet cĩggaac hĩ nyattal cĩnaac, hĩ halang cĩ ꞌCieeth icci Nyekuci ho cieeni. Aꞌnyaha nẽẽ ngaaoni ngaatĩ aduknaanĩ eet ꞌcĩg ꞌGirihi ngaatĩ aꞌngirannii ꞌCieethaa cĩ Nyekuci nẽ ẽꞌthẽcan nĩngĩtĩ ẽllẽẽmĩth ko.” 29Baa udtuukta nẽẽg Torovimo, eet cĩ ꞌtaaũn cĩ Eevvetho baa ĩĩcĩ oou ꞌtaaũnaa cobbi, õõkõr hĩ Paaulo nẽ ummuhutteek ngaatĩ aꞌnyahaaĩ mõnõ Paaulo ĩnõõnnõ halangatõõ cĩ ꞌCieeth cĩ Nyekuci thõng.

30Ma ho, ĩꞌthanothoothĩk thõõth ꞌtaaũn hũtũrũũr, nĩngĩtĩ alubaanĩ eeta lõmmẽrrẽẽt vẽlẽk, hiita haggamit Paaulo nẽ utugurriaak ĩnõõnnõ ꞌCieethaa cĩ Nyekuci battaala nẽ ũꞌnyũũgĩtõ hattũũgẽt nĩĩcĩ noho. 31Ma baa nga aĩ hurukta nẽẽg Paaulo, ikia õdõlan nyeemuut ꞌgaalac cobbi cĩ ũũrũta cĩg ꞌRooma,#21:31 ꞌGaalac cobbi cĩ ũũrũta: Ĩĩn ꞌgaalacĩ cobbi makayyioohit ꞌcĩ aggam ũũrũta aalib hõdẽĩ. aĩ ĩĩ maka ꞌyõyyõhĩ ꞌJeruꞌthalẽma ĩttõõ. 32Nĩngĩtĩ ĩꞌngaannĩ ꞌgaalacĩ cobbi hĩdĩĩkoothong hĩ ꞌgaala#21:32 ꞌGaalac: Ĩĩn ꞌgaalacĩ hõdẽẽthõng ꞌcĩ aggam athegereeꞌnya ꞌmiia hõdẽĩ. hĩ athegereeꞌnya, hivvirrioothĩk lothippit. Ma baa adtuuha lothippiti ꞌgaalac cobbi hĩ ũũrũta ho, ĩbĩlĩt ngaatĩ uuki Paaulo.

33Ma ho, ikia ꞌgaalacĩ cobbi ho nẽ aggam Paaulo nẽ uduhaak athegereeꞌnya hecebit ĩnõõnnõ nyerikooꞌnyanĩĩ ꞌcĩg obbitig ꞌramma. Nĩngĩtĩ ajini ĩnõõnnõ nganĩ nẽẽ nẽ ꞌgii tĩhathini ꞌcĩ hatĩ ẽꞌthẽcan nẽẽ ho. 34Baa awacak lothippiti ĩĩcĩ odoyyii thõõth hõdẽẽthõng nẽ tarĩ awacahit ũgẽẽgĩ ꞌgõõla umwaanĩ. Baa hõllõngaa ammũda ꞌgaalacĩ cobbi thõõth ꞌcĩ ĩĩn dĩdĩ, hĩnĩngĩtĩ wacahõõn. Nĩngĩtĩ aduhaakĩ ꞌgaalacĩ cobbi athegereeꞌnya hootti Paaulo õlõõ cĩ ũũrũta. 35Ma baa õbõktõ nẽẽg hĩ hattũũg cĩ õlõ cĩ ũũrũta, ikia aꞌngaꞌngar lothippiti gẽrrẽẽt nĩngĩtĩ irrionganĩ ũrũtana Paaulo thõng. 36Baa ẽggẽrẽny lothippiti ꞌcĩ anuoothi Paaulo aĩ, “Uruhit ĩnõõnnõ thõng! Uruhit ĩnõõnnõ thõng!”

Ẽtẽõõĩ Paaulo ẽlẽ cĩnnĩ

37Ma nga aĩ huduhutta ũrũtana Paaulo halangatõõ, ikia ijin Paaulo ꞌgaalac cobbi ĩĩnnĩk, “Ĩcca occa nõõ hõllõngaa aꞌnyaa hothooꞌthio hĩ nganiita?”

Ẽdẽcĩ ꞌgaalacĩ cobbi anneek, “Othoothi nii ꞌGiriheeyyi? 38Hõllõngaa nooyyia ĩĩnĩ nii Ijjibeenit baa attiha jore nẽ ũũhĩ ꞌloorriak aalibꞌnya ꞌwec (4,000) horrwaa ꞌcĩ õdõhõhĩĩ kak baa nĩnga?”

39Ẽdẽcĩ Paaulo anneek, “Hĩĩnĩ naa ꞌJudeeinit nẽ harittia ꞌtaaũnaa cobbi cĩ ꞌTaartho looccaa cĩ ꞌCilicia. Ẽlẽ aꞌnyaa baaĩ nuun hothooꞌthioa hĩ eeta.”

40Ma baa ẽlẽmaahĩ ꞌgaalacĩ cobbi ĩnõõnnõ hõthõõth, ikia ĩbĩl Paaulo hattũũgaa nẽ ĩꞌtha eeta. Ma baa ijjiaaki eeta ho, othoothĩk ĩhõõggõ Aramaayyi,

Currently Selected:

Dtiicanĩ cĩg ꞌThooyyiahu 21: did

Highlight

Copy

Compare