Dtiicanĩ cĩg ꞌThooyyiahu 22

1“ꞌGotoonoga hĩ nyakangaaꞌnya, ĩthĩhĩt da thõõth ꞌcĩ aĩ hẽẽlanĩĩ naa ẽlẽ ho.” 2Ma baa athĩhĩ lothippiti ngaatĩ õthõõthĩ Paaulo Aramaayyi ho, iita ĩjjaaktõ hĩĩ lõõcĩ ꞌthĩĩ.

Nĩngĩtĩ aĩnnĩ Paaulo, 3“Hĩĩnĩ naa ꞌJudeeinit ꞌcĩ harittia ꞌtaaũnaa cĩ ꞌTaartho, looccaa cĩ ꞌCilicia, nẽẽthĩ, baa halĩꞌtha ꞌtaaũnaa cĩ. Baa hĩĩnĩ naa loholeec cĩ ꞌthukuul cĩ ꞌGamalieelĩ ꞌcĩ hallimannia nyattaalaa cĩ nyakangaaꞌnya cĩggaac. Nẽ dĩdĩ, haccamanaa naa buúk Nyekuc haau hĩcĩ accamanaannu niig kõr nicci ho. 4Huruha naa nuyyiook ꞌcĩg mẽẽlĩg gẽrrẽẽt ꞌcĩg anũ ꞌgõõl cĩ Makayyiookto. Haggami ngaaĩ hĩ eet ꞌcĩg maacĩg vẽlẽk haarĩk baabuuth, 5nẽ occa ꞌthẽk aduhaakuung paadĩrĩ cobbi hĩ makayyiook cĩg lokihooak, ngaatĩ ĩĩnnĩ thõõth ciee dĩdĩ. Baa ꞌthẽk aaꞌnya nẽẽg nganĩĩt waragẽẽt haꞌnyahoothĩk ꞌgõõnõgĩ ꞌcĩg ĩĩn makayyiook cĩg ꞌJudeei Damaathĩko, hũũk haꞌnyaha eet iccig hiita hĩĩtõ baabuuthnya ꞌJeruꞌthalẽma.

6“Ma baa aau kõrra lokora, baa hikia hoboktooa hĩ Damaathĩko, udhukiaaha lanyit umwaa ꞌcĩ attaalĩth gẽrrẽẽt hẽẽtahujjieen. 7Ma ho, hĩcĩna haaga hẽttẽẽda looc nẽ hĩthĩha molook ꞌcĩ anneeka, ‘ꞌThaaulo! ꞌThaaulo! Arukaa nii nganĩĩt inni?’

8“Nĩngĩtĩ hajini hannẽẽkĩ, ‘Nganiit nganĩ Makayyioohit?’

“Ẽdẽcca anneeka, ‘Nganĩĩt Yeesu cĩ Naaꞌtharẽtĩ, ꞌcĩ aruhi nii ho.’ 9Baa adtuuha eeta ꞌcĩg hõõkõrra hĩ nganĩĩt buúk lanyit, nẽẽthĩ hinnia, hõllõngaa athĩhĩ molook cĩ eet ꞌcĩ othoothĩkaa nganĩĩt ko.

10“Ma ho, hijina hĩĩnnĩha, ‘Hĩdĩman ꞌyioko hutuno Makayyioohit?’

“Ẽdẽcĩ anneeka, ‘Tĩnga nẽ uuhu Damaathĩko. Õkõ hatĩ adukiaaki ꞌgii ꞌcĩ adticani ĩĩca.’ 11Ma nĩngaata, itiꞌthittiaa eeta cĩgannĩg baag hõõkõrra ho ĩꞌthõng Damaathĩko, hĩnĩngĩtĩ ũttũhũl lanyit hẽbẽrĩ cĩgannĩg hĩĩtõ rubettĩg.

12“Ma ho, uppwaanna eet umwaa ꞌcĩ haĩ Anania hikia hĩcĩnaanĩ. Baa ĩĩn ẽẽtĩ ciee eet ꞌcĩ aꞌthũũnnĩ nyattal nẽ itingolli eeta cĩg ꞌJudeei vẽlẽk ꞌcĩg aattĩg ngaatĩho. 13Nĩngĩtĩ aku abĩllĩ nẽẽ ngaatĩ haayyi ho nẽ ĩĩ, ‘ꞌGõtõna ꞌThaaulo, cĩnĩ!’ Ma ꞌthẽk nĩngaata noho, hĩcĩna ĩnõõnnõ!

14“Nĩngĩtĩ anneeka, ‘Ẽbẽraai Nyekuci cĩ hĩbaangĩ cĩggaac nganiit gaa tabiinit cĩnnĩ, hátĩ cĩĩn Eet ꞌcĩ Abũnnaa nẽ ithihu molook cĩ ũtũg cĩnnĩ. 15Ĩĩnĩ hatĩ nii hebereec cĩ eet vẽlẽk, hĩ cĩ thõõth ꞌcĩ baa acini nẽ ithihu ho. 16Nẽẽthĩ, ne ꞌyioko ꞌcĩ nga ẽrẽ nii ho? Tĩnga ꞌgaam baattithimo nẽ utuunyu ꞌthẽccanẽẽt cugunnig nẽ alau Makayyioohit.’

17“Ma baa hõbõda ꞌJeruꞌthalẽma nẽ halaõ ꞌCieethaa cĩ Nyekuci ho, hakuu hinnia hadtuuha Makayyioohit 18nẽ uduhaaha ĩĩnnĩhaa, ‘Tĩnga hĩdĩĩkoothong tũngeek ꞌJeruꞌthalẽm, hĩnĩngĩtĩ abũrĩ eeta thõõth caannĩ ꞌcĩ allimani nii ho.’

19“Hedeci hanneehi, ‘Makayyioohit, aga eeta cieeg, baa gõõng hoyoyyori naa ꞌCieethinii cĩg Laiittak, hababuuthan nẽ huuka eet ꞌcĩg elemmi nganiita. 20Baa aruhi Tẽẽvẽnõ, baa habili naa nĩngaata ngadiiha, hĩcĩneek ĩnõõnnõ daahĩth nẽ hẽbẽha ceremwa cĩg eet ꞌcĩg aruk ĩnõõnnõ ho.’

21“Nĩngĩtĩ anneeka Makayyioohiti, ‘Bĩtõ, hĩꞌthooyyii naa nganiit bĩĩt hĩ eet ꞌcĩg hõllõngaa ĩĩn ꞌJudeei.’ ”

Ĩĩn Paaulo eet cĩ ꞌRooma

22Baa athĩknĩ lothippiti ĩꞌthõng hẽdẽcaak Paaulo thõõth icci. Ma ho, iꞌthiattaaĩ awacahit ĩĩtõ, “Ammanyattõõĩ eet icci! Hõllõngaa ꞌthẽk occa arũgĩ!”

23Ma baa eggerenyit eeta huppuruccia ceremwa ꞌcĩg ahimit eleetinii nẽ utuwaanyito tuduhaac, 24ikia uduhaak ꞌgaalacĩ cobbi cĩ ũũrũta athegereeꞌnya hootti Paaulo õlõõ cĩ ũũrũta, hũũk huuki thõng. Baa adĩman nẽẽ thõõth icci, hátĩ hũmmũda eggerꞌnyeek eeta Paaulo hoti inni. 25Ma baa nga ẽcẽb ũrũtana Paaulo hátĩ huuki, ijin nõõ Paaulo ꞌgaalac cĩ ũũrũta ĩĩnnĩk, “ꞌYioko nooyyia ꞌthẽk abũnnaa ngaatĩ occa uuki nii eet cĩ ꞌRooma, nga hedeeꞌnyia thõõth ꞌcĩ aggamiini ho buúk?”

26Ma baa athĩhĩ ꞌgaalacĩ thõõth icci ho, ũũk hĩ ꞌgaalac cobbi cĩnĩĩng nẽ ijin ĩnõõnnõ ĩĩnnĩk, “Ne ꞌcĩ adĩmani nii hoti ho? Ma ꞌcĩ ĩĩn ẽẽtĩ caa eet cĩ ꞌRooma ho!”

27Ma ho, ũũk ꞌgaalacĩ cobbi ho hĩ Paaulo nẽ ijin ĩĩnnĩk, “Duhaahaa da, ĩĩnĩ nii eet cĩ ꞌRooma dĩdĩ?”

Ẽdẽcĩ Paaulo anneek, “Eei.”

28Nĩngĩtĩ aĩnnĩ ꞌgaalacĩ cobbi, “Baa hadũmani naa ꞌrabbẽẽt ꞌcĩg mẽẽlĩg hikia hĩĩ eet cĩ ꞌRooma.”

Baa aduhaak Paaulo ĩnõõnnõ anneek, “Nẽẽthĩ, baa harrittia naa hĩĩnĩ eet cĩ ꞌRooma.”

29Nẽ eeta ꞌcĩg baag aĩ hijitta Paaulo, eejehit ĩĩcĩ uruto. Nĩngĩtĩ abarti ꞌgaalacĩ cobbi ẽmmẽn, baa ikia agaõõthĩ ngaatĩ ẽcẽbĩ eet cĩ ꞌRooma.

Ootti eeta Paaulo lokihooa

30Ma baa kõr ꞌcĩ ꞌrĩĩng, idiim ꞌgaalacĩ cobbi ũmmũda, inni ꞌthẽk hibilli eeta cĩg ꞌJudeei Paaulo ho. Ma ho, õõga ĩnõõnnõ nẽ ũlũta makayyiook cĩg paadĩrꞌnyaannu hĩ ꞌgaala cĩg lokihooak vẽlẽk ngaatĩ hõdẽẽthõng. Nĩngĩtĩ aꞌnyahaanĩ Paaulo hikia hĩbĩl hẽbẽrẽẽnnĩĩ cĩggĩĩng.

Currently Selected:

Dtiicanĩ cĩg ꞌThooyyiahu 22: did

Highlight

Copy

Compare