Dtiicanĩ cĩg ꞌThooyyiahu 20

Ũũk Paaulo Maccedoonia hĩ ꞌGirihi

1Ma baa edeccia ꞌgẽrẽnyõõnĩ, ũtũvva Paaulo nuyyiook nẽ irrioonĩk ĩhõõggõ nẽ ũkũtan huꞌthuutti lemiinit. Nĩngĩtĩ ĩꞌthaaĩ ĩhõõggõ vẽlẽk nẽ ũũk looccaa cĩ Maccedoonia. 2Baa õyõyyõr nẽẽ looc niccia, aduhaakĩ eet thooꞌthiok ꞌcĩg akũtan ĩhõõggõ huꞌthuutti lemiinit nẽ ma uruta ikia õdõlan ꞌGirik, 3ngaatĩ baa aku aayyi nyĩlõhĩ iyyio. Baa adiim Paaulo õtõd haahũl hũũk ĩĩcĩ Thiiria. Nẽẽthĩ hinnia, baa atuhan makayyiooha ũgẽẽgĩ cĩg ꞌJudeei, ꞌgõõl ꞌcĩ atab aruhi Paaulo. Hĩnĩngĩtĩ thõõth icci, ikia õbõdõõthĩ Paaulo ꞌgõõlaa cĩ Maccedoonia. 4Baa õõkõr nẽẽ hĩ eet ꞌcĩ haĩ Thopater ngeertĩ eet ꞌcĩ haĩ Piru ꞌcĩ aku ꞌtaaũnaa cĩ Berea, hĩ eet ꞌcĩ haĩ Arithtarko hĩ eet ꞌcĩ haĩ ꞌThekondo ꞌcĩg au ꞌtaaũnaa cĩ Tẽꞌthaloonika. Baa aaĩ eet umwaa tõõ, ꞌcĩ haĩ ꞌGaio ꞌcĩ aku ꞌtaaũnaa cĩ ꞌDerbe nẽ baa aaĩ Timotteeo buúk. Nẽ baa ĩĩ Ticiko hĩ Torovimo ꞌcĩg baag au looccaa cĩ Aaꞌthia. 5Baa uwwattĩ lõggõõ cieeg ĩĩcĩ oou, hõõt hereeyyieet ngagĩĩt ꞌtaaũnaa cĩ Tõrõa. 6Ma urutaa cĩ Karrama cĩ Ũbũnẽẽt ꞌcĩg aitiõõ Abũũlana tõõ, hotoddia haahũl ꞌtaaũnaa cĩ Pilippi. Ma urutaa cĩ waathinniook ꞌtur, hommottiooa hĩ ĩhõõggõ ꞌtaaũnaa cĩ Tõrõa nẽ haauttia ĩĩca lomidika hõdẽĩ.

Heeroni cĩ Paaulo ꞌcĩ adtuurna

7Ma lomidikaawa, hiita homottiooa naag vẽlẽk hĩ lemmiook ngaatĩ hõdẽẽthõng nẽ hiita hudukta ꞌgẽẽn cĩ Makayyiookto ꞌcĩ adtuurna. Baa irrioonĩk Paaulo eet ĩꞌthõng hẽttẽẽdĩ baalini, hĩnĩngĩtĩ ĩꞌngaathĩ hatĩ nẽẽ loohoth cĩnnĩ. 8ꞌCieethaa lokora ꞌcĩ baa homotoonna ho, baa attũllĩ ꞌlõõmẽẽta ꞌcĩg mẽẽlĩg gẽrrẽẽt. 9Baa iccioloongan nyahaappanĩ umwaa ꞌcĩ haĩ ꞌthaar Eutiko hutula. Ma baa nga irrioon Paaulo, adũngĩ hinnia nyahaappanĩ ciee, nĩngĩtĩ oongiyyi. Ma nĩngaata, udhukia Eutiko ũꞌnyaahĩtõõ ꞌcieetha lokoraa ꞌcĩ atattaddi tabattĩ iyyio ĩꞌthõng looc. Ma baa au õdõng eeta ĩnõõnnõ ho, adaak nĩĩcĩ noho ꞌthẽl. 10Nĩngĩtĩ allũũcẽnĩ Paaulo hũũk hĩcĩn Eutiko loota. Arabũũt ĩnõõnnõ athĩnĩĩ cĩgĩnnĩg nẽ ĩĩ, “Hõlõ, ma hiꞌngoliinnu! Nga arũgĩ Eutiko.” 11Ma urutaa ꞌcĩ õbõdõõthĩ Paaulo ꞌcieethaa lokora, ikia appak ũbũnĩ nẽ huduktooa hĩ ngagĩĩta. Nĩngĩtĩ irriõõnĩ ĩꞌthõng hĩꞌngõtha kõrra lokora nẽ ũũha. 12Ma ho, ootti nuyyiooha nyahaappan õlõ rũgẽtẽẽt nẽ baa accamanoothĩk nẽẽg gẽrrẽẽt.

Ĩꞌtha Paaulo makayyiook cĩg Eevvetho

13Baa õvvõ Paaulo ꞌthõõnĩ ĩꞌthõng ꞌtaaũn cĩ Athothĩ. Baa nẽẽ hutuwatteea naag ũgẽẽgĩ haahũla, nĩngĩtĩ hõõ hõthõhõtta ĩnõõnnõ haahũla ngaatĩho. 14Ma baa hõõt hommottiooa hĩ ĩnõõnnõ Athotha, ikia õtõda haahũl nẽ hedeccieeha ꞌtaaũnaa cĩ Mitileene. 15Ma loohoth cĩnnĩ, hiita hõdõlatta nĩngĩtĩ õbõhõõ hĩ ꞌtaaũn cĩ Kiothĩ. Ma kõr ꞌcĩ ꞌrĩng tarĩ, hiita hõdõlatta ꞌtaaũn cĩ Thamo. Ma urutaa cĩ waathĩn niccia, hoottia ĩcĩ ꞌtaaũn cĩ Mileeto. 16Ma ho, ikia ummuk Paaulo ꞌgõõl ꞌcĩ abũrrĩ ngaatĩ õkõõĩ ĩcĩ ꞌtaaũn cĩ Eevvetho, hĩnĩngĩtĩ baa abũrĩ nẽẽ ngaatĩ õkõ aayyi looccaa cĩ Aaꞌthia ĩꞌthõng. Baa aaburii ĩnõõnnõ ꞌthoona gẽrrẽẽt, hĩnĩngĩtĩ baa adiim õdõlan nẽẽ ꞌJeruꞌthalẽm nga hikia Karrama cĩ Waathinniook Hẽẽn ꞌTur.

Ĩꞌthaayyik makayyiooha cĩg lemmioohu Paaulo ꞌgõõl

17Ma Mileeto, ĩꞌthooĩk Paaulo nyeemuut makayyiook cĩg lothippit cĩ lemmiook cĩg Eevvetho. 18Ma baa au õdõlan nẽẽg Mileeto ho, ĩĩnnĩk Paaulo ĩhõõggõ, “Agayyu niig ꞌgõõl ꞌcĩ baa haayyi naa baa harũmĩ ĩĩcĩ oou, iꞌthianaanĩ kõr baa nga hakuuni naa dhoortaa cĩ Aaꞌthia thõng. 19Hadticanoothihi naa Makayyioohit tamaatitta hĩ ꞌgõõlaa ꞌcĩ hõllõngaa hamaacĩ eet ũgĩ nẽ hẽtẽmẽẽtha ꞌtĩmman ꞌcĩ adiim aruka eeta cĩg ꞌJudeei. 20Baa agayyu niig buúk hõllõngaa haburi naa ngaatĩ hallimanĩĩ thõõth umwa ꞌcĩ eelluung ngagiita. Nẽẽthĩ, baa hallimanni naa eet hoyoyyori ꞌcieethini vẽlẽk. 21Baa hilooti naa eet cĩg ꞌJudeei hĩ ꞌGirik helemit Nyekuc nẽ ũtũngteek ꞌthẽccan nẽ elemit Makayyioohit cĩnaac Yeesu.

22“Aitiõõ naa hõllõngaa haga ꞌgii ꞌcĩ hatĩ õkõ edeeꞌnyiakaa nganĩĩt ꞌJeruꞌthalẽma, nẽẽthĩ, hadiim hathihi naa thõõth hĩ Lori ꞌcĩ Ẽllẽẽmĩth, nẽ hũũha ĩĩca. 23Haga naa ꞌtaaũnnioohĩ vẽlẽk, aduhaaka Lorii ꞌcĩ Ẽllẽẽmĩth aĩ, ẽrẽẽyya nganĩĩt baabuuthi hĩ ꞌcannan. 24Nẽẽthĩ, hõllõngaa haallahi naa rũgẽt caannĩ hatĩ nẽẽ hẽdẽcaaha dtiic baa aaꞌnya Makayyioohiti Yeesu ho. Nẽ dtiici niccia, ĩĩn dtiic ꞌcĩ haduhaanĩ nyeemuut ꞌcĩ abũnnaa cĩ bũnnai cĩ Nyekuci.

25“Nẽẽthĩ ꞌyioko, haga naa iittiõõ hatĩ hõrggẽẽnaa cunuung eeta baag hallimani naa habuccieet cĩ Nyekuci, hõllõngaa hatĩ acĩnna nganĩĩt tarĩ. 26Nẽẽthĩ, haduhaakuung naa ngagiit kõr nicci, ngaatĩ hammĩrrĩ naa biyyiẽẽtĩĩ cĩg eet vẽlẽk. 27Hĩnĩngĩtĩ nga hũtũbũr naa ngaatĩ hallimaneekuung thõõth vẽlẽk cĩ Nyekuci. 28Uꞌthuutti eleeti cugguung nẽ ũtũhayyu lothippit cĩ lemmiook baag aaꞌnyuung Lorii ꞌcĩ Ẽllẽẽmĩth ngagiit ũtũhaac. Ĩĩtõ tũhayyiook cĩg lothippit cĩ lemmiook cĩg Nyekuci, baa ũũta nẽẽ biyyiẽẽtĩĩ cĩgĩnnĩg. 29Haga naa uruta caannĩ, au hatĩ ꞌlimmanniooha ꞌcĩg ĩĩn oloꞌngiaak, ꞌcĩg aattĩg hĩ huduumwaana ꞌcĩg au acũda nyalõmaar, hiita huruktuung ngagiita. 30Au hatĩ eeta ũgẽẽgĩ cugguung ẽmmẽn, atalmaanyan nuyyiook cĩg Makayyiooktak, aduhaak nuyyiook õlõng, hátĩ hũnnẽẽcõ ĩhõõggõ. 31Hõlõ, ebehit eleeti jurrung! Ummuhuttooth nõõ ngaatĩ hirrioonĩkuung naa ngagiit hõdẽĩ hõdẽĩ irkiꞌnyia iyyio baalin hĩ waathĩn tilaalõnĩ.

32“Nẽẽthĩ ꞌyioko, haaꞌnyuung naa ngagiit hebehuung Nyekuci. Ummuhuttooth nyeemuut cĩ Nyekuci ꞌcĩ maka ngaatĩ ĩĩnnĩ nẽẽ tarbal. Occa eelluung ngagiit nyeemuut ciee nẽ aaꞌnyuung ngagiit ꞌgii cunuung hĩ eeta cĩg Nyekuci. 33Nga hũbũraneek maccĩrẽẽn hode ceremwa cĩg eet umwa ũdũt. 34Agayyu niig buúk hadticaniini baa naa athĩn cĩgannĩg ẽmmẽn hutuno, hũmmũdaaĩ rũgẽt caannĩ hĩ rũgẽt cĩ ꞌgoonoga cĩgannĩg. 35Hẽlẽggẽẽnnĩ vẽlẽk ĩcĩg hadticani naana, heterethuung naa ngagiit idticattõ gẽrrẽẽt, hátĩ eelit eet ꞌcĩg appĩĩrna. Ummuhuttooth thooꞌthiok baag aduha Makayyioohiti Yeesu aĩ, ‘Aku ꞌgattanĩ ꞌcĩ maka hatĩ haaꞌnyĩk naag eet umwa eliinit, hĩllõõan ngaatĩ aaꞌnyĩhoothĩkeet ngagĩĩta.’ ”

36Ma baa ẽdẽcaak Paaulo thõõth icci, akat huruꞌnyia nẽ alayyio hĩ ĩhõõggõ. 37Baa arruui nẽẽg vẽlẽk hĩcĩ ĩꞌthaaĩk nẽẽg Paaulo ꞌgõõla. 38ꞌGii ꞌcĩ baa aaꞌnyĩk ĩhõõggõ hutullẽẽcõ gẽrrẽẽt ko, thõõth ꞌcĩ aĩ hõllõngaa hatĩ nga acĩn nẽẽg muum cĩ Paaulo tarĩ. Ma ho, ittioonito ĩnõõnnõ ĩꞌthõng hũũk hõtõd haahũl.

Currently Selected:

Dtiicanĩ cĩg ꞌThooyyiahu 20: did

Highlight

Copy

Compare