1 Korinthia 16

Lũtẽẽnĩt cĩ ꞌrabbẽẽt cĩg eet cĩg Nyekuci

1Nẽẽthĩ ꞌyioko, thõõthaa cĩ hoiinit cĩ ꞌrabbẽẽt cĩg eet cĩg Nyekuci, ĩdĩmanit thõõth baa haduhaahi naa lothippiꞌnya cĩg lemmiook cĩg ꞌGalaaꞌthia. 2Lomidikaaꞌnyanĩ vẽlẽk, aꞌnyĩĩk eet hõdẽĩ hõdẽĩ hõrggẽẽnaa cunuung hitiangithit ꞌrabbẽẽt ũgĩ ngadiiha, ꞌrabbẽẽtĩĩ ꞌcĩg aggam ẽẽtĩ dtiicaa cĩnnĩ. Hátĩ ma hikia naana, iittiõõ hatĩ lũtẽẽnĩtĩ umwaa tõõ. 3Nẽ ma hõdõlana, haaꞌnyihi hatĩ naa eet baag ẽbẽraannu niig waragẽẽt cĩg terethiittak nẽ ĩꞌthooyyu ĩhõõggõ hootti ꞌbaaninit cunuung ꞌJeruꞌthalẽma. 4Má hacini abũnnaa ngaatĩ occa hõkõõĩ naa buúk, hõõkõrra hatĩ hĩ ĩhõõggõ hõdẽĩ.

Thooꞌthiok ꞌcĩg adiim Paaulo

5Hakuu hatĩ hacinnuung ngagiit urutaa ꞌcĩ hõbõdaaĩ looccaa cĩ Maccedoonia, hĩnĩngĩtĩ hadiimi hõkõ nõõ naa ĩĩcĩ Maccedoonia. 6Horoong hatĩ hau harũmĩ nõõ hĩ ngagiit hĩdĩhĩdĩĩc hode hakuu hẽdẽcaahi tagĩĩth#16:6 Tagĩĩth: Looccaa cĩ Ĩꞌthĩraẽlĩ, aitiõõ tagĩĩthĩ hõllõngaa aduhõõ hĩ tagĩĩth cĩ looc cĩnaac. Tagĩĩthĩ cĩ looc cĩ Ĩꞌthĩraẽlĩ, alalĩ lõõcĩ gẽrrẽẽt nẽ ĩtĩĩl gẽrrẽẽt. Nẽ õkõmĩ gẽrrẽẽt ngaatĩ occa ẽhẽẽrõnĩ eeta nyĩlõhẽẽnnĩĩ cĩg. nĩĩca, hátĩ iita eelliaangu nganĩĩt hẽẽrõnaa caannĩ ĩĩcĩ hõkõõĩ. 7Hõllõngaa hadiimi naa hacinnuung ngagiit ꞌyioko nẽ hikia hothohoteehuung haaga, hammuhi occa hatĩ hau harũmĩ hĩ ngagiit hĩdĩhĩdĩĩc, hatĩ ẽlẽmĩ Makayyioohiti. 8Nẽẽthĩ, haaĩ hatĩ ꞌtaaũnaa cĩ Eevvetho ĩꞌthõng Karrama cĩ Waathinniook Hẽẽn ꞌTur,#16:8 Karrama cĩ Waathinniook Hẽẽn ꞌTur: Baa aku Karrama ciee urutaa cĩ Waathinniook Hẽẽn ꞌTur cĩg Kõr cĩ Haangittõõ. Karramaawaa cĩ, baa gõõng aꞌnyak eeta cĩg ꞌJudeei ꞌgẽẽn cĩ manẽẽn cĩggĩĩng ꞌcĩ oou õõ aaꞌnyĩk Nyekuc hĩĩ ꞌbaaninit ꞌCieethaa cĩnnĩ ꞌJeruꞌthalẽma. Baa kõr ꞌcĩ alluuccianĩ Lorii ꞌcĩ Ẽllẽẽmĩth ootinii cĩg nuyyioohu cieeni. Tigiil ꞌBuuk cĩ Tigiilẽttõõ 28:26-31; Dtiicanĩ cĩg ꞌThooyyiahu 2:1-4. 9hĩnĩngĩtĩ ubbuuhothoothĩhaa nganĩĩt hattũũg cobbi cĩ dtiic ꞌcĩ abũnnaa, nẽ aattĩg eeta ꞌcĩg mẽẽlĩg ꞌcĩg abũrra nganĩĩta.

10Má õdõlan Timotteeo, iita ũrũmtĩ hĩ ĩnõõnnõ jurrung. Adtican nẽẽ dtiic cĩ Makayyiookto hĩ naana. 11Ma haaꞌnyiku eet umwa hũtũbũr ĩnõõnnõ. Iꞌthooyyiak ĩnõõnnõ ꞌgõõl lõꞌngõõc, hátĩ hõbõda hĩ nganĩĩta. Hẽrẽ naa ĩnõõnnõ hĩ ꞌgõtõõnõgĩ ũgĩ.

12Nẽ ꞌyioko, hĩnĩngĩtĩ thõõth cĩ Appoolo, hadiimi naa hĩꞌthõõakuung ngagiit ĩnõõnnõ hookorria hĩ ꞌgõtõõnõgĩ. Baa aharĩ nẽẽ ngaatĩ akuuni ꞌyioko, nẽẽthĩ, aku hatĩ nẽẽ kõr ꞌcĩ adiim nẽẽnĩ.

13Aaut dĩkĩĩm, okomit lemiittaa cunuung, aanytĩk ꞌthinneeti hokomit. 14Idticanit thooꞌthiok vẽlẽk mĩnnaniitta.

15Agayyu niig baa atiman eeta cĩg halang cĩ Tẽẽvana, ngaatĩ au ĩĩnnĩ lemmiook ĩĩcĩ oou looccaa cĩ Acaia, nẽ ĩrrĩcatta ngaatĩ adticanõõthĩkĩ lemmiook. Haduhaakuung naa ngagiit ꞌgotoonoga hĩ ngoonoga, 16elemit eet ꞌcĩg aattĩg hoti, hĩ eet vẽlẽk ꞌcĩg au arũmoothiku hĩ ngagiit nẽ idticattoou hõdẽĩ. 17Baa haccamanoothihi naa gẽrrẽẽt, ngaatĩ õdõlanĩ Tẽẽvana hĩ Vortunaato hĩ Acaiako, hĩnĩngĩtĩ aanyta nẽẽg nganĩĩt hẽlẽggĩ baag aitiõõ hĩ ngagiit tõõ. 18Nẽ tarĩ, aanyta haccamanoothĩk gẽrrẽẽt, hĩ baa aaꞌnyuung ngagiit buúk accamattoothĩk. Ĩĩttĩk eet ꞌcĩg aattĩg noho ĩlaallẽ.

19Ĩꞌthaayyuung lothippiti cĩ lemmiook ꞌcĩg au ꞌtaaũnnioohĩ cũũmõ cũũmõ ĩĩcĩ looc cĩ Aaꞌthia. Ĩꞌthaayyuung Akwila hĩ Piriciilla gẽrrẽẽt ꞌthaarĩĩ cĩg Makayyiookto, hõdẽĩ hĩ lemmiook ꞌcĩg õmmõtõõ ꞌcieethaa cĩnĩĩng. 20Ĩꞌthaayyuung ꞌgotoonogu hĩ ngoonogu ꞌcĩg aattĩg ngaati vẽlẽk ngagiita. Ĩꞌthaac ꞌgoonogu taliitta.

21Heheedi naa Paaulo dẽẽdẽ ꞌthaainit icci attiaa caannĩ.

22Má hõllõngaa ammĩnan eet umwaa Makayyioohit, ĩccĩĩnĩ nẽẽ ẽlẽk. Anneek baaĩ nuun Makayyioohit ijjia!

23Aꞌnyĩĩk bũnnai cĩ Makayyioohit Yeesu haau hĩ ngagiita.

24Aꞌnyĩĩk mĩnnan caannĩ haau hĩ ngagiit vẽlẽk ꞌthaarĩĩ cĩg Yeesu Krĩstõ. Aamẽn.

Currently Selected:

1 Korinthia 16: did

Highlight

Copy

Compare