2 Korinthia 1

1Nganĩĩt Paaulo ꞌcĩ hĩĩnĩ ꞌthooyyiahit cĩ Yeesu Krĩstõ, ꞌcĩ hẽhẽẽdakuung waraga icci, hĩnĩngĩtĩ baa ẽbẽraawa nganĩĩt Nyekuci thõõthaa cĩ. Harũmeenna hĩ Timotteeo ꞌcĩ ĩĩn lemmioohit hĩ naa buúk.

Hĩꞌthõõakuung naa ngagiit waraga icci, lemmiook cĩg ꞌtaaũn cĩ Korinthia hĩ lothippit cĩ lemmiook vẽlẽk ꞌcĩg aattĩg looccaa cĩ Acaia. 2Aꞌnyĩĩk bũnnai hĩ ganõn ꞌcĩ aku hĩ Nyekuc Baangeet cĩnaac, hĩ Makayyioohit cĩnaac Yeesu Krĩstõ haaꞌnyuung ngagiit aaut lõꞌngõõc.

Anneek Paaulo Nyekuc ĩlaallẽ

3Hĩdĩhĩthĩt Nyekuc ꞌcĩ ĩĩn Maaꞌnyĩ Makayyioohit cĩnaac Yeesu Krĩstõ, ꞌcĩ ĩĩn tamaattiohit nẽ ĩĩ Baangeet, ꞌcĩ aku mammaayaniiniti vẽlẽk hĩ ĩnõõnnõ. 4Amammaayanneet nẽẽ ngagĩĩt pĩĩrnatta vẽlẽk, hátĩ hamammaayanit naag buúk eet ꞌcĩg aꞌnyak pĩĩrnanĩt mammaayaniittaa baa hammũda naag hĩ Nyekuc. 5Hĩcĩ hõthõl naag pĩĩrnanĩt cobbi hĩ Krĩstõ, occa hammũda mammaayaniinit ꞌcĩ maka gẽrrẽẽt hĩ ĩnõõnnõ buúk. 6Má happĩĩrnanna naaga, ĩĩn mammaayaniinit hĩ elliaanĩt cunuung. Má baa amammaayanneet Nyekuci ngagĩĩta, ĩĩn mammaayaniinit cunuung ꞌcĩ aaꞌnyuung ngagiit etemeethit pĩĩrnanĩt nicci happĩĩrnanna naag buúk ko. 7Nẽ õkõmĩ muhẽẽnĩtĩ cĩnaang hĩ ngagiita, hĩnĩngĩtĩ hagayyia naag haĩnna hõthõl naag hĩ ngagiit pĩĩrnanĩt cĩnaang ko hõdẽĩ, haau hĩcĩ hõthõl eliinit ꞌcĩ aku hĩ Nyekuc hõdẽĩ.

8Niig ꞌgotoonoga hĩ ngoonoga, hadiimmuung naag ngagiit agaac pĩĩrnanĩt baa happĩĩrnanna naag looccaa cĩ Aaꞌthia. Baa haꞌnyaka naag pĩĩrnanĩt ꞌcĩ maka gẽrrẽẽt ꞌcĩ ĩllõõan ꞌtirrian cĩnaang nẽ hiita hummukta hiita, hadaakta hatĩnĩ. 9Nẽ dĩdĩ ꞌthinneetinii cĩggaang, hummukta hĩĩtta hoottia hatĩ hadaakta thõng. Nẽ baa edeeꞌnyia thõõth ciee, hátĩ hiittiõõ naag hõllõngaa haꞌnyaka lemiinit eleetinii cĩggaang ẽmmẽn, hátĩ haꞌnyakta naag lemiinit hĩ Nyekuc ꞌcĩ arũgtha eet daahĩtha. 10Nẽ baa ẽlaaeet Nyekuci ngagĩĩt tẽẽlꞌthĩtaa cĩ daahĩthõõ nẽ haga naag nga hatĩ aalla eelleet nẽẽ ngagĩĩt noho. 11Nẽ hĩcĩ eellieetu niig ngagĩĩt laiittaa cunuung ko, mẽẽlĩg hatĩ eeta buúk ꞌcĩg anneek Nyekuc ĩlaallẽ, hĩnĩngĩtĩ ẽdẽcĩ Nyekuci laiinit cunuung hĩnĩngĩtĩ ngagĩĩta.

Ũtũhũ Paaulo muhẽẽnĩt cĩnnĩ

12Nẽ ꞌyioko, ĩĩn ciee ꞌrianĩĩth cĩnaang nẽ aduha ꞌthinneeti cĩggaang ꞌgõõl baa harũmẽẽnĩ hĩ ngagiita nẽ dĩdĩ baa gõõng harũmĩ naag hĩ ngagiit lõꞌngõõc. Baa bũnnai cĩ Nyekuci ꞌcĩ aaꞌnyeet hĩdĩmatta noho, hõllõngaa ꞌgẽẽnyĩth cĩ looc nicci ꞌcĩ hadĩmanna noho ho. 13Baa hõllõngaa hẽhẽẽdakuung naag ngagiit waraga ꞌcĩ occa hõllõngaa agiillu hode athiknu. Hammuhi kõr umwa, au hatĩ athĩkneetu niig ngagĩĩt jurrung, 14tananga hõllõngaa athĩkneetu ngagĩĩt ꞌyioko. Ma hatĩ kõr ꞌcĩ õbõdaaĩ Makayyioohiti Yeesu, au hatĩ irrianneetu niig ngagĩĩt haau hĩcĩ hirriannuung naag ngagiit ko.

15Baa hagaoothi naa ꞌrianĩĩth cunuung hĩnĩngĩtĩ ngagĩĩta nẽ hikia hummuha ngaatĩ hẽhẽẽrõnaakuung ngagiit ĩĩcĩ oou. ꞌGõõlaa cĩ, iita ummuddiaau niig ꞌgattan ꞌcĩ hẽhẽẽrõnaakuung naa tabattĩ ꞌramma. 16Hummuha ngaatĩ hẽhẽẽrõnaakuung ngagiit ꞌgõõlaa cĩ hõkõõĩ naa looccaa cĩ Maccedoonia. Nẽ hatĩ aanytaangu niig nganĩĩt eliinit ꞌcĩ hadiimi, hátĩ hũũk looccaa cĩ ꞌJudeea. 17Ma baa hakũmaneehi naa thõõth icci ho, hammuhi hõllõngaa happallaaraneehi thõng. Hode hakũmaneehi thooꞌthiok cĩgannĩg hĩ eeta cĩg looc nicci, hode haaĩ hĩ ẽẽtĩ aagõõng aĩ, “Eei,” hode, “Aitiõõ,” hátĩ haccamattaawa eeta?

18Nẽẽthĩ dĩdĩ, hĩcĩ aꞌthũũnnĩ Nyekuci thõõth, hõllõngaa ĩĩn nyeemuut cĩnaang hĩ ngagiit, “Eei hode aitiõõ.” 19Hĩnĩngĩtĩ Yeesu Krĩstõ Ngeertĩ Nyekuci baa hallimaneekuung naag ngagiita, hõllõngaa aĩ pang pang thõõthaa ꞌcĩ ĩĩn dĩdĩ, hode ĩĩcĩ hõllõngaa ĩĩn dĩdĩ. Ĩnõõnnõ baa haduhaakuung naag hĩ ꞌThĩĩla hĩ Timotteeo Nyeemuut cĩnnĩ ꞌcĩ Abũnnaa. Ĩĩn thooꞌthioha ꞌcĩg aduha Nyekuci vẽlẽk dĩdĩ nẽ adĩman hõdõõkõthĩ thõõth ꞌcĩ aduha nẽẽnĩ. 20Tananga hĩĩ mẽẽlĩg thooꞌthioha ꞌcĩg aduha Nyekuci ĩĩn nẽẽg vẽlẽk “Dĩdĩ” hĩ Krĩstõ. Nẽ hĩnĩngĩtĩ ĩnõõnnõ, hiita hĩĩtõ naag vẽlẽk, aꞌnyĩĩk haau noho bulẽẽttaa cĩ Nyekuci. 21Nẽ ꞌyioko, Nyekuc ꞌcĩ aaꞌnyeet ngagĩĩt hĩ ngagiit hĩbĩlĩt komiitta hĩ Krĩstõ ho, ẽbẽraaeet nẽẽ ngagĩĩta, 22nẽ aaꞌnyeet ngagĩĩt nyamacaar cĩnnĩ ꞌcĩ hĩĩgĩnnĩ naag cĩgĩnnĩg nẽ aarĩkeet Lori ꞌcĩ Ẽllẽẽmĩth ꞌthinneetinii cĩggaac, hẽtẽrẽtha ngaatĩ hĩĩgĩnnĩ naag cĩgĩnnĩg.

23Baa haari naa Nyekuc hĩĩ hebereec caannĩ. Ĩnõõ ꞌcĩ hõllõngaa hõbõdaanĩ naa ꞌtaaũnaa cĩ Korinthia tarĩ haini, hátĩ hiittiõõ hõllõngaa hakuu hiloottuung ngagiita. 24Nẽ hõllõngaa hĩĩgĩnna makayyiook cĩg hattĩnganeekuung ngagiit ꞌgii ꞌcĩ occa elemmu. Hadticanni naag hĩ ngagiit hõdẽĩ, hĩnĩngĩtĩ taliinit cunuung, hátĩ iita okomit niig lemiittaa cunuung.

Currently Selected:

2 Korinthia 1: did

Highlight

Copy

Compare