1 Korinthia 15
15
Ũrũga Krĩstõ
1Nẽẽthĩ ꞌyioko, ꞌgotoonoga hĩ ngoonoga, hadiimi hammuhaakuung nyeemuut ꞌcĩ abũnnaa baa hirrioonĩkuung naa ngagiit nẽ nga elemmu hĩĩ noho. 2Nyeemuutaa ꞌcĩ abũnnaa ho, eelliau niig hatĩ aꞌthuunnu thõõth baa hirrioonĩkuung naa ngagiit jurrung. Nẽẽthĩ, má aitiõõ, ĩĩn thĩ lemiiniti cunuung ko ꞌgiimwa haaga.
3Hĩnĩngĩtĩ baa huduhaahuung naa ngagiit nyeemuut ꞌcĩ abũnnaa ꞌcĩ tiiri, hĩ baa ꞌthẽk adukiaaka nganĩĩt baa aĩ, adaahĩ Krĩstõ, hĩnĩngĩtĩ ꞌthẽccanẽẽt cĩggaac, hĩ baa aduha ꞌBuuhi cĩ Nyekuci. 4Baa adayyi nẽẽ nẽ ma urutaa cĩ waathinniook iyyio, ikia ũrũga daahĩtha hĩcĩ aduha ꞌBuuhi cĩ Nyekuci. 5Baa nõõ uppwaannak Krĩstõ Pẽẽtũrũ, ma ho ikia uppwaannak ꞌthooyyiak ꞌcĩg ĩĩn õmmõtõ hĩ ꞌramma ho buúk. 6Ma urutaa cĩ, ikia uppwaannak lemmiook ꞌcĩg ĩllõõan ꞌmiiaꞌnya ꞌtur (500) tabattĩ hõdẽẽthõng. Baa nga arũgĩ eeta ꞌcĩg mẽẽlẽẽgĩ, nẽẽthĩ, baa adaahito ũgẽẽgĩ. 7Ma ho, uppwaannak nẽẽ ꞌJeemith, ma uruta, ikia uppwaannak ꞌthooyyiak vẽlẽk, 8ma baa urutaa cĩnnĩ vẽlẽk, ikia uppwaannahaa nganĩĩt#15:8 Ikia uppwaannahaa nganĩĩt: Baa uppwaannak Yeesu Paaulo, baa ẽhẽc Paaulo nuyyiook cĩg Yeesu. Tigiil thõõth icci ꞌBuuhaa cĩ Dtiicanĩ cĩg ꞌThooyyiahu 9:1-6. buúk, tananga haau hĩ loholeec ꞌcĩ baa arrittiaa korrioohĩĩ ꞌcĩg abathĩ.
9Hĩĩnĩ naa ꞌthooyyiahit ꞌcĩ adtuurna ꞌthooyyiahĩ vẽlẽk. Nẽ dĩdĩ, baa haĩnanaahi lothippit cĩ lemmiook cĩg Nyekuci pĩĩrnanĩt cobbi gẽrrẽẽt, ꞌcĩ occa hõllõngaa avvĩyya eeta nganĩĩt anneeka ꞌthooyyiahit. 10Nẽẽthĩ, bũnnaiittaa cĩ Nyekuci, hĩĩna naa nganĩĩt hĩ ꞌyioko ho nẽ baa hõllõngaa hahirangĩĩ naa bũnnai cĩ Nyekuci haaga. Aitiõõ ũdũt, baa hadticannii naa hĩllõõan ꞌthooyyiak vẽlẽk, nẽẽthĩ, baa hõllõngaa nganĩĩt ẽmmẽn ꞌcĩ hadticannii ho, baa hadticannii hĩnĩngĩtĩ baa aaĩ bũnnai cĩ Nyekuci hĩ nganĩĩta. 11Nẽẽthĩ, hõllõngaa abathĩ, tananga nganĩĩt ꞌcĩ hirriooni hode ĩhõõggõ ꞌcĩg irrioon ko. Iita elemtu niig vẽlẽk nyeemuut ꞌgõõla hõdẽẽthõng.
Arũgna hatĩ eeta cĩg Nyekuci daahĩtha
12Nẽẽthĩ, má irriõõnĩ thõõth ꞌcĩ aĩ, baa ũrũga Krĩstõ daahĩtha, inni thĩ hothoothito eeta ũgẽẽgĩ hõrggẽẽnaa cunuung hĩĩtõ, aitiõõ eeta ꞌcĩg adaahito hõllõngaa occa arũgna ho? 13Má aitiõõ eeta ꞌcĩg adaahito hõllõngaa arũgna, ĩko thĩ mĩĩ baa nga hũrũga Krĩstõ buúk. 14Nẽ má baa nga hũrũga Krĩstõ, ĩĩn thĩ ꞌlimmanĩ cĩnaang hĩ lemiinit cunuung ko, ꞌgii ꞌcĩ hõllõngaa aaddi. 15Hĩllõõan thõõth niccia, hummuddiaawa naag hĩĩtta oloꞌngiaak cĩg thõõth cĩ Nyekuci, hĩnĩngĩtĩ baa hothooꞌthia naag thõõth cĩ Nyekuci hĩĩtta, baa ũrũgũtha nẽẽ Krĩstõ daahĩtha. Nẽẽthĩ, nga hũrũgũtha nẽẽ ĩnõõnnõ daahĩtha, hatĩ baa nga hũrũgta daakiaha daahĩtha. 16Hĩnĩngĩtĩ, má nga hũrũgta eeta ꞌcĩg adaahito, ngaani thĩ mĩĩ baa hũrũga Krĩstõ buúk. 17Nẽ má baa nga hũrũga Krĩstõ, ĩĩn ꞌthĩ mĩĩ lemiiniti cunuung ko buúk ꞌgiimwa haaga nẽ nga aallannu niig buúk ꞌthẽccanẽẽtĩĩ cugguung noho. 18Nẽ eeta baag adaahito lemiittaa cĩ Krĩstõ buúk, iꞌngittõõthĩ. 19Má haꞌnyahit naag muhẽẽnĩt ꞌcĩ abũnnaa rũgẽtaa cĩ hĩ Krĩstõ diooni, ammannĩkeet hatĩ eeta ngagĩĩt hĩllõõanit eet vẽlẽk.
20Nẽẽthĩ dĩdĩ, baa ũrũga Krĩstõ daahĩtha! Nẽ aaꞌnyeet ngagĩĩt hagaac, ngaatĩ hatĩ arũgnaanĩ eeta ũgẽẽgĩ buúk daahĩtha. 21Nẽ hĩcĩ acinnu niig, aaĩ hĩ baa aku daahĩthĩ loota nĩnga, hĩnĩngĩtĩ eet hõdẽẽthõng, iꞌthianaaĩ ꞌyioko rũgũthaanĩtĩ cĩ daakiahu buúk eeta hõdẽẽthõng. 22Baa aĩnanaakeet Aadamĩ#15:22 Aadam: Baa ĩĩn Aadamĩ eet ꞌcĩ ẽhẽnyta Nyekuci ĩĩcĩ oou nẽ ĩĩ maaꞌnyĩ eet vẽlẽk loota nĩnga. Ĩĩn ngaa cĩnnĩ Ẽẽvva aattĩ eet vẽlẽk loota nĩnga. Tigiil thõõth cĩnnĩ ꞌBuuhaa cĩ ꞌThianaattõ 1-5. ngagĩĩt vẽlẽk daahĩth nẽ aꞌnyahaakeet hatĩ Krĩstõ ngagĩĩt vẽlẽk rũgẽt. 23Nẽẽthĩ, occa hẽrẽẽa naag vẽlẽk hõdẽĩ hõdẽĩ kõr cĩnaac. Baa nõõ arũgtha Nyekuci Krĩstõ ĩĩcĩ oou daahĩtha nẽ arũgthaa hatĩ eeta cĩgĩnnĩg buúk daahĩtha hatĩ õbõda nẽẽnĩ. 24Nẽ urutaa ꞌcĩ ĩllõõanĩ Krĩstõ mĩrõk cĩgĩnnĩg vẽlẽk, ikia thĩ hatĩ decciaanĩtĩ cĩ lootu nẽ aaꞌnyĩk nẽẽ habuccieet Nyekuc Maaꞌnyĩ. 25Hĩnĩngĩtĩ aggam hatĩ nẽẽ looc ĩꞌthõng haathĩk mĩrõk cĩgĩnnĩg vẽlẽk looc. 26Mirohit ꞌcĩ adtuurna ꞌcĩ hatĩ aruhi ho, daahĩthĩ. 27Hĩnĩngĩtĩ aduha ꞌBuuhi cĩ Nyekuci aĩ, “Baa aaꞌnyĩhoothĩk ĩnõõnnõ ꞌtirriani ꞌcĩ aggamĩ hẽlẽggĩ vẽlẽk.”#Tigiil ꞌBuuk cĩ Tegellwaanu 8:6 Nẽẽthĩ ꞌyioko, má aĩ thõõth ciee, aggam hatĩ nẽẽ “hẽlẽggĩ vẽlẽk,” makaaꞌthĩtaa cĩnnĩ, nĩngĩtĩ aĩ, hõllõngaa arũmoothĩk Nyekuci ꞌcĩ aarĩk hẽlẽggĩ vẽlẽk makaaꞌthĩtaa cĩnnĩ. 28Ma urutaa ꞌcĩ aggamĩ Ngeertĩ Nyekuci hẽlẽggĩ vẽlẽk, aarĩk hatĩ nẽẽ ẽlẽ cĩnnĩ athĩnĩĩ cĩg Nyekuc ꞌcĩ aarĩk ꞌgii vẽlẽk haggam Ngeerĩnĩ ho. Nẽẽthĩ, ĩĩn hatĩ Nyekuci nẽẽ dẽẽdẽ, ꞌgii vẽlẽk hĩ eet vẽlẽk.
29Nẽẽthĩ ꞌyioko, má aitiõõ hõllõngaa arũgna eeta daahĩtha, adĩman hatĩ eeta ꞌcĩg aggam baattithimo, hĩnĩngĩtĩ eet ꞌcĩg adaahito ho ne? Nẽ ꞌthẽk má hõllõngaa arũgthaa eeta ꞌcĩg adaahito ho ũdũt, inni thĩ haggamit eeta baattithimo, hĩnĩngĩtĩ ĩhõõggõ ho? 30Inni hĩĩnattaaha naag eleeti cĩggaang bathi waathinniook vẽlẽk ko? 31Nẽ inni hommottiooa naa hĩ daahĩth hõdõõkõthĩ ho? ꞌRianĩĩth ꞌcĩ haꞌnyahi naa hĩ ngagiit, hĩnĩngĩtĩ Yeesu Krĩstõ Makayyioohit cĩnaac, ꞌcĩ aaꞌnya nganĩĩt huduha thõõth icci ho. 32Má baa haruhoonna naag hĩ eet ꞌcĩg aꞌthĩlan aattĩg hĩ idiꞌngwa cĩg moru ꞌtaaũnaa cĩ Eevvetho, hĩnĩngĩtĩ thooꞌthiok cĩg eetuk haaga, ne ꞌyioko ꞌcĩ baa hammũda naa ho? Má hõllõngaa arũgthaa eeta ꞌcĩg adaahito,
“Hudukto thĩ nẽẽ naag nẽ hũhũdĩt mẽrtĩ,
hĩnĩngĩtĩ hadaahĩ hatĩ lohotha.”#Tigiil ꞌBuuk cĩ Iꞌthaia 22:13
33Ma haggiiꞌthu eleeti cugguung haaga noho. Ẽꞌthẽcannuung hatĩ ngagiit ꞌgoonogu ꞌcĩg abathĩ. 34Udtuukta thõõth ꞌcĩ abathĩ nẽ ibillu ꞌthẽccan, hĩnĩngĩtĩ aattĩg eeta ũgẽẽgĩ hõrggẽẽnaa cunuung, ꞌcĩg nga hagaacõ thõõth cĩ Nyekuci. Haduha naa thõõth icci, hátĩ haggamuung ngagiit ngaaoni.
Ẽlẽ ꞌcĩ arũgna
35Nẽẽthĩ, horoong occa ajin ẽẽtĩ umwaa thõõth ꞌcĩ aĩ, “Arũgna hatĩ eeta ꞌcĩg adaahito hutuno? Au hatĩ aꞌnyak nẽẽg eleeti ꞌcĩg aattĩg hutuno?” 36Ma haggiithennu thõng! ꞌGii ꞌcĩ athaccu niiga, hõllõngaa occa arũgna nĩĩcĩ noho, adaahĩ nõõ thõng. 37Ma athaci nii hinyomooc, aitiõõ nii hõllõngaa atiboolani ẽlẽ cĩnnĩ hũtũrũũr, nẽẽthĩ, athacci hinyomooc haaga horoong cĩ ꞌgẽẽmẽ hode cĩ ꞌgiimwa haaga buúk. 38Nẽẽthĩ, aaꞌnyĩk Nyekuci hinyomooc ẽlẽ hĩcĩ baa adiim nẽẽnĩ nẽ aaꞌnyĩk hinyomo eleeti cĩggĩĩng cũũmõ cũũmõ. 39Ẽhẽnytaa eeta hĩ idiꞌngwa hĩ hĩbaallĩ hĩ ulugo aꞌnyak eleeti, nẽẽthĩ, hiꞌthihi ꞌcĩ aduhõõ hĩ ꞌgõõnĩ. 40Aꞌnyak hẽlẽggĩ cĩg hẽẽtkujjieen vẽlẽk eleeti nẽ aꞌnyak hẽlẽggĩ cĩg lootu buúk eleeti. Nẽẽthĩ, ꞌlẽẽmĩthĩ cĩ hẽlẽggĩ cĩg hẽẽtkujjieen, aaĩ ꞌgõõlaa cĩnnĩ ẽmmẽn nẽ ꞌlẽẽmĩthĩ cĩ hẽlẽggĩ cĩg looc nicci, aaĩ ꞌgõõlaa cĩnnĩ ẽmmẽn. 41Aꞌnyak kõrra ꞌlẽẽmĩth cĩnnĩ ẽmmẽn nẽ aꞌnyak nyĩlõhĩ cĩnnĩ ẽmmẽn nẽ aꞌnyahit mũnyũnya buúk cĩnĩĩng ẽmmẽn nẽ hõllõngaa aduhõõ ꞌlẽẽmĩthĩ cĩ mũꞌnyaac umwa hĩ cĩ umwa.
42Aaĩ hatĩ noho hatĩ ũrũgta eleeti cĩggaac daahĩtha. Adaahĩ hatĩ eleeti cieegi, nẽẽthĩ, eleeti ꞌcĩg ũrũgta, hõllõngaa hatĩ adaahĩ tarĩ ũdũt. 43Adayyi eleeti cĩggaac hĩnĩngĩtĩ daahĩth, nẽẽthĩ, arũgthaa hatĩ nẽẽg bulẽẽtta. Adayyi nẽẽg hĩnĩngĩtĩ hõllõngaa attiranĩ nẽ arũgthaa hatĩ nẽẽg ꞌtirriaana. 44Adayyi nẽẽg hĩ eleeti cĩg eetuk, nẽẽthĩ, arũgthaa hatĩ nẽẽg makaaꞌthĩta cĩ Lori ꞌcĩ Ẽllẽẽmĩthĩ. Hĩcĩ aattĩg eleeti ꞌcĩg looc nicci, aattĩg ꞌthẽk eleeti ꞌcĩg hẽẽtkujjieen buúk.
45Baa aduha ꞌBuuhi cĩ Nyekuci aĩ, “Baa ĩĩn Aadamĩ eet ꞌcĩ oou nẽ ĩĩ eet ꞌcĩ arũgĩ. Nẽẽthĩ, Yeesu ꞌcĩ ĩĩn Aadam ꞌcĩ adtuurna ho, ĩĩn lori ꞌcĩ aaꞌnyeet rũgẽt.”#Tigiil ꞌBuuk cĩ ꞌThianaattõ 2:7 46Hacĩn ꞌyioko naag baa hõllõngaa uwwattaa ẽẽtĩ baa aꞌnyak lori. Baa anũa nẽẽ eet ꞌcĩ aꞌnyak ẽlẽ ꞌcĩ edeeꞌnyiaa. 47Baa ẽhẽnytaa ẽẽtĩ ꞌcĩ oou dooba, nẽẽthĩ, baa aku ẽẽtĩ ꞌcĩ uruto ho hẽẽtahujjieen. 48Aꞌnyak eeta vẽlẽk cĩg lootu eleeti ꞌcĩg aduhõõ hĩ ẽlẽ cĩ eet baa ẽhẽnytaa dooba. Nẽ aꞌnyahit eeta ꞌcĩg aattĩg hẽẽtahujjieen vẽlẽk eleeti ꞌcĩg aduhõõ hĩ ẽlẽ cĩ eet baa aku hẽẽtahujjieen thõng. 49Hĩcĩ haduhõõ naag hĩ eet baa ẽhẽnytaa dooba ho, haattĩg hatĩ naag hĩ ẽẽtĩ baa aku hẽẽtahujjieen.
50Hõlõ, hadiimmuung naa ngagiit agaac ĩĩtõ, õꞌngõlĩ hatĩ horumwa eleeti cĩggaac ꞌcĩg ĩĩn ẽlẽ hĩ biyyi ho haaga. Nẽẽthĩ, aĩ thõõth ciee nẽẽ, aitiõõ hatĩ eleeti cĩggaac hõllõngaa õthõl habuccieet cĩ Nyekuci ꞌcĩ aalla ũdũt ko. 51Haduhaakuung hatĩ naa ngagiit thõõth ꞌcĩ ĩllõõan ꞌgẽẽnyĩth cĩ eetu ho. Aitiõõ hatĩ naag vẽlẽk hõllõngaa hadaahĩ, nẽẽthĩ, hũũkcĩ hatĩ naag vẽlẽk haaga. 52Edeeꞌnyiaa hatĩ thõõth ciee hĩdĩĩkoothong, hĩllõõan ꞌgii gõõng adtuuha hẽbẽrẽẽcĩ hataman. Hĩnĩngĩtĩ adtaki hatĩ nyeeppuu ꞌcĩ adtuurna nẽ ũrũgta eeta vẽlẽk ꞌcĩg adaahito. Nẽ thĩ hatĩ hutuhuyyi naag vẽlẽk hiittiõõ hõllõngaa hadaahĩ tarĩ ũdũt. 53Ũũkcĩ hatĩ eleeti cĩggaac ꞌcĩg adaahĩ nẽ otongolit ko, hĩĩtõ eleeti ꞌcĩg hõllõngaa adaahĩ hode õꞌngõlĩ. 54Eleeti ꞌcĩg ꞌyioko haꞌnyak naag ko, ĩĩn eleeti ꞌcĩg hõllõngaa attiranĩ nẽ adaahĩ. Nẽẽthĩ, ũũkcĩ hatĩ nẽẽg hĩĩtõ eleeti ꞌcĩg aalla ũdũt. Hatĩ hikia thõõth cĩ ꞌBuuk cĩ Nyekuci hĩĩ dĩdĩ hĩ baa aĩ, “Aꞌnyamanĩ daahĩthĩ!”#Tigiil ꞌBuuk cĩ Iꞌthaia 25:8
55“ꞌTirrian cĩ daahĩthõõ ho inoo?
Ũũk kẽddanĩ cĩ daahĩthõõ ho ĩĩna?”#Tigiil ꞌBuuk cĩ Hoꞌthẽa 13:14
56Aꞌnyaha ꞌthẽccanĩ daahĩth nẽ aaꞌnyĩk nyattalĩ ꞌthẽccan ꞌtirrian. 57Nẽẽthĩ, hĩĩttĩk Nyekuc ĩlaallẽ ngaatĩ aaꞌnyĩkĩ Makayyioohit cĩnaac Yeesu Krĩstõ haaꞌnyeet hĩllõõanit!
58Nẽẽthĩ hoti ho, ꞌgotoonoga hĩ ngoonoga, aaut okomit. Ma haaꞌnyiku ꞌgiimwa hotomooyyuunga. Aarrik eleeti cugguung hõdõõkõthĩ dtiicaa cĩ Makayyiookto, hĩnĩngĩtĩ agayyu niig aĩ, hõllõngaa ĩĩn dtiici cunuung cĩ Makayyiookto ho ꞌcĩ haaga.
Currently Selected:
1 Korinthia 15: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
