1 Korinthia 11

1Ũnnẽẽc terethiinit caannĩ hĩcĩ hanũ naa terethiinit cĩ Krĩstõ.

ꞌGõõl ꞌcĩ halaiini

2Hirriani naa hĩnĩngĩtĩ ngagiita, hĩnĩngĩtĩ ammuhaannaangu niig nganĩĩt hõdõõkõthĩ nẽ uꞌthuuttu ꞌlimman baa hallimaneekuung naana. 3Nẽẽthĩ ꞌyioko, hadiimmuung naa ngagiit agaac ĩĩtõ, Makayyioohit cĩ eet ꞌcĩg maacĩg vẽlẽk Krĩstõ nẽ makayyioohit cĩ ngaa ꞌcĩ ngayyi, ẽẽtĩ ꞌcĩ maacẽẽnĩ nẽ Makayyioohit cĩ Krĩstõ Nyekuci. 4Ẽẽtĩ ꞌcĩ alayyi hode aduha thõõth ꞌcĩ hatĩ aku horumwa nẽ ũmmũt õõ thõng, hõllõngaa iꞌngolli nẽẽ Krĩstõ hĩ Makayyioohiti cĩnnẽẽnĩ. 5Nẽ ngaa ꞌcĩ alayyi hode aduha thõõth ꞌcĩ hatĩ aku horumwa nẽ hõllõngaa ammũt õõ cĩnnĩ, hõllõngaa iꞌngolli Krĩstõ hĩ Makayyioohiti cĩnnẽẽnĩ, aduhõõ hĩ ngaatĩ ahũũcẽnĩ õõ cĩnnĩ thõng. 6Má hõllõngaa ammũt ngaa umwa õõ cĩnnĩ, aꞌnyĩĩk hũtũhũũca ĩma cĩgĩnnĩg nẽ má abathĩ ngaatĩ ahũũcanĩ ngaa õõ cĩnnĩ, aꞌnyĩĩk hũmmũt õõ cĩnnĩ thõng. 7Occa hõllõngaa ammũt ẽẽtĩ ꞌcĩ maacĩ õõ cĩnnĩ, hĩnĩngĩtĩ ĩĩn nẽẽ ꞌthooura hĩ bulẽẽnĩt cĩ Nyekuci nẽ ĩĩ ngaa bulẽẽnĩt cĩ eet ꞌcĩ maacĩ. 8Hĩnĩngĩtĩ baa hõllõngaa aku ẽẽtĩ ꞌcĩ maacĩ ngaawaa ꞌcĩ ngayyi, baa aku ngaa ꞌcĩ ngayyi eetaa ꞌcĩ maacĩ; 9nẽ baa hõllõngaa ẽhẽnytaak Nyekuci eet ꞌcĩ maacĩ ngaa ꞌcĩ ngayyi, baa ẽhẽnytaak nẽẽ ngaa ꞌcĩ ngayyi eet ꞌcĩ maacĩ. 10Hĩnĩngĩtĩ thõõth icci nẽ hĩnĩngĩtĩ aajĩlẽẽt, aꞌnyĩĩk ngaa ꞌcĩ ngayyi hũmmũt õõ hẽtẽrẽtha aĩ aꞌnyak nẽẽ terethiinit cĩ makaaꞌthĩt cĩnnĩ õõa cĩnnĩ.

11Eetinii cĩg Makayyiooktak, adiim ngaaĩ eet ꞌcĩg maacĩg nẽ adiim eeta ꞌcĩg maacĩg ngaaĩ. 12Hĩnĩngĩtĩ baa aku ngaa eetaa ꞌcĩ maacĩ nẽ ꞌgõõlaa cĩ aduhõõ thõng, arrita ngaa eet ꞌcĩ maacĩ. Nẽẽthĩ, aku ꞌgii vẽlẽk hĩ Nyekuc. 13Ittiamanit da thõõth icci ẽmmẽn. Abũnnaa occa ngaatĩ alaĩ ngaa Nyekuc, hatĩ hõllõngaa ammũt õõ? 14Hõllõngaa nooyyia abathĩ hĩ eet ꞌcĩ maacĩ ngaatĩ aꞌnyahĩ ĩma ꞌcĩg uuttik? 15Nẽ má aꞌnyak ngaa ĩma ꞌcĩg uuttik, aitiõõ occa hõllõngaa ĩĩn bulẽẽnĩt cĩnnĩ? Hĩnĩngĩtĩ baa aaꞌnyĩhoothĩk ĩnõõnnõ ĩmana ꞌcĩg uuttik hũmmũtĩt õõ cĩnnĩ. 16Nẽẽthĩ, má ẽppẽhan eet umwaa thõõth icci, haini naa hõllõngaa haꞌnyak naag nyepitee umwa ꞌcĩ ĩllõõan icci nẽ hõllõngaa aꞌnyak lothippiti cĩ lemmiook cĩg Nyekuci cĩg loonyin cũũmõ cũũmõ buúk, nyepitee ꞌcĩ ĩllõõan icci.

ꞌGẽẽn cĩ Makayyiookto

17Nẽẽthĩ, tilooittaa cĩ, occa hõllõngaa hadĩhĩꞌthuung naa ngagiita, hĩnĩngĩtĩ ma ommotoonnu niiga, aꞌnyaku niig thõõth ꞌcĩ abathĩ hĩllõõan bũnnai. 18Ĩĩcĩ oou, hathihi naa aĩ, ma au ommotoonnu niig ngaatĩ hõdẽẽthõng hĩ lothippit cĩ lemmioohu, aku aaĩ ngẽrõõnĩtĩ hõrggẽẽnaa cunuung nẽ ꞌgõõlaa umwaanĩ, haga naa ĩĩn dĩdĩ. 19Nẽ dĩdĩ, occa ꞌthẽk aaĩ ngẽrõõnĩtĩ hõrggẽẽnaa cunuung, hátĩ hedeeꞌnyia nganĩ hõrggẽẽnaa cunuung ꞌcĩ ẽlẽmĩ Nyekuci. 20Ma aꞌnyaku niig rũmẽẽnĩt, hõllõngaa ĩĩn ꞌgẽẽn cĩ ꞌjiaatinu cĩ Makayyiookto ꞌcĩ aduku niig ko, 21hĩnĩngĩtĩ ma aduheennu niiga, hõllõngaa ereeyyu eet ũgĩ ꞌcĩg nga aattiyyiaa buúk. Ma adak eet umwa magĩthĩ, adũũtĩ hinnia umwaa thõng. 22Aitioonnuung ngagiit olooyyioha ꞌcĩg aduheennu hĩ ꞌcĩg ahũdeennu tõõ? Hode arannu niig lothippit cĩ lemmiook cĩg Nyekuci nẽ aanytĩhu ngaaoni haggam eet ꞌcĩg hiꞌthihi ꞌgii ꞌcĩ adahĩ? Ĩcca occa hatĩ hanneekuung naa ngagiit ne? Ĩcca occa hatĩ hadĩhĩꞌthuung naa ngagiit, hĩnĩngĩtĩ thõõth icci? Aitiõõ ũdũt!

ꞌGẽẽn cĩ ꞌjiaatinu cĩ Makayyiookto

(Tigiil Maatteeo 26:26-29; Maarko 14:22-25; ꞌLuuka 22:14-20)

23Baa Makayyioohit ꞌcĩ aaꞌnya nganĩĩt thõõth ꞌcĩ hakuu haduhaakuung ngagiit ko. Baa attiha Makayyioohiti Yeesu ũbũnĩ baalin baa õhõppõõcaniini nẽẽnĩ, 24ma baa ĩĩnnĩk Nyekuc ĩlaallẽ, ikia appak nẽẽ ũbũnĩ nicci nẽ ĩĩ, “Ẽlẽ caannĩ cieeni ꞌcĩ aaꞌnyĩhoothĩkuung ngagiita, ĩdĩmanit thõõth icci, hátĩ gõõng ummuktaayyiaangu nganĩĩta.” 25Nẽ ꞌgõõla hõdẽẽthõng, ittiha nẽẽ hooppo cĩ viinoo nẽ ĩĩ, “Ĩĩn hooppo ciee cĩ lõhõt ꞌcĩ ĩĩn ngeju cĩ biyyi cĩgannĩg, ĩdĩmanit hatĩ gõõng thõõth icci, hatĩ ahuddu biyyi iccig, hátĩ ummuktaayyiaangu nganĩĩta.” 26Hĩnĩngĩtĩ ma hatĩ gõõng aduku ũbũnĩ icci nẽ uhuddu biyyi iccig, aduhaannu hatĩ daahĩth cĩ Makayyiookto, ĩꞌthõng hatĩ hõbõda nẽẽnĩ.

27Nẽẽthĩ hoti ho, ẽẽtĩ ꞌcĩ aduk ũbũnĩ hode ahũdĩ hooppoaa cĩ Makayyiookto ꞌgõõlaa ꞌcĩ abathĩ, ẽꞌthẽcan hatĩ nẽẽ ẽlẽ hĩ biyyi cĩg Makayyiooktak. 28Adiim occa attũhũl ẽẽtĩ ꞌthĩnĩt cĩnnĩ, nga huduk ũbũnĩ hode hũhũd biyyi iccig. 29Hĩnĩngĩtĩ ẽẽtĩ ꞌcĩ aduk ũbũnĩ icci, hode ahũd biyyi iccig nẽ hõllõngaa ammuk aĩ, ĩĩn ciee ẽlẽ cĩ Makayyiookto, etteedĩk nẽẽ ẽlẽ cĩnnĩ thõõth ꞌcĩ abathĩ. 30Ĩnõõ thõõth ꞌcĩ appĩĩrnanĩ nẽ otomoorito eeta ꞌcĩg mẽẽlĩg hõrggẽẽnaa cunuung nẽ adaahito ũgẽẽgĩ ho. 31Nẽ má hetteedĩk naag eleeti cĩggaac thõõth jurrung, aitiõõ hatĩ Nyekuci hõllõngaa uukeeta. 32Ma etteedĩkeet Makayyioohiti ngagĩĩt thõõth, ilootteet nẽẽ ngagĩĩt, hátĩ hiittiõõ hõllõngaa etteedoothĩkeet ngagĩĩt thõõth hõdẽĩ hĩ eet cĩg looc nicci.

33Nẽẽthĩ, abũnnaa ꞌgotoonoga hĩ ngoonoga, ma au aduheennu niig ngaatĩ hõdẽẽthõng, ẽrẽẽc nõõ ꞌgoonogu vẽlẽk hiita. 34Má adakuung magĩthĩ dĩdĩ, udukto nõõ õlõ, hátĩ hiittiõõ hõllõngaa etteedoothĩkuung thõõth hatĩ ommotoonnu ngaatĩ hõdẽẽthõng.

Hakuu hatĩ hallimaneekuung naa thooꞌthiok ũgĩ tarĩ hatĩ hikia.

Currently Selected:

1 Korinthia 11: did

Highlight

Copy

Compare