1 Korinthia 10

Ma halayyu nyekuꞌnya ꞌcĩg hõllõngaa ĩĩn dĩdĩ

1ꞌGotoonoga hĩ ngoonoga, hõllõngaa hadiimmuung naa ngagiit herehuung thõõth baa hĩbaangĩ cĩggaac, baag baangaani horrwaa ꞌcĩ õdõhõhĩĩ kak. Baa ẽtẽrẽth ĩhõõggõ vẽlẽk diith ꞌcĩ uwwattẽẽkĩ ĩhõõggõ nẽ abaaktĩ nẽẽg bũlũc ẽdẽcĩ ꞌgõõl ꞌcĩ õdõhõhĩĩ. 2Baa aggam nẽẽg vẽlẽk baattithimo, hiita hĩĩtõ nuyyiook cĩg Mũũꞌtha diithatõõ hĩ bũlũcatõõ. 3Baa adak hĩbaangĩ vẽlẽk ꞌgẽẽn hõdẽẽthõng cĩ loriio, 4nẽ ũhũdĩt nẽẽg vẽlẽk maam cĩg loriiak, hĩnĩngĩtĩ baa ahũd nẽẽg maam cĩg lõbarab baa õõkõr hĩ ĩhõõggõ nẽ baa ĩĩn lõbarabĩ niccia Krĩstõ. 5Nẽẽthĩ hoti ho, baa hõllõngaa accamana Nyekuci eet ꞌcĩg mẽẽlĩg hõrggẽẽnaa cĩnĩĩng, nĩngĩtĩ ĩꞌthanõthõõthĩkĩ eleeti cĩggĩĩng horu ꞌcĩ õdõhõhĩĩ kak.

6Nẽ ꞌyioko, baa edeeꞌnyia thooꞌthioha cieeg hĩĩtõ terethiinit, hátĩ heelliaeet ngagĩĩt, hiittiõõ hõllõngaa hadĩman thooꞌthiok ꞌcĩg abathĩ hĩ baa nẽẽgĩ. 7Ma hiiginnu eet ꞌcĩg ala hẽlẽggĩ ꞌcĩg aar eeta hĩĩtõ nyekuꞌnya hĩ baa ala hĩbaangĩ, hĩcĩ eheeddi ꞌBuuhaa cĩ Nyekuci aĩ, “Baa aattĩg eeta loota nẽ udukto nẽ ũhũdĩt mẽrtĩ nẽ ĩtĩngaacõ ũrũgũmĩt hĩdĩmanit thooꞌthiok ꞌcĩg adĩman eeta ꞌcĩg hõllõngaa aga Nyekuc.”#Tigiil ꞌBuuk cĩ Luugithõõ 32:6 8Occa hõllõngaa hadĩman naag buúk thooꞌthiok ꞌcĩg ĩĩn ꞌriiring, hĩ baa adĩman eeta ũgẽẽgĩ hõrggẽẽnaa cĩnĩĩng nẽ waathĩna hõdẽẽthõng, iita adaahito aalibꞌnya hẽẽn ꞌramma hĩ iyyio (23,000) hõrggẽẽnaa cĩnĩĩng. 9Occa hõllõngaa hattĩman naag Makayyioohit hĩ baa attĩman eeta ũgẽẽgĩ hõrggẽẽnaa cĩnĩĩng nẽ iita adahit ĩhõõggõ hũkaaꞌnya.#10:9 Adahit ĩhõõggõ hũkaaꞌnya: Tigiil thõõth icci ꞌBuuhaa cĩ Tigiilẽttõõ 21:4-9. 10Nẽ ma hongoongoyyu hĩ baa õngõõngõ eeta ũgẽẽgĩ hõrggẽẽnaa cĩnĩĩng nẽ ikia uruk aajĩlõ cĩ daahĩthõõ#10:10 Aajĩlõ cĩ daahĩthõõ: Tigiil thõõth icci ꞌBuuhaa cĩ Tigiilẽttõõ 16:41-49. ĩhõõggõ.

11Baa adĩmanoothĩk thooꞌthioha cieeg ĩhõõggõ, hĩĩtõ terethiinit nẽ baa eheeddi loota hĩĩtõ tilooinit ꞌcĩ ilootteet ngagĩĩt eet ꞌcĩg hõbõktõõ hĩ decciaanĩt cĩ lootu ho. 12Nẽẽthĩ hoti ho, má ammuku niig ainnu okommu, uꞌthuutti thĩ eleeti, hátĩ hiittiõõ hõllõngaa etteeddu looc! 13Attĩmaniinnu niig ꞌgõõla hõdẽẽthõng, ĩĩcĩ attĩmaniini eeta vẽlẽk. Nẽẽthĩ, agayyi Nyekuci ngaatĩ occa hõllõngaa aaꞌnyuung ngagiit ĩttĩmattĩ gẽrrẽẽt nẽ eterꞌtheekuung hatĩ nẽẽ ꞌgõõl ꞌcĩ occa hatĩ aꞌnyamannu ꞌtĩmman.

Ũtũbũrĩt karrama cĩ ꞌgii ꞌcĩ aar eeta hĩĩ nyekuc

14ꞌGotoonoga hĩ ngoonoga, ma halayyu hẽlẽggĩ ꞌcĩg aar eeta hĩĩtõ nyekuꞌnya ho. 15Hothoothikuung naa ngagiit hĩ eeta ꞌcĩg agaacõ thõõth ꞌcĩ hothoothi naa ho ngaatĩ ĩĩnnĩ dĩdĩ. 16Ma hahũdĩ naag hooppoa ꞌcĩ hannẽẽkĩ Nyekuc ĩlaallẽ, hõllõngaa ĩĩn niccia ꞌgõõl ꞌcĩ hõthõlĩ biyyi cĩg Krĩstõ? Nẽ ma hẽꞌngẽr naag ũbũnĩ ꞌcĩ haduk thõng, hõllõngaa ĩĩn niccia ꞌgõõl ꞌcĩ hõthõlĩ naag ẽlẽ cĩ Krĩstõ? 17Hĩnĩngĩtĩ hõthõl naag ũbũnĩ hõdẽẽthõng, hiita hĩĩtõ naag ẽlẽ hõdẽẽthõng, tananga hĩĩgĩn mẽẽlĩg.

18Ummuhuttooth da nõõ eet cĩg Ĩꞌthĩraẽlĩ. Hõllõngaa nooyyia arũm eeta ꞌcĩg adak ꞌgaarrieenit altaarĩa eleeti thõng? 19Haini ꞌyioko naa ĩĩn ꞌgaarrieeniti ꞌcĩ ĩbboorothoothĩk ꞌgii ꞌcĩ aar eeta hĩĩ nyekuc ko ꞌgiimwa, hode haini ĩĩn ꞌgii ꞌcĩ aar eeta hĩĩ nyekuc ko ꞌgiimwa haaga? 20Aitiõõ ũdũt, nẽẽthĩ, ꞌgaarriẽẽna cĩg eet ꞌcĩg hõllõngaa aga Nyekuc, ĩbboorothoothĩk loriẽẽt ꞌcĩg abathĩ,#10:20 Loriẽẽt ꞌcĩg abathĩ: Baa ĩĩn cieeg aajĩlẽẽt ꞌcĩg baag arũmĩ hĩ Nyekuc hẽẽtahujjieen nẽ iita ũtũbũrĩt nẽẽg Nyekuc, nĩngĩtĩ iiggiaĩ Nyekuci ĩhõõggõ hẽẽtahujjieen. Nẽ ꞌyioko, iita accananit loriẽẽta cieeg eet loota nĩnga. Tigiil ꞌBuuk cĩ Terethiitto 12:7-9. hõllõngaa ĩbboorothoothĩk Nyekuc nẽ hõllõngaa hadiimmuung naa ngagiit otholit ꞌgaarriẽẽn hĩ loriẽẽt ꞌcĩg abathĩ. 21Occa hõllõngaa ahũdeennu niig hooppo cĩ Makayyiookto nẽ uhuddiooyyu hooppo cĩ loriẽẽt ꞌcĩg abathĩ buúk. Occa hõllõngaa othollu niig tẽrẽmẽẽja cĩ Makayyiookto hĩ tẽrẽmẽẽja cĩ loriẽẽt ꞌcĩg abathĩ buúk. 22Hadiim occa naag hĩkõõtha nyigarthẽẽt cĩ Makayyiookto? Hattiran naag hĩllõõan Makayyioohit?

Ĩdĩhĩthĩt Nyekuc hõdõõkõthĩ

23Ainnu niig ũgẽẽgĩ, “Occa hadĩmanna ꞌgii vẽlẽk hĩcĩ hadiimma!” Nẽẽthĩ haduhaakuung dĩdĩ, hõllõngaa occa abũnnaa hode eelluung hẽlẽggĩ vẽlẽk. 24Aitiõõ ẽẽtĩ ꞌcĩ occa adiim bũnnai cĩ ẽlẽ cĩnnĩ ẽmmẽn tõõ, nẽẽthĩ, occa adiim nẽẽ bũnnai cĩ ꞌgõõnõgĩ ũgĩ buúk.

25Adahit ꞌgii vẽlẽk ꞌcĩ ũũtĩ ꞌcuuhaa cĩ idiingo,#10:25 ꞌCuuk cĩ idiingo: Ĩĩn ciee ꞌcuuk ꞌcĩ ũũtẽnĩ eeta iding ꞌcĩ ĩbboorothoothĩk hẽlẽggĩ ꞌcĩg ẽhẽnyta eeta hĩĩ nyekuꞌnya. hĩllõõan ngaatĩ aꞌnyaku muhẽẽnĩt ꞌcĩ aĩ, aku baa idingi ciee ĩĩna. 26Hĩnĩngĩtĩ eheeddi ꞌBuuhaa cĩ Nyekuci aĩ, “Ĩĩn lõõcĩ hĩ hẽlẽggĩ vẽlẽk ꞌcĩg aattĩg loota nĩnga cĩg Makayyiooktak.”#Tigiil ꞌBuuk cĩ Tegellwaanu 24:1

27Má avvaanni ẽẽtĩ umwaa ꞌcĩ hõllõngaa ĩĩn lemmioohit ꞌgẽẽna nẽ idiim uuhu, bĩĩt nẽẽ nii daak ꞌgẽẽn vẽlẽk ꞌcĩ aaꞌnyĩhoothĩkiina nẽ ma haallahi jinẽẽnĩt umwa ꞌcĩ aku ꞌthĩnĩtaa cunni. 28Nẽẽthĩ, má iinnihii eet umwaa, “Iding ꞌcĩ baa ĩbboorothoothĩk nyekuc ꞌcĩ hõllõngaa ĩĩn dĩdĩ cieeni,” ma thĩ hadahi, hátĩ ẽla ẽlẽ cunni hĩ eet ꞌcĩ aduhaaki ho buúk. 29Hõllõngaa hothoothi naa thõõth cĩ ẽlẽ cunni, hothoothi naa thõõth cĩ eet ꞌcĩ aduhaaki nganiit ko. Inni occa hatĩ hĩbĩlĩ muhẽẽnĩtĩ cĩ ꞌthĩnĩt cĩ eet umwa, thõõth ꞌcĩ hadiim hadĩmani naa hĩcĩ hatabi ho? 30Má hadahi naa ꞌgẽẽn nẽ hĩĩnnĩha Nyekuc ĩlaallẽ, inni hutuburriaa eeta, hĩnĩngĩtĩ ꞌgẽẽn ꞌcĩ hannẽẽkĩ Nyekuc ĩlaallẽ ho?

31Nẽẽthĩ hoti ho, má aduheennu nẽ uhuddieeu hode adĩmannu hẽlẽggĩ ꞌcĩg adiimmu niiga, ĩdĩmanit ĩhõõggõ vẽlẽk hĩĩtõ bulẽẽnĩt cĩ Nyekuci. 32Ma haĩnanaannu eet umwa hẽttẽẽd looc, hode ꞌJudeeinit hode ꞌGiriheenit hode lothippit cĩ lemmiook cĩg Nyekuci, 33tananga hĩcĩ hattĩmani naa haaꞌnyĩk eet haccamattoothĩk ꞌgoolliohĩ vẽlẽk. Hĩnĩngĩtĩ hõllõngaa hadiimi naa bũnnai caannĩ dioo, hadiimi bũnnai cĩ eet ꞌcĩg mẽẽlĩg, hátĩ heellia nẽẽgĩ.

Currently Selected:

1 Korinthia 10: did

Highlight

Copy

Compare