Саалтыр 103
103
1Алҕаа, дууһам миэнэ, Айыы Тойону.
Айыы Тойон Таҥарам, Эн сөҕүмэр сүҥкэҥҥин,
2Эн албан ааты, кэрэмэн килбиэни кэппиккин,
туналҕан сырдыгы таҥныбыккын;
Эн халлааны сарыы суртуу тэниччи тарпыккын,
3үөһэ баар уораҕайгын уу үрдүнэн туруорбуккун;
Эн, былыттары колесница оҥостоҥҥун,
тыал кынаттарыгар уйдаран айанныыгын,
4Тыалы-кууһу Эн илдьит гынаҕын,
уоту-төлөнү дьөһүөлдьүт оҥостоҕун.
5Эн сири бигэтик туруорбуккун,
онон сир үйэлэр тухары тулхадыйыа суоҕа.
6Кинини дириҥ уунан, таҥаһынан курдук, бүрүйбүккүн;
бэл хайалар үрдүлэригэр уу турар.
7Сүүр диэҥ эрэ кэрэх, уу сүүрбүтүнэн барар,
Эн сүллэр этиҥиҥ этэриттэн киэр куотар.
8Хайаҕа өрө сүүрэн тахсар, хочоҕо холдьугураан түһэр,
Эн анаабыт сиргэр тиийэр.
9Киниэхэ туораабат чэрчитин быһаҥҥын,
хат төннөн кэлэн сири саба халыйар кыаҕа суох.
10Эн үрүйэлэри хочолорго сүүрдэҥҥин,
томтордор быыстарынан кылыгырыы усталлар,
11хонуу кыылын-сүөлүн барытын уулаталлар;
дьиикэй оселлар эмиэ онтон утахтарын ханнараллар;
12үрүйэлэр аттыларыгар көтөрдөр уйаланаллар,
сэбирдэх быыһа барыта – чыычаах күйгүөрэ.
13Эн үөһээҥҥи уораҕайгыттан хайаларга ардаҕы кутаҕын;
сир Эн үлэҥ түмүгүнэн дуоһуйар.
14Сүөһү сииригэр Эн оту үүннэрэҕин,
оттон киһи туһаланарыгар – үүнээйини,
онон аһылыгы сир таһаарар:
15киһи сүрэҕин үөрдэр арыгыны,
кини сирэйин сырдатар арыыны,
киниэхэ күүс-сэниэ киллэрэр килиэби.
16 Айыы Тойон мастара, Ливаҥҥа олордубут сыалаах мастара,
ардах уутун дуоһуйа иһэллэр.
17Кинилэргэ чыычаахтар уйаланаллар;
харыйаларга эһирдэр дьиэлэнэллэр.
18Үрдүк хайаларга дьиикэй козеллар олороллор;
таас очуостарга дамааннар хорҕойоллор.
19Эн, дьыл кэмин араарарга анаан, ыйы айбытыҥ;
күн хаһан арҕаалыырын билэр.
20Эн хараҥаны тэнитэ тартаххына, түүн буолар,
ойуур харамайа барыта дьаарбайа тахсар.
21Эдэр хахайдар булду сонордоон ырдьыгынаһаллар,
аһыыр астарын Таҥараттан көрдөһөллөр.
22Күн күөрэйиитэ кинилэр эргийэн кэлэллэр,
ордууларыгар киирэн сыталлар.
23Киһи үлэтигэр-хамнаһыгар тахсар,
киэһэриэр диэри кини үлэтигэр сылдьар.
24Элбэҕи да Эн оҥорбуккун, Айыы Тойон!
Барытын муударайдык айбыккын;
сир үрдэ барыта – Эн айымньыҥ.
25Ол уҥуора-маҥаара биллибэт улуу муора алаарыйар,
онно аата-ахса биллибэт харамай,
улахан да, кыра да, кыынньа оргуйар.
26Онно хараабыллар усталлар,
онно, муораҕа оонньоотун диэн,
Эн айбыт левиафаныҥ#103:26 Легендаҕа кэпсэнэр муора суостаах харамайа. көччүйэр.
27Аһыыр аспытын кэмигэр биэриэ диэн,
кинилэр бука бары Эйигин кэтэһэллэр.
28Биэрдэххинэ – ылаллар,
ытыскын астаххына – үтүө бэлэххинэн дуоһуйаллар;
29киэр хайыстаххына – айманаллар,
тыыннарын ыллаххына – өлөллөр,
буордарыгар төннөллөр.
30Оттон Тыыҥҥын ыыттаххына – айыллаллар;
ол курдук Эн сир ньуурун саҥардан биэрэҕин.
31Албан аат буоллун Айыы Тойоҥҥо үйэттэн үйэлэр тухары!
Үөрүөхтүн Айыы Тойон Бэйэтин дьайыыларыттан!
32Кини сири көрдөҕүнэ, сир титирэстиир,
Кини хайаны таарыйдаҕына, хайа буруолуур.
33 Айыы Тойоҥҥо мин ыллыам тыыннааҕым тухары,
Таҥарабар айхал ыллыам баарым тухары.
34Мин ырыам Киниэхэ сүрэҕин ортотунан киириэхтин;
Айыы Тойонтон мин үөрүөҕүм-көтүөҕүм.
35Сир үрдүттэн сүттүннэр тосту-туора быһыылаахтар,
суох буоллуннар аны хара дьайдаахтар.
Алҕаа, дууһам миэнэ, Айыы Тойону.
Аллилуия.
Currently Selected:
Саалтыр 103: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
