Саалтыр 102
102
1Давид псалома.
Алҕаа, дууһам миэнэ, Айыы Тойону,
бүтүн сүрэҕим-быарым – Кини сибэтиэй аатын.
2Алҕаа, дууһам миэнэ, Айыы Тойону,
умнума Кини бары үтүө дьайыытын.
3Кини эн бары буруйгун бырастыы гынар,
бары ыарыыгыттан эйигин үтүөрдэр.
4Кини эн олоххун иинтэн өрүһүйэр,
эйигин таптыырын, аһынарын көрдөрөр.
5Үйэҥ тухары эйигин үтүөнэн дуоһутар,
онон, хотой курдук, эдэргэр түһэҕин.
6 Айыы Тойон көнөтүк дьүүллүүр,
бары баттаммыттар кырдьыктарын көмүскүүр.
7Кини Бэйэтин суолларын Моисейга биллэрбитэ,
оҥорор дьайыыларын Израиль норуотугар көрдөрбүтэ.
8 Айыы Тойон аһыныгас сүрэхтээх, амарах санаалаах,
улуу тулуурдаах, муҥурун булларбат бигэ тапталлаах.
9Кини уһугар тиийэ уордайбат,
үйэ-саас тухары кыыһыра сылдьыбат.
10Биһиги аньыыбытыгар тоҕоостоох харданы Кини оҥорботоҕо,
биһиги буруйбутугар сөптөөх төлөбүрү ылбатаҕа.
11Халлаан сиртэн үрдүгүн саҕа улуу бигэ тапталы
Киниттэн куттанар дьоҥҥо Кини көрдөрөр.
12Илин арҕааттан ырааҕын саҕа ыраатыннарда
Кини биһигиттэн бары аньыыбытын-буруйбутун.
13Аҕа оҕолоругар амараҕын курдук,
Айыы Тойон Киниттэн толлор дьоҥҥо амарах.
14Кини биһиги туохтан турарбытын билэр,
биһиги быыл эрэ буоларбытын өйдүүр.
15Киһи үйэтэ – от үйэтэ,
сир симэҕинии, кини иинэр-кэхтэр.
16Үрдүнэн тыал илгийиэн эрэ кэрэх, мэлийэр,
үүммүт сирэ-уота аны кинини билиммэт буолар.
17Оттон Айыы Тойон Киниттэн толлор дьоҥҥо таптала
үйэттэн үйэлэргэ уларыйбат,
Кини кырдьыктаах сыһыана
кинилэр оҕолорун оҕолоругар кубулуйбат –
18Кини кэс тылын тутуһааччыларга,
кэриэстэрин умнубакка толорооччуларга.
19 Айыы Тойон бүрүстүөлүн халлааннарга туруорбута;
баар барыта – Кини Саарыстыбатын бас билиитэ.
20Алҕааҥ Айыы Тойону, Кини Аанньаллара,
саҥатын истээт да, тылын толорор күүстээхтэрэ.
21Алҕааҥ Айыы Тойону, бары сэриилэрэ,
Кини көҥүлүн толорор үлэһиттэрэ.
22Алҕаа Айыы Тойону, айбыта бука барыта,
Кини баһылыыр эйгэтигэр бүттүүнүгэр.
Алҕаа, дууһам миэнэ, Айыы Тойону.
Currently Selected:
Саалтыр 102: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
