Саалтыр 104
104
1Айхаллааҥ Айыы Тойону, ыҥырыҥ Кини аатын,
норуоттар ортолоругар биллэриҥ Кини дьайыытын.
2Ыллааҥ Киниэхэ, айхаллааҥ Кинини;
кэпсээҥ Кини оҥорор бары дьиктитин.
3Күөн туттуҥ Кини сибэтиэй аатынан;
үөрүөхтүн Айыы Тойону көрдөөччүлэр сүрэхтэрэ.
4Көрдөөҥ Айыы Тойону, Кини күүһүн,
көрдөөҥ Кинини өрүүтүн.
5Өйдүү сылдьыҥ Кини оҥорбут дьиктилэрин,
көрдөрбүт бэлиэлэрин, дьүүллээбит дьүүллэрин,
6эһиги, Кини кулутун Авраам удьуордара,
Иаков уолаттара, Кини талыылаахтара.
7Кини биһиги Айыы Тойон Таҥарабыт;
Кини бүтүн сир устун дьүүллүүр.
8Үйэлэр тухары Кини өйдүүр эппит кэс тылын –
тыһыынча көлүөнэҕэ ыйбытын-кэрдибитин,
9Авраамныын оҥорсубут сөбүлэһиитин,
Исаакка биэрбит андаҕарын.
10Кини ону Иаковка сокуон быһыытынан,
Израильга мэҥэ кэс тыл быһыытынан бигэргэппитэ.
11Кини эппитэ: «Мин эйиэхэ Ханаан сирин бэлэхтиэм,
бас билэр өлбүгэҥ сиэринэн быһан биэриэм».
12Өссө ахсааннаах эрэ эрдэхтэринэ,
олох аҕыйах эрдэхтэринэ, онно кэлии дьон буолан,
13норуоттан норуокка,
саарыстыбаттан саарыстыбаҕа көһө сырыттахтарына,
14Кини кимиэхэ да кинилэри атаҕастаппатаҕа;
ыраахтааҕылары буойталыыра:
15«Мин талан ылбыт дьоммун тыытымаҥ,
пророктарбар куһаҕаны оҥорумаҥ».
16Кини сиргэ суту ыҥырбыта,
бурдук хас биирдии умнаһын суох оҥорбута.
17Ол эрэн кинилэр иннилэригэр киһини ыыппыта:
Иосибы кулуттааһыҥҥа атыылаабыттара.
18Кини атаҕын хандалынан бохсубуттара,
моонньугар тимир тиэрбэһи кэтэрпиттэрэ;
19кини өтө көрөн эппитэ туолуор диэри,
Айыы Тойон тыла кинини тургутара.
20Ыраахтааҕы, киһи ыытан, кини хандалытын уһултарбыта,
норуоттар баһылыктара кинини көҥүлгэ таһаартарбыта;
21тойон оҥорон, бэйэтин дьиэтин-уотун дьаһайтарбыта,
бас билэр сирин барытын салайтарбыта;
22үрдүк сололоохторун киниэхэ үөрэттэрбитэ,
аҕа баһылыктарын муудараска уһуйтарбыта.
23Онтон Египеккэ Израиль кэлбитэ,
Иаков Хам#104:23 Ной уолаттарыттан биирдэстэрэ, Египет норуотун төрдө. сиригэр көһөн олорбута.
24 Айыы Тойон, норуотун үтүмэнник үксэтэн,
өстөөхтөрүн бүгүлүүрдүү күүһүрпүтэ;
25онтон кинилэри Египет дьонугар абааһы көрдөрөн,
олор Кини кулуттарын албынныыр буолбуттара.
26Онуоха Кини кулутун Моисейы уонна
талан ылбыт киһитин Аарону ыыппыта.
27Хам сиригэр кинилэр Таҥара бэлиэ дьайыыларын,
араас дьиктини көрдөрбүттэрэ.
28Таҥара, хараҥаны ыытан, им балайы түһэрбитэ,
ол да үрдүнэн Египет дьоно Кини тылын истибэтэхтэрэ.
29Онтон Кини, ууларын хааҥҥа кубулутан,
балыктарын тумнарбыта.
30Сирдэрэ-уоттара бардырҕас баҕа буолбута,
бэл ыраахтааҕыларын утуйар хосторо кытта туолбута.
31Кини эппитигэр, сахсырҕа халыҥ былыта кэлбитэ,
дойдуну биир гына кумаар түспүтэ.
32Ардах оннугар кинилэргэ толону ыыппыта,
чаҕылҕан уотунан сирдэрин дапсыйбыта.
33Виноградниктарын, смоковницаларын эспитэ,
сирдэрин устун мастарын суулларбыта.
34Кини эппитигэр, саранча үөрэ саба көтөн кэлбитэ,
түүлээх үөн кыама суох ыһан кэбиспитэ,
35онон дойдуларын ото-маһа барыта кэрбэнэн бүппүтэ,
буолактарын бурдугуттан туох да орпотоҕо.
36Кини Египет бары ыалларын бастыҥ күүһүн,
бастакы уолаттарын, өлөртөөбүтэ.
37Дьэ онтон Израиль дьонун Египеттэн таһаарбыта;
кинилэр үрүҥ да, кыһыл да көмүһү илдьэ барбыттара,
итиччэ киһиттэн хайалара да дубук үктээбэтэҕэ.
38Израиль уолаттарыттан кыраҕыйар буоланнар,
Египет дьоно кинилэр барбыттарыгар үөрбүттэрэ.
39Таҥара, норуоппар хахха буоллун диэн, былыты таһаарбыта,
түүн сырдык буоллун диэн, уоту сандаардыбыта.
40Көрдөспүттэригэр, хонуу куруппааскыларын ыыппыта,
халлаан килиэбинэн кинилэри дуоһуппута.
41Кини тааһы хайа охсубутугар, уу сүүрбүтэ,
хаппыт сир устун өрүс курдук, күллүгүрүү устубута.
42Кулутугар Авраамҥа эппит ытык тылын
Кини ол курдук өйдүү сылдьара.
43Онон норуотун үөрдэ-көтүтэ илдьэ барбыта,
талан ылбыт дьонун ырыа аргыстаах таһаарбыта.
44-45Ыйаахтарбын толорор кыахтанныннар,
сокуоннарбын тутуһар буоллуннар диэн,
кинилэргэ норуоттар сирдэрин биэрбитэ,
атын омуктар үлэлэрин түмүгүн бас биллэрбитэ.
Аллилуия.
Currently Selected:
Саалтыр 104: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
