ROMMI 16

Luthu lo Petha Tsukeu

1Ino nongu lau ni-chepukishiu Foibe kilethisuvetsu ani, liye Kenkhria kukuhoulo dikon limi lakhi. 2Ike nonguno Alhou timi sasulu ketoi Ampeu lono li sasutsulo, eno lino nongu launo kiu avehupushi aghini keno li kuphutsulo, kughengu liye timi kutomo kuphuchekemi eno tihutoi ikuphu chenie. 3Priskila ngo Akuila pama lau petha tsu ani. Pamaye Jisu Khristo lono kumtsa mla chekemi ikusamike. #Aposto 18.2; Mk 15.21 4Ikuxu ghenguno pama kutsu luvetsu nicheghi. Ilikhino kumo puzu Judakumomi kukuhou kumtsuno pama shikimthi ani. 5Pama kilo akukuho shichekemi ghi petha tsu ani. Ino kimiyechekeu Epaneita, Asia yeghi kokutha bocholo Khristo pululukemi atughiuke pa ghi petha tsu ani. 6Nongu gholo aka-aveshi mla achekeu Maria lau petha tsu ani. 7Andronika ngo Junia pamaye akusami Judami, igholo kumtsa akughulo acheke, pama lau petha tsu ani. Pamaye Apostolmi no akivishi ithiakemi, eno pamaye izuuno Khristomi shiluvekemi. 8Ampeu lono ino kimiyechekeu Amfiata lau petha tsu ani. 9Khristo lono kumtsa mlachekemi ikusau Urbana lau petha tsu ani, eno ino kimiyechekeu Stakhu petha tsu ani. 10Ino kimiyechekeu Apelle lau petha tsu ani pano Khristo qhoqhuchekeu hu ikhikulupu shivae. Aristobolu kibolo akeqo vilo petha tsu ani. 11Nikusau Judami Herodion lau petha tsu ani, eno Narkisa nobolomi khije Khristo lo athikuzumi akhani keno petha tsu ani. 12Ampeu kumla kishimi Trofina ngo Trofosa pama lau petha tsu ani. Kimiyechekeu Persi lau petha tsu ani, paye Ampeu ghenguno aka aveshi mlacheke. 13Ampeu kumlalo atsukupushi achekeu Rufa lau petha tsu ani, eno pa za lau ghi tsu ani. Lino panu toi ituchoheju cheke. 14Asunkrita, Flegon, Herme, Patroba, Herma eno panoqo gholo athikuzumi akeqo lau petha tsu ani. 15Filologo, Julia, Nereu eno pa chepu Olimpa eno kupulumi panoqo gholo akeqo lau petha tsu ani. 16Akimthe lono mumakeu pesu lakhino lakhi petha tsukilelo. Khristo kukuhou kumtsuno nongu lau petha tsu anie.

Ashekha Kukutsutsa

17Athikuzumiqo, ino nongu qhuiniju anike, khunoqono kijethakile eno timi kupulu kutakihi acheni, eno khunoqono nonguno akukutsu ithuluvekeu hu mujochile ishi cheni keno jukutolo, eno panoqo launo putosuvelo. 18Kughengu timi tishi chekemiqoye ningu Mpeu Khristo qe amoe, ikemu panongu kive likhi qe ani. Panonguno ghaghu tsa kuju pesu akukumsu ilaleikemiqo pishiqhi cheni. 19Nonguno atsa kiviu gholukeu kumtsuno ithi ani, tishikehu nongu shou ilovi ani. Niye nongu pelo kiuno tiche-tighe kuhakeu akivi keno tipaulo alotsu penishi, ikemu kiuno alhoksa keno tipau kumomthakeu shipenishi. 20Tishiaye, alokughuno tsuchekeu Lhou no Satan pesu itheno nongu pukhu qholo nedaqhilu nani. Ampeu Jisu wu kupukini nongu gholo apelo.

21Isasu kumtsa mlachekeu ikusau Timothi no nongu petha tsu ani, tihutoi Judami ikusami Lukia, Jason, Sasipeter ishi ghi petha nongu tsu ani.

22Yesu hipau yeakeu ni, Tertia no Khristomi no petha tsukilekeu pesu nongu tsu ani.

23Ino wuakeu kiampiu Gayia, khuu kilono akukuho shicheni keno, pano petha nongu tsu ani. Aphughilo akinipighiu Erasta ngo ni thikuzuu Kuarta pama ghi petha nongu tsu ani.

24(Ampeu Jisu Khristo wu kupukini nongu kumtsu gholo alupelo.Amen.)

Ashekhalo Sheqhekeu Kighini

25Itehiye ino Atsakiviu eno Jisu Khristo ghili pikulhache keu kiqi lono nongu shikumtolu chekeu lau eno mzamghaleyi pephepiyekeu khikhi tiqheli kushuwa kutolo kusupe acheke, 26ikemu itehiye lhapheveake, eno Alhou launo tungkuptsa yepuakeqo vechewo ashiayeh kumtsu lau pithiveake, ti lhokta Lhou no ahzakutsu shikeu kiqi lono, akupulu shi aghokulushi ighi penikeu ghili, 27khuu likhino Alhou eno khuu likhino alokutsu keno, Jisu Khristo vechewo pulhapuju ajukuvu-jekipi shitsulo! Amen.

Currently Selected:

ROMMI 16: SUMIBSI

Highlight

Copy