ROMMI 15

Kutami Pulou Shilo

1Ningu khunoqo akupululo akumto shi ani keno tomochhimo keqono ikiqivekelo puqhetsu kepu, eno nilikhi nighoapulou shikepu kumoe. 2Ningu lakhi khino akusami ghoapulou eno panoqo kivipu shitsu kepue, tishianguno akupululo pa xaqheputhuni kehu. 3Kughengu Khristo ye pa likhi pagho apulou shimoe. Tishinike zuqhu kuchoyesulo ishi yepuani: “Khunoqono othaigha cheni keno panonguno thaighakeu ishou iluqi ikughie.” #Leshe 69.9 4Tighenguno puzuu kuchoyesulo khijehi yepuani keno ningu shikapenike yepuani, tishianguno kuchoyesulo kheakulu eno shikumtokile akeu ningu tsukeu vechewo ningu pelo lajupu apeniyeke. 5Kheakulu eno shikumto tsu chekeu Lhou pelo nongu gholo Jisu Khristo kuxu ghola papesu akukumsulo aphiphi shilupekepu nongu kophetsu peniu, 6tishiaye nongu kumtsu kuqhano asutsa lakhi shi puzu niMpeu Jisu Khristo paPuh Alhou sheqhe peniu.

Judakumomi lau Atsakiviu

7Tighenguno Alhou jukuvupushi Khristo no nongu ikhiluketoi, nongu lakhino lakhi ikhilukilelo. 8Kughengu ino nongu vilo piakeuno Khristo ye Judami qeu lakhi shive puzu Alhou ye pukhube lukeu kepi piyeni ke eno apu-asu lau piqhipuakeu hu shikumtoniyeke. 9Judakumomi ghi Alhou no qhuivulayi keulo pa sheqhepeniyeke. Kuchoyesulo ishi yepuakeu toi:

“Tighenguno Judakumomi gholo ino shikimthikeu

otsuniyeke, ino oje shipilini.” #2 Samu 22.50; Leshe 18.49 10Itaghi ishi pipuani,

“Nongu Judakumomiqo,

Alhou no kisheluvekemiqo gholo alovi lo!” #Zaki 32.43 11Eno itaghi pipuakeu,

“Judakumomi kumtsu Ampeu shelo, timi kumtsuno shishe pa shelo!” #Leshe 117.1 12Itaghi Isaya no ishi pi,

“Jese polo kughuko lakhi ighi nani,

pano Judakumomi shou ayeh penike ipeghi nani,

eno Judakumomi wu lajupu pa shou qhi nani.” #Isa 11.10

13Lajupu tsuchekeu Lhou pelo nonguno puluakeu vechewo alokivi eno alokughuno pesu nongu lolo shepichhitsu apeniu, tishikeuno Aghungu Kimthe kuka vechewo nongu wu lajupu heshelu penike.

Paul mlo Kuloghi

14Ithikuzumiqo, niye nongu ghili chilu puzu ighakiqi shi akeuno, nonguye akivipuno chhitoi ani, eno ninguye akighithi kutomo xapusu chhitoi ani eno lakhino lakhi shikakilelu nanie. 15Ikemu yesu hipaulo tsatsayi nongu loputsu kithekeu shi avehu akhoto hami ghenguye amlo kumto suno nongu lau yevae. Ino amlo kumto shiakeuye kutau ghenguno kumono 16Judakumomi kudau Jisu Khristo qeu shipenike Alhou launo ighikeu tsakiviu pikulhakeu lono niye achinemi kumlho shi ani, tishianguno Judakumomi pelo Alhou no ikhikulupu akumllagho lakhi shilupe, eno Alhou lau Aghungu Kimthe no shikimthe pesu tsukeu shilupeniye ke. 17Jisu Khristo sasu kuqhape akeulo, Alhou ghenguno mlakeulo niye akijivilo ani. 18Niye kutau kiumu piakepu kuhake, ikemu imlo kumtoshi pikulupu akeuye Khristo no ipeitha puzu, atsapilo, akughuthalo, amchipu, akumzapu shikeulo eno Aghungu Kimthe kuka ishi lono Judakumomi Alhou ghokululo saphe piyelupeke. 19Tishikehu Jerusalem lono homuxa susu Ilurikiam qha hokumxa kutolo, niye Khristo tsakiviu pesu hipaqha kuchopulo kutughuvae. 20Pulhapuju ilokumsushi achekeuye a-a khilehi Khristo je chimlano aghinikeno Atsakiviu pesu tilehi kutughu nikeu shi acheni,tiye kutau kumono khualano aboqha qhave aghikeu shou shipukumoni kehue. 21Kuchoyesulo pipuakeu toi,

“Khunoqo vilo pa ghili pimphi keno tipaqono chilu nani,

khunoqono ithumla aphi keno tipanoqono ithikuthulu nani.” #Isa 52.15

Rom lo Wunikeu Kukughu

22Hi ghenguno ghuthu kutomo nongu lau ighiniye kuto akeu lono ivekhape auve chenike. #Rom 1.13 23Ikemu itehiye hipaqhalo ikumla ashe tovae, eno ampe kushuwa lono nongu lau ighinikeu puloqhiyi acheni ishi kehu, 24ino Spein lo wuche kikije lono nongu sasu kusholu nike laju ani. Ino nongu gholono alokivi shilu nongu kukuphu luno Spein lo wuni cheni. 25Ikemu tipa zuuno niye Jerusalem lo kupulumiqo vehupu shiwu paghini cheni. 26Kughengu Makedonia ngo Akhaia qhalo akukuhou qono amlokiqishi puzu Jerusalem lo kupulumiqo gholo kumlhomi akeqo kuphupenike agho qhakutsue. #1 Kori 16.1-4 27Panonguno hi shikeu amlo kiqishi, kuchouno panonguye kumlhomiqo kuphukuzue, kughengu Judami no kukumgha ngu-agha pesu Judakumomi sasu kusajeke, ikehu Judakumomi ghi panongu kukumgha tinhemgha akeu hu pesu Judamiqo huthu kepue. #1 Kori 9.11 28Tighenguno ino kughono hipau kumlapu saje shitaveni keno, eno kiu qhape puanikeno tipaqo kumtsu xapuwo panoqo tsuve kethino, niye Spein lo wuni cheni, eno tila wuche kelono nongu putsani. 29Ino ithi ani, kughou ino nongu lau ighini keno niye Khristo kukumghano chhikhoi shino nongu lau ighini. 30Athikuzumiqo! ningu Mpeu Jisu Khristo ngo Aghungu no kimiye tsukeu lono ino hi nongu qhuiniju ani: Igholo kutupo ghi ighenguno Alhou lau akighini shitsu alo. 31Judia yeghilo kupulukumomiqo launo ixapheluve penike eno Jerusalem lo kupulumiqo pelo ino tilau kiu mlanikeno ikhikulupu shipenike inikhu tsulo, 32tishianguno Alhou pulou shi aghi aye ipelo alokivi shi ighino nongu gholono aloshiputsuni. 33Alokughuno tsukeu Lhou pelo nongu kumtsu gholo apeniu. Amen.

Currently Selected:

ROMMI 15: SUMIBSI

Highlight

Copy