ROMMI 14

Athikuzumi Shou Kughakutha

1Nongu gholo timi khuuno akupululo miqemileyi anikeno pa ikhilulo, ikemu pa luthuno kumsupu akeulo kutsala kevilo. 2Milakhiye kiu kiumu chulu nani kepi pulu cheni, ikemu khuno akupululo miqemileyi keno ayetsuni likhi chuaghiluvi. 3Khuno thwokha chulu chenikeno paye thwokha chumokemi jukunatha kepu kumoe momu ayetsuni likhi chuchekeu huye thwokha chuchekeu shou kughathabe kepu kumoe; kughengu Alhou no pa ikhiluvae. 4No khuu keno kutami qemi shou kughabeni kya? Pa mipeu likhino paye ikulu ani keo iqive anikeno xatha nani, kughengu Ampeu no pa pelo ikuluve kepu shilu nani.

5Khami ghenguno atsala hamino kutau tsala nguno akhoto kutu shi cheni, ikemu kutamiye atsala kumtsu aphiphi shi kumsu acheni. Pututano alikhi akukumsulo mutotoi shiluve kepu. 6Khuuno atsala hamiye akhoto kepi tipa tsala ikhilu cheni keno Ampeu gihu ghi ti ikhilu ani. Thwokha chu chekeu timi ghi Ampeu gihu-ghi chu cheni, kughengu pano shikimthikeu Alhou lau tsue. Khuuno thwokha kumtsu chu chemo keno pa ghi Ampeu gihu ghi chu chemo, eno shikimthikeu Alhou lau tsue. #Kolo 2.16 7Ningu khumu pututa ghengu likhi xu achemo eno ningu pututa shelo likhi thive chemoe. 8Ninguno xua napiaye ninguye Ampeu ghenguno xunie, eno ninguno thive aye Ampeu ghenguno thinie. Tishiaye ninguno xuna thinamu ninguye Ampeu wuke. 9Kughengu Khristo no thiveno xukithethu shikeuye kuxumi ngo kithimi Mpeu shini kehuke. 10Noye kushiye othikuzu-u shou kughathakeu becheni kya? Momu noye kushiye othikuzuu jukunatha cheni kya? Ningu kumtsu Alhou tsakugha lakhu zulo puthugho nani. #2 Kori 5.10 11Kuchoyesulo ishi yepuani:

“Ampeu no ishi pi, ino xuanikeke timi kumtsu izulo qhoqhunhe nani, eno niye Alhou kepi timi kumtsuno akishe tsu nani.” #Isa 45.23 12Ike ningu lakhikhino pututa shelo Alhou lau kihikulai tsukepu shi nani.

Othikuzu pelo Iluqive Pekevilo

13Ikehu ningu lakhino lakhi shou kughathabekeu hu qhiveni nolo. Tipa zuqhulo, othikuzuu pelo shokukho kepu kiumu qhitsumoni momu axinelo ikiqipemoni. 14Ino Ampeu Jisu sasu kimepe akeu lono mutsuqhei ithilupe akeuno kiumu pa kutoshiye mithemokeu kumoe; ikemu timino kiukiu namu mithemoke ipi kumsu aye, tiye pa ghenguno mithemokeu shivae. 15Nono kiuala chukeu huno othikuzuu pelo kutusuvepe aye noye kimiyekeu lono chechemovae. Nono kiu chu cheni keno tipau pelo timi khuu ghenguno Khristo thivekeno tipau shipusavepe kevilo! 16Ikehu nono kiu pesu akivi pi cheni keno aje lhoksa thulupe kevilo. 17Kughengu Alhou kukaqhaye kuchu kusho vehuke kumoe ikemu Aghungu Kimthe no tsukeu mikucho ngo alakishi eno alokivi ishie. 18Khunono hipau ghola lono Khristo qenikeno Alhou no ikhi kulupu eno timi lopu shi ani.

19Tishiaye, kiu lono kulashilu eno lakhino lakhi shikumtolu cheni keno tipaqo hajuni nolo. 20Achuqupu ghenguno Alhou no mla puakeu kutsave kevilo. Achuqupu thwokha chuluvike, ikemu kiuala chukeu lono kutamino axinelo ikiqivekepu shiaghiaye tiye achipi kumoe. 21Othikuzuu pelo shokukholu pemonike ashi chumo, aji shomo momu kiumu shokukholu kepu shimo keuno achipi. 22Hipau vehulo nono kiu pulu cheni keno tipau Alhou ngo okujo dolo qhilo. Khunono pa pulou kiukeno pano shikeulo pa likhi pa shou kughathabe kepu shimokemi kumghae! 23Ikemu khuuno amlo lo ichikeu apulaghi chuni keno Alhou no pa ghusho anie, kughengu paye akupulu shou bemono shipuanie. Kiukiu pimu akupulu shou bepemoaye tiye axine ke.

Currently Selected:

ROMMI 14: SUMIBSI

Highlight

Copy