ROMMI 12

Alhou Kumla Shikeu Kuxu

1Ikehu ithikuzumiqo, Alhou wu qhuivulayi keu kutomo ningu lau akeu vechewono ino nongu vilo hi qhuiniju ani: Nongu phi-mpi pesu Alhou lau akuxuno mllakeugho shi-ghi qhitsulo, pa kumlapulo akimtheshi peitha penike eno pano ikhilu kuzupushi tsulo. Hino kuchou shi nonguno mlla kepue. 2Hipa yeghilomi ghola hakevilo ikemu nongu kukumsu shikithelukeu vechewo nongu lolo pekililulo. Tishiluaye Alhou pulouye kiuno akivipu, kiuno pano ikhilu kuzupu eno kupukulu keno nonguno ithi kututa shilu nani.

3Kughengu Alhou wu kupukini itsukeu vechewo ino nongu kumtsu vilo hi pi ani: Nongu khumu alikhi akughapesu qhemghai kumsukepu kumoe, ikemu pututano aghibiu lono kumsukepu, Alhou no akupulu lakhikhi tsupuakeu qhemi lono pututa likhi pututa shou xathabeluve kepue. 4Aphimpi lakhilo ninguye aphia-u jeli kutomo ani eno aphia-u jeli hipaqo kumtsu aphiphi lono peitha chemoe. 5Titoi, ningu ghi kutomo shi anamu ninguye Khristo lono kimepe aphi-mpi lakhi eno aphiauno kimepe akeu toi ningu lakhino lakhi sasu kimepe ani. #1 Kori 12.12 6Alhou no kupukini ningu tsukeu kiqi lono agho kututashi tsupuakeu ninguno peithani. Alhou launo tungkupu tsa pinikeu tsupuaghi aye ningu kupulu aghikeu qhemi tishi masa; 7kutami qekepushi aghi aye ninguno qemasa; shikakepu shiaghi aye ninguye shika masa. 8Kutami hakitekepu shiaghiaye ninguye hakitekile masa; khuno qhasutsu kepu shini keno ililai qhasutsu masa. Timi khuno sakiphemi shinikeno ichhe-ime mla masa. Khuno timi kupuqhiyikeu kumla shinikeno aloviqhiyi shimasa. #1 Kori 12.4-11

9Kimiyekilekeu hu mutsumishei shipelo. Kusakughaye mithilo eno akiviuye mutotoi tsuquluvelo. 10Athikuzumi kimiyekile ketoi nongu lakhino lakhi kimiyekilelo; gihukilenikeulo kuhakilelo. 11Azukinilo ghuthi suve mono, angu-agha thibuyimono Ampeu qe alo. 12Nongu lajupu akeu huno nongu pelo alokiqi shipelo, shilukusalo theqhikulu alo, akighinilo azuni alo. 13Nonguno aghikeu pesu kupulumi vehupu shi aghi keulo qhasutsulo; eno nonguye inami sasukinimi shilo.

14Nongu shikighimekemiqo kumghatsu lopi Alhou vilo khutsulo. Pa vilo tipaqo kumghatsupenike inikhu nithono musu ini penikeu khukelo. #Mt 5.44; Lk 6.28 15Alovi aghikemi gholo alovilo, qa-mlo aghikemi gholo qa-mlolo. 16Kumtsu sasu kuloni kughuvuyi xulo, qheza-laki kevilo, ikemu aqhokighepu kumlapu saje ikhilulo; #momu aqhokighemi gholo iqhoiqilo eno khilemu olikhi noye alokutsumi kepi kumsu kevilo. #Ahole 3.7

17Khualano oshou alhoksa mla aye, alhoksa pesu pa tsuchilekevilo. Timi kumtsuno kiu pesu akivi kepi cheni keno tipau shinikeu pukaputsalo. 18Toluke thaqhu, omuzuloye timi kumtsu sasu kulakishi lono xuanikeu shilo. 19Ino kimiyechekeqo, khilemu olikhi omukhu lukevilo, ikemu tiye Alhou loghulo pichevetsulo. Kughengu kuchoyesulo ishi yepuani: “Ino amukhulu nani, ino lochile nani, ipi Ampeu no pie.” #Zaki 32.35 20Ike tishinike zuqhulo, kuchoyesulo pike toi, “Oghumino mzuthi aye pa kughulhulo; pano tughuthiaye jehlo kughengu tishi keu lono nono ami hipe pa kutsu shou puku tsuanie.” #Ahole 25.21-22 21Alhoksa pelo nongu theqhiluvepe kevilo ikemu akivi pesu alhoksa theqhiluvelo.

Currently Selected:

ROMMI 12: SUMIBSI

Highlight

Copy