ROMMI 11

Alhou no Israilmi Qhuivu

1Tishiaye ino hi inijuni, Alhou ye pawu timiqo peve akesha? Khilemu tishimoe! Ni ampino Israilmi lakhi ke, Abraham polo kughukomi eno Benjamin laghami lakhie. #Fili 3.5 2Alhou ye inahuuno pano kisheluvekemi peve mphie. Kuchoyesulo Elija no Israilmi shou Alhou vilo qhuinijukeu kiu pipuani keno nonguno ithi ani: 3“Ampeu, panonguno tungkupmi pithivetsu, akumllagho kiptia xaleqhivetsu, ilikhi qhiveke eno ipithive nike ikuxu phu cheni.” #1 Kuka 19.10,14 4Ikemu Alhou ye kishi pa khochile kya? “Kichile lhou Baal zulo qhoqhunhe mokemi timi 7000 kutolo ino qhipe puani.” #1 Kuka 19.18 5Ikehu itodolo ghi tihutoi Alhou no aghulo ghupe qhipuakemi ani, Alhou no qhuivulayi kehu kishelue. 6Alhou no kishelukeu huye pano qhuivulayikeu shou anike thono panonguno shilukeu shou bepeamoe. Kughengu Alhou no kishelukeu hu timino shilukeu shou bepe ani aye Alhou wu qhuivulayi keuye kuchou shi qhuivulayikeu kumovae.

7Ike kishive kya? Israilmiye kiu phuchekeno phumlave; Alhou no amqo aghulo kishelukeqono ti phuluveno kutamiqoye Alhou no kukeu ini kikeve. 8Kuchoyesulo yepuake toi, “Alhou no panoqo mlo eno akukumsu izuvulayivepe, eno ishi kutolo panongu pelo ithumlavepe eno panongu pelo chimlave peke.” #Zaki 2.4; Isa 29.10 9David no pi:

“Panoqono tiqhetini shiake lono meluve eno khasuluve pelo,

aqoh lo ilulovepe eno ghimevepelo.

10Panongu nhethi tsukhomlavepe puzu panongu pelo ithulupe kevilo, eno shiluksano panongu ghutsu qachhe pelo!” #Leshe 69.22-23 11Ikehu ino iniju ani, Judami no shokukholukeuye veqhiauve peniye kesha? Khilemu tishi moe! Ikemu panonguno axine shivekeu lono Judakumomi lau xakulupu ighi, ti Judami pelo panoqo jupe anheshupeniyeke. 12Judamino axine shivekeu lono ayeghiqha shou kukumgha kinikulushi sughi, eno panoqono iluqivekeu lono Judakumomi lau kukumgha kinikulushi sughi aye, Judami khije ighikepu anikeno kumtsu kihisuluveaye kumghakeu alau anani!

Judakumomi Xakulupu

13Itehiye nongu Judakumomi vilo ino hi piani: Judakumomi ghenguno ino apostol shiakeu kutolo niye ikumlalo akijivilo anani. 14Tishikeu lono nishiaye Judami pelo anheshu peni cheni, eno tipau lono panoqo khami likhimu xalukepu shini. 15Kughengu panongu peve keuno ayeghiqhano Alhou sasu kulashiluaye, panongu ikhiluvekeuloye kiu shive nani kya? Hiye kithimi ghengu ghi akuxu shilu niae!

16Asho sukupho atughiu pesu Alhou lau shikimthe keushiaye, ti ashopa akuchopu pa wu ake. Asubo lakhi kuhu pesu Alhou vehupulo peithape nikeu shiveaye alokaqo ghi pawu ake. 17Pighichekeu Oliv subolo aloka hamino icheiqiveke aghalo Oliv loka suwo tipaulo kimepeqhi. Nongu Judakumomi qoye aghalo Oliv loka toi kemu itehiye Judami kuxulo kinikulu kumto kusajelu anie. 18Tighenguno nonguye aloka icheiqive ke paphiqo thaigha kepu kumoe. Nonguno qheza aye, nonguno akuhu puqhepe anike kumoe, ikemu akuhuno nongu alokaqo puqhepe anike ipi kumsululo.

19Ikemu nonguno ishi pi nani. “Alokaqo icheiqive keuye ipelo kimelupeniyeke.” 20Tiye kuchoue. Panonguno icheiqivekeuye pulumo keghenguno ikemu nono tishilu kehu akupulu likhi vechewono ke. Ikehu qheza akepu kumono ighuqhiyi akepue. 21Kughengu Alhou no hi alho lono acheghikeu loka, Judami thotsu ghumove aye, paye nongu qhimove nani. 22Alhou ye kishi kimiyekini eno mughachhoi keno hileno ithi: iluqivekemiqo lau paye mughachhoi, ikemu nongu lau kimiyekeu ae, tsala nonguno pawu kimiyekinilo cheche aye ta, ikemu tikumoaye nongu ghi micheve nani. 23Eno icheiqivekeqo pinamu panonguno panoqo kupulukumo pheveaye itaghi kimekitheve nani, kughengu Alhou ye panoqo kimekithevetsu kepu kuka ani. 24Nongu Judakumomi ye, alho lono aghalo Oliv subo kemu michepewo alholo aye hexa ghi, pighichekeu Oliv subolo kimepuku puakeu toike. Judami ye alho lono pighichekeu Oliv subo toike, eno Alhou ghenguye hi icheiqivekeu loka pa likhi pa bolo kimekitheveni keu mulaleike.

Alhou wu Kupukini

25Ithikuzumiqo Alhou wu tuqhou kukughu lakhi anike ino nongu pelo ithipenishi ani, nonguno nongu lokutsu alotsuh shipeuve nosake. Tiye hi kene; Israilmi shou amlo hekikekeu ikughi akeuye Judakumomi khije Alhou lau ighikepushi ani keno tipaqo ighikupu mphi kutolo likhike. 26Ikehu Israilmi kumtsu xaluve nani, kuchoyesulo pipuakeu toi:

“Zion lono xakuluu ighi nani Pano Jakob polo kughukomi launo kusakugha kumtsu haphevetsu nani. #Isa 59.20

27Kughou ino panoqo xine ikhipeve tsuni keno, hipauno panoqo sasu iwu puloshoqhi shi nani.” #Jere 31.33-34 28Judamiqoye nongu Judakumomi ghenguno Alhou ghumi, tiye panonguno Atsakiviu peveke. Ikemu panongu puasu ghenguno panonguye Alhou no qhuivulayi keqoe, tiye Alhou no kishepheluve keu. 29Kughengu Alhou no kupukini shi aghotsuvekeu eno pano kuluve keuye xakidevemlae. 30Nongu Judakumomi, wovekeu loye nongu ghi Alhou hebide cheke, ikemu Judami ghokulukumo ghenguno itehiye Alhou wu qhuivulayi keu nonguno ithuluvae. 31Ikehu panonguno agholumono achekeu huye Alhou no qhuivulayi keu nongu lau piyekeu lono itehiye panongu ghi Alhou no qhuivulayi keu ithulupe niyeke. 32Kughengu Alhou no timi kumtsu pesu aghokulukumolo akughumi shivepe, tishianguno kumtsu shou qhuivulayi keu piyeniyeke.

Alhou Akishe Tsu

33Alhou wu kuakiniye kiutoi akumzapu kela! Pa lokutsu eno pa kighithiye kiutoi kuthokuzu kela! Pano kughathakeu khuno lhekide kudailu kepu eno pano khile kishi cheni kela khuno ithikuthu kulupu kya? #Isa 55.8 34Kuchoyesulo pipuakeu toi:

“Khuno Ampeu kukumsu ithi kya? Momu khuno pa kukumsu mijekutsuu kya? #Isa 40.13

35Khuno agho pa tsuju puzu pa pelo tsuchilekeu shipe kya?” #Job 41.11 36Kughengu thwokha kumtsu pa launo ighi, thwokha kumtsu pa vechewo ani eno thwokha kumtsu pa launo kishekha ani.Alhou lau akimthe jekipi pulhapuju apelo! Amen. #1 Kori 8.6

Currently Selected:

ROMMI 11: SUMIBSI

Highlight

Copy