Popular Bible Verses from ROMMI 12

Share

Hipa yeghilomi ghola hakevilo ikemu nongu kukumsu shikithelukeu vechewo nongu lolo pekililulo. Tishiluaye Alhou pulouye kiuno akivipu, kiuno pano ikhilu kuzupu eno kupukulu keno nonguno ithi kututa shilu nani.

Ikehu ithikuzumiqo, Alhou wu qhuivulayi keu kutomo ningu lau akeu vechewono ino nongu vilo hi qhuiniju ani: Nongu phi-mpi pesu Alhou lau akuxuno mllakeugho shi-ghi qhitsulo, pa kumlapulo akimtheshi peitha penike eno pano ikhilu kuzupushi tsulo. Hino kuchou shi nonguno mlla kepue.

Nongu lajupu akeu huno nongu pelo alokiqi shipelo, shilukusalo theqhikulu alo, akighinilo azuni alo.

Alhoksa pelo nongu theqhiluvepe kevilo ikemu akivi pesu alhoksa theqhiluvelo.

Athikuzumi kimiyekile ketoi nongu lakhino lakhi kimiyekilelo; gihukilenikeulo kuhakilelo.

Kimiyekilekeu hu mutsumishei shipelo. Kusakughaye mithilo eno akiviuye mutotoi tsuquluvelo.

Toluke thaqhu, omuzuloye timi kumtsu sasu kulakishi lono xuanikeu shilo.

Ino kimiyechekeqo, khilemu olikhi omukhu lukevilo, ikemu tiye Alhou loghulo pichevetsulo. Kughengu kuchoyesulo ishi yepuani: “Ino amukhulu nani, ino lochile nani, ipi Ampeu no pie.”

Azukinilo ghuthi suve mono, angu-agha thibuyimono Ampeu qe alo.

Kughengu Alhou wu kupukini itsukeu vechewo ino nongu kumtsu vilo hi pi ani: Nongu khumu alikhi akughapesu qhemghai kumsukepu kumoe, ikemu pututano aghibiu lono kumsukepu, Alhou no akupulu lakhikhi tsupuakeu qhemi lono pututa likhi pututa shou xathabeluve kepue.

Khualano oshou alhoksa mla aye, alhoksa pesu pa tsuchilekevilo. Timi kumtsuno kiu pesu akivi kepi cheni keno tipau shinikeu pukaputsalo.

Kumtsu sasu kuloni kughuvuyi xulo, qheza-laki kevilo, ikemu aqhokighepu kumlapu saje ikhilulo; eno khilemu olikhi noye alokutsumi kepi kumsu kevilo.

Ike tishinike zuqhulo, kuchoyesulo pike toi, “Oghumino mzuthi aye pa kughulhulo; pano tughuthiaye jehlo kughengu tishi keu lono nono ami hipe pa kutsu shou puku tsuanie.”

Nongu shikighimekemiqo kumghatsu lopi Alhou vilo khutsulo. Pa vilo tipaqo kumghatsupenike inikhu nithono musu ini penikeu khukelo. Alovi aghikemi gholo alovilo, qa-mlo aghikemi gholo qa-mlolo.

Nonguno aghikeu pesu kupulumi vehupu shi aghi keulo qhasutsulo; eno nonguye inami sasukinimi shilo.

Aphimpi lakhilo ninguye aphia-u jeli kutomo ani eno aphia-u jeli hipaqo kumtsu aphiphi lono peitha chemoe. Titoi, ningu ghi kutomo shi anamu ninguye Khristo lono kimepe aphi-mpi lakhi eno aphiauno kimepe akeu toi ningu lakhino lakhi sasu kimepe ani.