ROMMI 10

1Ithikuzumiqo imlo kumtsuno pulochekeu eno Alhou vilo ino inikhu chekeuno niwu timi pelo xalu vepenishie! 2Ino panoqo ghenguno ashepe shilu nanike panonguye aghuiloqhiyi Alhou lau azukini achenie, ikemu panonguno azukini shi achekeu huye kuchou kighithi sumo puzu shi acheni. 3Alhou no timi pelo pa lau achipikalu pekeu lah panonguno jukumghaleyive puzu pano likhi pano chipiu shipe qhinikeu phuauve ikehu Alhou no timi pelo pa lau achipikalukeu lahlo panoqono chemove. 4Kughengu Khristo no Ayezah kishekhavetsuae, tishianguno akupulu aghikemi pelo Alhou lau achipikalu apeni kehue.

Xakulupuye Kumtsu Ghenguno

5Muse no yekeuno timi khuno Ayezah pelu puzu Alhou lau achipikalu nikeno paye tipau pesu xulu nani. #Achine 18.5 6Ikemu akupulu shou bepuzu Alhou lau achipikalukeu pesu ishi pipuanie: “Olikhi omlolo ishi pikevilo, khuno atsutsulo ikuluni kya?”( Khristo saiqighi kepushi.) 7Momu “Khuno ayeghi qhou iqi kulupu kya?” (akithi lono Khristo saikughi kepushi.) 8Ikemu ishi pichekeuno: “Alhou sutsaye ophivilo anie, okichilo eno omlolo anie (nino pikulha chekeu akupulu sutsa hu pianike.)” #Zaki 30.12-14 9Kughengu Jisu ye Ampeu ke ipi okichino piphevelu aye, eno Alhou no akithi lono pa xaputhuve kepi omlolo puluaye, oxalu nani. 10Kughengu timino amlo lono pulukeulo huno Alhou lau achipikalupe cheni, eno nikichino pipheveno xalu chenipeke. 11Kuchoyesulo ishi pipuani, “Pa pulukemi khumu shikukujo chemoe.” #Isa 28.16 12Hiye kumtsu kihi ani, kughengu Judami ngo Judakumomi dolo kutuqukeu kumu kuhae, Ampeu hipauye kumtsu Mpeu ke eno pa phu ighi kemi kumtsu shou kupukunoshi kumghatsu cheni. 13Kuchoyesulo piketoi, “Khunono Ampeu je kunikeno xaluve nani.” #Joyil 2.32

14Ike panonguno pulumo kenokuu xalulepi inijuni kya? Panonguno chimla aphikeu sutsa kishi puzu puluni kya? Asutsa pikulha moke kishi puzu panonguye chiluni kya? 15Asutsa kipemi puwumoke, kishi asutsa pikulhaluni kya? Kuchoyesulo pipuake toi, “Atsakiviu pikulhakemi ighikeuye kiutoi jukivi kela!” #Isa 52.7 16Ikehu panongu kumtsuno Atsakiviu ikhilutsuke kumoe. Isaya no pivae, “Ampeu, nino asutsa peighikeu khuno pulutsu kya?” #Isa 53.1 17Tishiaye asutsa chilukeu lono akupulu ipeghi cheni, eno Khristo tsa pikulhakeu vechewo chilu cheni.

18Ikemu ino hi iniju ani, panonguye kuchouno asutsa chimlave kesha? Panonguye chiluvea thono, kughengu kuchoyesulo ishi pivae.

“Panongu ghughaye ayeghi kumtsu shou wuvae, eno panongu tsaye ayeghi shekha kutolo tovae.” #Leshe 19.4 19Itaghi ino hi iniju ani, Israilmiye mthavekesha? Atughushi Muse no pikeuno,

“Ino nongu pelo khunoqomino ashiayeh kuchou kumokeno tipaqo jupesu anheshu peniu;

Mbomzumi shiayeh lakhi pesu ino nongu xupukani.” #Zaki 32.21 20Isaya no akumto shi pipuani:

“Khunoqono iphujumono achekeno tipaqono iphuluvae,

Khunoqono ivehu inijumono achekeno ino tipaqo lau pephe piyevae.” #Isa 65.1 21Ikemu Israilmi muzu loye Alhou no ishi pi, “Atsala kupuju aghokulukumomi eno hekibidemi lau i-u sukhope kheju acheni.” #Isa 65.2

Currently Selected:

ROMMI 10: SUMIBSI

Highlight

Copy