ROMMI 9
9
Alhou no Kishekulumi
1Niye Khristo lono kuchou tsa pi ani. Ilolo kivikusa lokutsulo Aghungu Kimthe no ishepe shi 2akeuno niye shishe amlokusa eno ashekha kuhakeu mloghuju ilolo ani. 3Shikulupu keaye ithikuzumi, nishiayeh ghenguno ilikhi niuno Alhou ngusu shiveno Khristo launo kughuxave nishike. 4Panonguye Alhou no kisheluvekemi Israilmi ke. Pano panoqo pelo pa nuliqo shilupe, panoqo pelo pa jukuvu kusajepe, panoqo sasu pawu puloshoqhi shi eno Ayezah panoqo tsue. Panongu gholo kuchou shi Alhou mllakeu ani, panonguno Alhou no piqhikeu ithulu. #Ipe 4.22 5Panonguye apu-asuqo polokughukomi, eno Khristo ghi timi shi-ghi ighikeu kiqiloye panongu shiayeh ke. Kumtsu shou Alhou no ampi ke pulhapuju pa sheqhe akepue! Amen.
6Alhou no Israilmi lau piqhikeu adou shive akepi pianike kumoe. Kughengu Israil polo kughukomi kumtsu Alhou no kisheluvekemi ke kumoe. 7Momu Abraham polo kughukomike ghenguno Alhou nuliqo ke kumoe, kughengu Alhou no Abraham vilo pikeuno, “Isak polo kughukomi vechewo oje kuni.” #Bothu 21.12 8Hipau kiqiye alhoayeh lono atianuli punukeu huye Alhou nuliqoke kumoe, ikemu Alhou no piqhipuakeu shikupu ghi ati-anuli punukeu huno kuchou polo kughukomi kepi kihiniae. 9Kughengu Alhou no ishi piqhipuae: “Ado achipilo ino ideghi nani eno Sara ye anu lakhi ithulu nani.” #Bothu 18.10
10Tilikhike kumoe, ikemu Rebeka no ni-su Isak nuli mishipu akelo, 11anga pama punu mphi lono eno akivi-akusa kiumu shimphi loghi Alhou no kishepuakeu kibesu wunike ghenguno li vilo ishi pike, “Akichiuno ayitiu qe nani.” 12Ikehu Alhou no kishelukeuye pano kulu keu shou bepe ani kethono panongu kumla shouno kumoe. #Bothu 25.23 13Kuchoyesulo ishi pipuani: “Ino Jakob kimiyeke, ikemu Esao ye mithie.” #Mala 1.2-3
14Tishiaye, ninguye kiu kya? Alhou ye amikucho kumove kesha? Tiye khilemu kumoe! 15Hi ghenguno pano Muse vilo pi, “Ino khunoqo shou qhuivulayi cheni keno tipanoqo shou ino qhuivulayi nani, eno khunoqo shou ino imlo ighiqhiyi cheni keno tipanoqo shou ino imlo ighiqhiyikeu anani.” #Ipe 33.19 16Ikehu hiye timino shinishikeu momu mulakeu shou bepe anike kumoe, ikemu Alhou no qhuivulayi keu shou bepe ani. 17Kughengu kuchoyesu lo Farao vilo ishi pipuani, “Ino osuqhepuku puakeuye opeitha puzu ikuka pephe nikeu kimji lonoe, tishianguno ayeghiqha kumtsulo ije vekuphawo peniyeke.” #Ipe 9.16 18Ikehu pano khunoqo qhuivulayi keno tipaqo qhuivulayi cheni, eno pano pulokeu hutoi khami mulo shikumkavetsu cheni.
Alhou Loghu ngo Qhuivulayikeu
19Nongu gholo khamiye ivilo ishi pi nani, “Ishikepushi aye, Alhou ye kishi puzu timi kipimi phucheni kya? Khuno pa pulou mujochile kulupu kya?” 20Ikemu no khuu keno, timi lakhi kenoku-u Alhou ghechile ani kya? Ayeghino shikeu li lakhiye ti koghekughu shiphekeu vilo, “Noye kushiye hitoi ikughuphe kya?” ipi iniju chemoe. #Isa 29.16; 45.9 21Alikishiuye pa gho pulou shi-ghi aghani peitha cheni eno ayeghi muqo lakhi kughapesu ali kini mlapheno ali lakhino jukivi aghilepushi mlaphe eno lakhiye inapugha peitha kepushi mlaphe ishi cheni. 22Tihutoi, Alhou no pa loghu pephepiye nishi kehu eno pa kuka kumto ithipeniye ali khipaqo shou pa loghu pepheno kutsaveniye kutopuani keno tipaqo lau kutuo kutuu ghi kheakulu shi cheni. 23Tiye pano qhuivulayi keu hi ningu shou pa kimthe-jukuvu kinikulushi akeu pephepiye nike ghenguno ajukuvupu shi pano kutope qhie. 24Ninguye pano kuluvekeqoke, tiye Judami gholo likhino kumoe ikemu Judakumomi gholono ghike. 25Kuchouno Hoshiya kakulo pano ishi pikeu toi:
“Khunoqomi iwu timi kumo keno, ‘Iwu timi’ ipi ino kunie,
Ashiayeh ino kimiyechemokeu vilo, ‘Ino kimiyechekeqo’ ipi kunie. #Hosi 2.23
26Khipa-alo panoqo lau ‘Nongu ye iwu timi kumoe’ ipi puani keno, panongu pesu ‘Akuxupu Lhou nuliqo’ ipi kunie.” #Hosi 1.10 27Isaya no Israilmi ghili ishi asheshu puani: “Israilmi no azughi saye jejehi aghipinamu, panoqo gholo aghulo likhi xalu nani; 28kughengu Ampeu no suchilemono ayeghiqha shou mtazu pawu xakutha be nani.” #Isa 10.22-23 29Hiye Isaya no azunatha ghi piveke toi, “Aqokitikhi Mpeu no ningu tikughuko qhitsu mokenapiaye, ninguye Sodom ngo Gomora phu kimihi shivetsu aghini cheke.” #Isa 1.9
Israil eno Atsakiviu
30Tishiaye ninguye kiu pilu nani kya? Judakumomino Alhou lau achipikaluni keu phulumono achekemu phuluvae; akupulu vechewo pa lau achipikalu keu shi qhiluvae. 31Ikemu Israilmino Ayezah pape puzu Alhou lau achipikakulu hache kelauye hamlavae. 32Kushiye tishive kya? Kughengu panonguno akupulu vechewo hamo puzu akumlaqo shou pukhube kehue. Panonguye pusupuku kepu tu shou pusu pukulu, 33ti kuchoyesu lo pikehutoi:
“Julo, Zion lo timi pelo pusupukulu penike atuqu lakhi ino qhipuani,
tiye panongu pelo kupuxalu kepu tuqu lakhike.
Ikemu khunono pa shou akupulu benikeno shikukujomo nani.” #Isa 28.16
Currently Selected:
ROMMI 9: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
