LUK 1
1
Kilethitsa
1Shishe Akiqheu Thiofilos tsa: Timi kutomono tolukivi thaqhulo ningu gholo shivekeu thimeqo ghili yehpe qhinikeu shie. 2Abothu lono thebei shi ithulukemi eno asutsa pe vekuphakemino kiu ningu vilo pikeno tipaqo panonguno yeluve. 3Tishikehu, Thiofilos, hipaqo kumtsu abothu lono ino tsaqui phukide kudajuve ake ghenguno osala, apasu shi yeh nikeu kumsuluvae. 4Tishikeu lono opithi puakeu thwokha kumtsu hu kuchou kepi opelo ithipe niye ke.
Johan Baptist Punu Ghili
5Hi kumtsu Herod no Judia lo Ahng shi ake lono huthue. Abija chine ghola lono shikemi achinemi lakhi ache, pa je ye Zakharia eno pa nipu Elizabet ghi Aron achineu kibo lono ighi kemi. 6Pama kini kujo Alhou zulo amikuchoshi xu ache eno Ampeu no ahza eno ayeh tsukeu aghokulu shi peche. 7Pamaye anuli kuha, kughengu Elizabet ye anuhami eno pama kini kujo kitemi shive. 8Pa kikiphi tsalani tsalakipe kumlla ghenguno Zakharia no Alhou zulo achineu kumla mla-a. 9Achinemi yeh kiqi lono asaqhi kelo pa shou qhibeluno pa pelo Ampeu kilo ilono akumllagho kipitialo musughuta pitinikeu kishepheve. Ike pano Ampeu chinekilo ilono 10musughuta piti ake dolo khalacheu akemi kumtsuno akighini shia. 11Ampeu wu kungumi lakhi pa zulo ipeghino musughuta piti akeu akumllagho kipti-a ajeu kudau puthugho. 12Ike Zakharia no hi ithulu kelo paye thughui musave. 13Ikemu kungumi huno pa vilo pi: “Zakharia! Musa kevilo Alhou no okighini chiluvetsua, onipu Elizabet ye anu lakhi punu nani eno nono paje Johan kutsulo. 14Kughono pa punu ni keno no eno timi kutomono alokiqi eno alokivi shi nani. 15Kughengu paye Ampeu zulo akughushumi lakhi shinani. Pa ye kiu ji kumkamu shomo nani. Paye punuke mtsano Aghungu kimthe no chhitoi nani. 16Pano Israilmi kutomo panongu Lhou Ampeu lau saideghi tsu nani. 17Tungkupu Elija kuka kumto toi pano Alhou ghinimi shi wu nani.Pano apuh noqo eno anuliqo saidewo kughokulu shitsu nani. Pano hekibidemiqo amikuchomi kukumsu lalo saideghi nani; eno kutope akeqo Ampeu wu timi shitsu nike hekutsu nani.” 18Zakharia no kungumi vilo pi: “Tishi nani kemo keno kishino ithini kya? Ni ghi inipu ghi kitemi shiva.” 19Kungumino khochile pi: “Niye Gabril, niye Alhou phivilo puthugho acheni, oputsa penike eno hi atsakiviu olau peighi penike ipuwue. 20Julo, hi kumtsu shikupu moke tsala kutolo noye atsa pilumono inaqhoive nani, kughengu ado achipi lono shikupuniye akeu itsaqo nono pulumoe.”
21Timiqoye Zakharia khea, eno paye kiushiyeno achinekilo ado kushuwa lu auveakela pi akumza ae. 22Kughou pano khalau ipeghi keno panongu putsa mlave tighenguno paye achinekilo kiula ithulu akena pi panonguno ithive. Pano pa-u pesu panongu kulo piye eno atsa pimlano auve. 23Achinekilo akumla shikeu tsalaqo kupu khave kethiu Zakharia ye pa kilo idewove. 24Ado kitila thiu pa nipu Elizabet ye mishiluve eno lino aqhi pungu kuto akilo pukhope ngove. Lino pi: 25“Ampeu no ishou jupuku ke tsala lono ikuphu ani, mishi gholono ikukujo peve tsuani.”
Jisu Pununikeu Pithi tsu
26Elizabet no mishikeu aqhi tsugho shi akelo Alhou no kungumi Gabril hape Galil lo Nazaret phulo puwu. 27David laghalomi Josef no ini puakeu ilimi lakhi lau puwue, ayiliu jeye Maria. 28Kungumi no li lau ighieno pi: “Aloino alo, Ampeu ogholo ani eno pano shishe okumghatsu ani.” 29Ikemu Maria ye kungumino hitoi pikeulo shishe thughuive, eno hipau sutsa kiqiye kiu kela pi akumza ae. 30Ike kungumino li vilo pi: “Musakevilo, Maria, kughengu Alhou no oqhuivukeu ani. 31Julo, opo lono anu lakhi mishieno punu nani eno nono pa je Jisu ipi kutsu nani. 32Paye kije shi nani eno Alhou Akiqheu Nu huke ipi ku nani, Ampeu Alhou no pasu David kuka lakhu pe pa tsu nani, 33paye pulhapuju ghenguno Jakob lagha kukau shi nani eno pa kukaqhaye ashekha shimo nani.”
34Tile Maria no kungumi vilo pi, “Niye akimi kuha aphike kishino hi shiluni kya?” 35Kungumino li vilo pi: “Aghungu Kimthe no oshou ighi nani eno Alhou kuka oshou ngo nani. Hi ghenguno akimthe nga khikhi punu nani keno tiye Alhou Nu ipi ku nani. 36No sholokumi Elizabet julo, li ghi kitemi shive mu anu lakhi mishikeu hi aqhi akutsughou shi ani. Liye anuhau ipi chekehu. 37Kughengu Alhou no shimlakeu thimeye kiumu kuhae.” 38Maria no pi, “Niye Ampeu qeliu, otsa kiqi lono ilau ti shilu peni.” Eno kungumino li launo wuve.
Maria no Elizabet Xujuwu
39Tipa thiu Maria no mtazu chesu Judia yeghilo naghuto kudau aphu lakhilo wu. 40Eno lino Zakharia kilo ilono Elizabet putsa. 41Elizabet no Maria sutsa chiluke mtsa angano li polono ithauve, Elizabet ye Aghungu Kimthe no chhitoive, 42lino asutsa qhemghai keu lono pi: “Noye totimi gholo akumghau! opolo xuthiye akumghapue! 43Impeu pa za pelo ixuju ighipe keu hiye kiutoi ilau thime kije shitsu ani kelahe! 44Kughengu nono putsakeu sutsa chiluke mtsa ipolo angano alokivi launo ithawuve. 45Nono hi pulukeu akumghapu, Ampeu no ovilo pivekeu shikupu nanike.” 46Maria no pi:
“Imlo kuchopuno Ampeu she ani,
47Ilolo alokivi ani, Alhou ye ixakuluu ke.
48Kughengu pano paw aqhokigheu qeliu ikhilue!
Hinguno hilauye timi kumtsu no ivilo akumghau ipi kuniae;
49Kughengu akumto Lhou no ighenguno akumla kije mla tsue,
Pa jeye akimthe.
50Pa sumsakemi kumtsu shou tiqhelino tiqheli kuto kimiyekeu piye cheni.
51Pano pa kumto-u chhopuwono aqhekuzami kukughu hexave tsue,
52Pano akumto kukami panongu kuka lakhu lono sunheqhive,
Ikemu aqhokighemi sunheqheve. 53Pano muzuthikemi thime kivi pesu aghapiqitsu,
ikemu kinimi a-u kumsa shi puwuve.
54Pano nipuasu lau ashoqhi shikeu iqemoe;
Pano pa qeu Israil kuphu nike ighie. 55Kikimiye pulhapuju Abraham eno pa lagha kumtsu lau piye nike kumsuche.”
56Maria no Elizabet sasu aqhi kuthua ngoano li kilo idewove.
Johan Baptist Punu
57Elizabet no anga ithulu kepu ghuloki tove kelo lino anu lakhi punu lu. 58Li kisughumi eno asholokumino Ampeu no akumzapu kivi li lau piyekeu chiluno panongu kumtsuno li gholo alovi kuqhae. 59Atsala tache thiu panonguno anu phighu yiko ghanike ighi; eno papuh je paphi shighi pa je ghi Zakharia kutsuniye kuto. 60Ikemu pa zano pi: “Moe, pa jeye Johan ipi kunie.” 61Panonguno li vilo pi: “Hikithipu je lono kukemi nosholokumi lakhimu kuha aphie.” 62Tithiu panonguno amchi shi-ghi papuh vilo anu je khuu kutsu peniye anikela pi iniju. 63Zakharia no yepuku kepu lakhi khu eno yepuku ghi ishi piphe, “Pa je ye Johan.” Eno panongu kumtsu no akumzave. 64Tipa mtsa Zakharia kichi eno amili xukho kithe luveno pano Alhou sheqhe thu. 65Panongu cheaxulo akemi kumtsu akumsano chhive eno Judia yeghilo naghutolo aphu akeqo kumtsulo hipau sutsa kugha wove. 66Hi chilukemi kumtsuno pututa mlo lono kumsu kuto ju ghi pi, “Anu hipauye kiu shini cheni kela? Kughengu kuchouno Ampeu wu akuka pa gholo anie.”
Zakharia wu Tungkupu Tsa
67Papu Zakharia ye Aghungu Kimthe no chhitoi lu eno pano tungkupu tsa pi:
68“Ningu Israil Lhou Ampeu sheni nolo!
69Pano pawu timiqo kuphunike eno panongu xaphe nike ghenguno ighie.
70Pano ni ghenguno akumto xakuluu lakhi pa qeu David lagha lono suqhe.
71Hi puzuuno pawu tungkupumi akimthemi kichi vechewono pi puakeu toi:
72Nighumi ni mithi chekemi kuka launo ni xalu nikeu pano piqhie.
73Kikimiye ni puasu lau piye nikeu eno pa kimthe shoqhi kumsuchile lunikeu pie.
74Pano nisu Abraham lau ashoqhi lakhi shie, pano ni ghumi launo ni xachile nikeu shoqhi shie.
75Nipelo musa ichimono pa qepe nike,
76Ni kuxu kupuju pa zulo akimthe eno akumzu shipenike.
77Apuo, noye Alhou Akiqheu wu tungkupu lakhi ipi kuni kughengu nono Ampeu zuu wuno pa laghi kutope puaghi tsu nani,
78Panongu xineqo pevetsu keu vechewono pawu timiqo vilo xakulu kighithi tsu nani.
Kughengu niLhou ye kimiyekini eno kupukini ke;
79Pano xakulu kuvu ni shou ipeghipe,
Akithi yekukhu kuzulo akemi shou atsutsu lono yepuvutsu,
Hi aloinokeu laghilo ni la mijetsu penike.”
80Anuye aphimpi eno aghungulo mutotoi thuwuve, paye Israilmi gizulo pephepiye moke tsala kutolo yenguyelei keu-alo xuache.
Currently Selected:
LUK 1: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.