LUK 2
2
Jisu Punu
(Mt 1.18-25)
1Hipa ghulokilo Rom yeghiqha kumtsulo timi lhoxu hesa kutsu nike Akukau Agostus launo ahza puwu. 2Kurinia no Siria lo Ahng shi ake lono hi hesa keu atughiu shilue. 3Kumtsuno kihikusulo sunike pututa phughilo wu. 4Josef ghi Galil yeghilo Nazaret phu lono Judia lo David phughi Bethlehem lo wu. Josef ghi David laghalomi kehu tilewue. 5Eno pa sasu tusutuxe shi achekeu Maria ye mishibei pa gholo wue. 6Panonguno tile aphi lono liye punu kepu tsala tove, 7lino anu atughiu punu lu, eno lino aphino kuzuno amshi khulo pa puzu, kughengu panongu ghenguno inami kuwu kilo akungoa kuhave.
Bherikhemi eno Kungumi
8Tipa yeghiqhalo bherikhemi khami aluzalo ae, eno putholo panonguno bheriqo jukutsu ghi khea. 9Tile Ampeu wu kungumi lakhi panongu phivilo ipeghi eno Ampeu jukuvuno panongu homxa yepuvu luveno panonguye shishe musave. 10Ikemu kungumino panongu vilo pi: “Musa kevilo! Ino nongu lau asutsa kivi lakhi pe cheni, tiye alokivi kije timi kumtsu lau ighiniye akeu ke; 11kughengu David phughilo itijino nongu lau xakuluu lakhi punu ani, tiye Khristo Ampeu! 12Hino nongu lau amchipu lakhi: nonguno anga lakhi aphino kuzuno amshikhulo zu aghikeu ithulu nani.”
13Paikhavi lono kungumi aqo kitikhino kungumi hipau gholo ipeghino Alhou sheqhe ghi pi:
14“Kungughalo Alhou lau ajukuvu shilo!
Eno ayeghilo pa lokiqi akemi shou aloinokeu apelo!”
15Kungumino panongu launo ixa susu kungughalo wuve kethiu bherikhemi lakhino lakhi vilo pi, “Ampeu no pithi puakeu hu ningu Bethlehem lo wuno kiu shivea pi ani kela juni.” 16Panonguno akimighi shi ighieno Maria ngo Josef eno anga no amshi khulo zu aghikeu phulu. 17Kughou bherikhemino hi ithulu keno anga ghili panongu vilo pi puakeu panonguno kutami pithi. 18Bherikhemino panongu vilo khikhi pi keno ti chikulumi kumtsuno akichiqhive, 19ike hi pi keu kumtsu Maria no amlolo qhiluveno kumsukutoju ache. 20Bherikhemi vilo pikeu toi panonguno thwokha kumtsu chilukeu eno ithulukeu ghenguno Alhou je pipi eno sheqhe ghi idewove.
Jisu je Kutsu
21Pa mishimphi lono kungumino pikeutoi atsala tache thiu pa phighu yiko ghaveno pa je Jisu kutsu. #Achine 12.3; Lk 1.31
Achine kilo Jisu sawu
22Muse Yezah kiqi lono shikimthe keu tsala tovekethiu panonguno pa pesu Ampeu tsuniye xapusu Jerusalem lo iqho. #Achine 12.6-8 23Ampeu yezah lo yepua keu toi, “Kiptimi punu tughiu thaqhuye kumtsu Ampeu kudau akimthe shitsukeu ipi kuni.” #Ipe 13.2,12 24Ampeu Yezah lo pi puakeu kiqi lono, “Amiqhi tuna lakhi momu titoi keu ghau kubtur alhothe kini,” pe akumllagho shighi mlla nikeu shie.
25Jerusalem lo timi lakhi ache, pa jeye Simon; timi hipauye akivimi, Alhou sukumsami, Israil lokughunotsu nikeu tsala huqhe ache eno Aghungu Kimthe no pa shou ae. 26Eno Aghungu Kimthe no pa lau pephepiye keuno Ampeuw Khristo ithulumo ke kutolo paye akithi sasu kushomo nikeu shia. 27Aghunguno pa mijetsukeu lono ighieno achinekilo wue eno kughou apuazano Ayezah lo akhu ayeh kiqi lono shikepu shiakeu shiniye anu Jisu peighi keno, 28Simon no pau lono khapeluno Alhou she ghi pi:
29“Ampeu itehiye otsa kiqi lono oqeu pelo aloino ghi wove pelo;
30Kughengu inhethino ow xakulu ithuluvea;
31Timi kumtsu zulono kuto akeu hu;
32Akuvu lakhi hi Judakumomi pephepiye anike,
Eno ajukuvu owu Israilmi tsunike.” #Isa 42.6; 49.6; 52.10
33Ike pa puazaye pa ghenguno Simon no piqhikeulo akumzave, 34Simon no panongu kumghatsu eno pa za Maria vilo pi; “Julo, anu hipauye Israil lo timi kutomo sunhepuku eno sunheqhi nike qhipuatsu ani. Paye Alhou kudauno amchi lakhi shiamu timi kutomono phimokeu shi nani, 35eno ishikeu lono panongu wu tuqhou kukumsu pephepiye nani, eno kusakushono azutakihi toi omlo ghi ghixu nani.”
36Anna ipikeu tungupuliu lakhi ache. Liye Fanuel nga, eno Asher laghami. Liye kitemi shive, kulaukeu ampe tsuni shi ake lono akimi thive 37no chimekeu ampe lhotache bidi shia. Liye achineki phemono putho pucho akukhu akighini shi Alhou mlla ache. 38Tishi ake dolo lino ighino Alhou shikimthikeu tsu eno anu ghili pesu Alhou no Jerusalem xachilelu nikeu kheakemi kumtsu pithi.
Nazaret lo ide Wove
39Ampeu yezah lo akeu kiqi lono panonguno thwokha shikupuve kethiu Galil lo pano phu Nazaret lo idewove. #Mt 22.23 40Jisu ye mutotoi thuwuve eno paye alokutsuno chhitoi eno Alhou no qhuivu keu pa shou ae.
Jisu itilo Achinekilo wu
41Ampe atsu-tsu Israilmi xaphekulu ghulhulo sunike Jisu puazaye Jerusalem lo wu ache. #Ipe 12.1-27; Zaki 16.1-8 42Jisu no ampe chighi kini shi akelo puzuu toi panonguye aghulhulo sunike wu, 43aghulhu ashekha shive kethiu panonguye idewoche kelo anu Jisu ye athiu Jerusalem lo ngo auve; eno pa puazaye hi mutha; 44ikemu kumsujukeulo aqo gholo cheghi nani kenia kepi ghulo lakhi lachelo wuve. Pamano apami eno akusami gholo pa phuju puhave. 45Kughou pa ithumlave keno, pamano pa phususu Jerusalem lo ide ighi. 46Atsala kuthu thiu paye achinekilo Judami yeh kukutsumi gholo iqano panongu sutsa ini eno panongu vilo iniju aghike lono pamano phulu. 47Pa tsa chilukemi kumtsu pano alokutsu shi khochile keulo akumzave. 48Pa puazano pa ithulu kelo pamaye akichiqhive eno pa za no pa vilo pi. “Anu, noye kushiye ishi ni-peitha kya? Opu ikujoye amlokusa shi ophu cheni.” 49Pano pama khochile pi: “Nokujoye kishino iphuju cheni kya? Niye iPu kilo aghi kepue pi nokujoye mtha kesha?” 50Ikemu pano pama vilo pikeu pamano ithi kuthumo.
51Pano pama sasu Nazaret lo iqighi,Pano pama gholu eno pazano hi kumtsu li mlolo qhiluve. 52Jisu ye aphimpi eno alokutsu kini kujolo thuwuve, Alhou eno timi lopu shiwuve.
Currently Selected:
LUK 2: SUMIBSI
Highlight
Share
Copy
Want to have your highlights saved across all your devices? Sign up or sign in
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.