ZEKARIA 1

Ringhpouc rui Kamei nunc ta Kawmei

1Guanghdaihmei Darias rui Persiamei guangc swmei tuang kaneimei kwm tuang tachatmei bw khou Ringhpouc rui mi lat hei Berekia nac mpouh khatni Iddo tou muhzwng Zekaria khou Ringhpouc rui tiguang the.#Ezr 4.24—5.1; 6.14 2Meic nunc khou kumna sa o twna Ngamparymei Ringhpouc rui Zekaria khou sa the, “Ringhpouc, ai rui nangniw pupouc nunc ta lungpuamc sih khwan the. 3Kum khwan sini ntaw nangniw khou kumna sa e, ‘Akhou ngalanc guang dat ro, kum e thei ai ni nangniw khou ngalanc guang dat puni. 4Nangniw pupouc nunc tei kumh riu, simei taanv khatni paapc tuang panty khou rui lunghlaic guang dat ro twna Ringhpouc rui sa e twna muhzwng nunc rui kaniw khou sa guang kan the. Kum e tiki kaniw alat tei chu nii mak ge khatni piu nii mak ge. 5Nangniw pupouc nunc khatni mi muhzwng nunc tei ntaw thu theic ngam kan the. 6Abangc muhzwng nunc rui alatdanv khatni ai rui luhmei lat guay tei kaniw khou samei tei thouh swlou makmei zaeng rui kaniw ryanramei ariw kan the. Mi tangv tei kaniw lunglaic datna Ringhpouc, ai rui riap ni the twna kaniw ta riapmei tuang di the, hei tei kaniw khang tiilou biuhmei dandi tiiloumei tuang di the twmei kaniw rui sa kan the.’ ”

Muhzwng tuang Ndawman khou Howmei Takuanh Pang

7Darias guanghdaihmei swmei kaneimei kwm, 11mei bw tuang zaeng 24 puineic (Shebat bw) zingbangc ndawman khou Ringhpouc rui lat dinc guang the. 8Ringhpouc tuang baanchara akhat takuanh haenghmei tuangcna bammei ta ai how khwan e. Kamei nzaengc akhat khou, thingphwam ding khou gut dinglou kan the. Kathei khou takuanh haenghmei, nziuhmei, khatni mphwanmei bam khwan e.#Nda 6.4; Nda 6.2 9“Mi takuanc nunc hei tabui kabac cho?” twna ai rui kakhou thanv khwan e.

Kamei rui daw the, “Mi hei tabui kabac cho twmei ai nang khou lyanlou puni. 10Mi nunc hei kandih pwm khou tatna zauh khang Ringhpouc rui thoucloumei nunc e.”

11Kaniw tei rui baanchara khou tei guangna pou the, “Aniw kandih kapwm khou tatlik the kumna kandih kapwm hei reih reina nchu nrina bam e.”

12Mi tangv tei baanchara tei rui sa the, “He Ngamparymei Ringhpouc, tingkwm 70 hei Jerusalem khatni Juda tuang kaidai guay ta lungpuamc guang kan the. Asaanh kumna kaniw ta zauc nzianlou dat makna ganclou bam ni hena cho?”

13 Ringhpouc rui baanchara khou tei diw tigaymei lat dawlou kan the. 14Ngamparymei Ringhpouc rui sa kanmei lat tei kauc ndauh pat tho twna baanchara tei rui akhou sa the: “Atuang nthanmei kaidai Jerusalem ta ai nzian e khatni mi khang tei kadanna bam e, 15kumhpui zaeng rui nchu nrina lungc bammei zaat nunc ta tei alungpuamc e. Kalam thu ai rui amei nunc ruc khou alungpuam kim key datna bam khou, mi zaat nunc tei rui amei nunc ta tiryanra katynlou the. 16Kumhpui zaeng rui ai rui nzianmei lyanlou dat khang ai Jerusalem khou guang dat the. Atuang Ravkai kasiamh thau dat puni the, kaidai ni kasiamh thau dat puni the.” 17Mi hei ni sa o twna baanchara tei rui akhou sa dat re, “Katuang kaidai guay hei daicthau dat puni the kumna kamei rui Jerusalem ta nkhavlou datna mi kaidai tei katuang sw dat puni twna Ngamparymei Ringhpouc rui sa e.”

Guaihchei Ndawman

18Ndawman baihmei akhat khou ai guaichic padeih chei how khwan e. 19“Mi chei guay hei thu tabui kabac cho?” twna ata kachuc bammei baanchara khou tei ai thanv the.

Kamei rui daw the, “Mi hei Judamei, Isaraelmei, khatni Jerusalemmei ta zinphaklou kanmei kandic ngamv guay e.”

20Mi tangv tei taanvtaanhmei gaanv padeih tandiak sinna ding bammei ta Ringhpouc rui akhou lyanlou the. 21“Mi nunc hei tabui taanh khang guang tu cho,” twna ai rui thanv the.

Kamei rui daw the, “Juda kandic ta niak piak paruatlouna mi kandicmei nunc ta tei zinphakloumei zaat nunc ta tei tiping khang khatni diangc puat khang kaniw hei guangmei tuang the.”

Currently Selected:

ZEKARIA 1: RONGBSI

Highlight

Copy