ZEKARIA 2
2
Ndath Riang tuang Ndawman
1Ndawman akhat khou meic gaanv khat kabaanc khou ndatriang sinna ding bammei ta how khwan e. 2“Nang tabui thangc tat nina cho?” twna ai rui thanv khwan e.
“Jerusalem hei asaanh saengc adih daic cho twmei ndat nina e,” twna kamei rui daw the.
3Mi tangv tei ata kachuc bammei baanchara tei hu thangc tatpat pwkhou baihmei baanchara akhat kata ariw khang guangmei ta how the. 4Reymei tei rui akhat khou tei sa the, “Jerusalem khou tei maansei khatni khouringh khounah geic langv tina Jerusalem raengc tei raeng dat ngam pw lak khe, 5Ringhpouc kamei kahak rui mai raengc swna Jerusalem ta bam nkuayna gaeklou puni the khatni kamei khou tei kahym daicna bam puni the twna kamei rui latdyng sw kan the, twna nang pak tatna ndatriang sin bammei nggaanvpu khou tei sa tho.”
Meicbangc Bam Tatmei nunc ta Kaw Guang Datmei
6 Ringhpouc rui kamei nunc khou sa the, dihpy khou rui pakthau la tho, “Ai rui nangniw ta kandih kwn padeih khou zinliklou the. 7Babilonmei aluh nunc lev lungc kariu bammei nunc, Zaion thangc pak la tho. 8Nangniw ta kahimei tei amiknac ta kahimei tuang di the.”
Kumna Ringhpouc katuang mei nunc ta kuakna lai kanmei zaat nunc khou tei mi lat hei sa tat ro twna Ngamparymei Ringhpouc rui ata thouclou the: 9“Ringhpouc kamei kahak rui nangniw ta adow puni the, khatni nangniw bangc swlou khwanmei nunc tei rui nangniw ta kuak dat puni the.”
Mi guay hei pat tangv pwkhou, Ngamparymei Ringhpouc rui ata thouc guangmei tuang e twmei meic kathuicna thay puni the.
10 Ringhpouc rui sa the, “Neihlana suan o, Jerusalemmei nuncle. Nangniw pang khou bam khang ai guang pw the!”
11Mi ganv khou kiu zaatc mpeyna Ringhpouc khou guangna kamei nunc sw puni the. Kamei nangniw pang khou bamlou puni, kumna kamei rui ata nangniw khou thouc guang tuang e twmei nangniw thay puni. 12Ringhpouc katuang nthanmei kandic khou Juda hei katuang nkunmei kandic khatni Jerusalem hei kamei rui nzian liangmei kaidai sw puni the.
13 Ringhpouc kamei katuang nthanmei bamv khou rui guang pw the, meic kathuicna kahu khou reih reina bam o.
Currently Selected:
ZEKARIA 2: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
