HAGAI 2
2
Ravkai Thanh tuang Tik Hym
1Mi kwm tei chaneimei bw tuang zaeng 21 puineic muhzwng Hagai khou Ringhpouc tuang lat tiguang dat the. 2Guanghkhyn Zerubbabel, Tingkuh Joshua khatni meic guayna khou tei sa tho twna Ringhpouc rui kumna sa guang the, 3“Ra kanmei Ravkai ramgai tei howloumei thowkumhmei nangniw pang khou nai tu cho? Ntaw thu hei tei akumh bam tha? Mi hei ramhkhat na sini maek kumc the.#Ezr 3.12 4Kumna nangniw ntaw thu Zerubbabel ni, Joshua ni khatni nangniw meicguayna bauc tho. Kalam thu ai rui nangniw ta nduanghlou bam e. 5Nangniw Izip khou rui tatpatmei ganv khou tei ai rui nangniw ta nduanghlou puni twna nrianhlou kanmei tei kumna ai nangniw ta nduanghlou bam e kumna ping dat ri tho.#Tat 29.45,46 6Ai rui asaanh makmei lungc khou tingpuk kandih, duipui, ramvkiang ta kanukc dat puni he.#Ibr 12.26 7Zaatc kaguayna ta ai rui kanukc dat puni, khou kiu zaatc guayna tuang lanv khou hei phungc guang puni, kumna Ravkai tei lanv rui padik puni. 8Kachaekc ni kaphut ni atuang e. 9Kasiamh thau dat nimei Ravkai hei ra kanmei khang tei suangc gay puni the. Kumna amei nunc ta lungcgay amanvna lungh khang ai rui tiilou puni the.” Ngamparymei Ringhpouc rui kumna sa the.
Muhzwng Hagai rui Amuh nunc lev Chambuimei
10Darias Guanghtumei tuang kaneimei kwm chakiumei bw tuang zaeng 24mei nungc Ngamparymei Ringhpouc rui muhzwng Hagai khou sa guang dat re. 11Ringhpouc rui kumna sa e, “Mi tuang latbamv hei amuh nunc rui sa nthanlou khang kaniw khou kumna thanv o: 12Thowkumhmei rui khaengmei tuang nthanmei zanc kaphey tin khou sianguangna kaphey tei rui ntyan khou pwni, gan khou pwni, drakhadui khou pwni, thauh khou pwni, tabui bui tuang tuzangvmei tuang khou pwni kahilou e thei, mi taektw tei nthanmei taektw sw puni dai?”
Mi lat thanv khou tei “Kumh mak ge,” twna amuh nunc tei rui daw the.
13Khoutei Hagai rui thanv dat re, “Meic gaanv khat rui theihmei pumc ta kahiloumei zaeng rui kamei mphuam the, kumna kamei rui mi taektw ti hei kahilou e thei mi taektw tei ni mphuam puni dai?
“Ngguay,” twna amuh nunc rui daw the.#Sin 19.11-22
14Khoutei Hagai rui sa the, “Isaraelmei zaat khatni kaniw rui taancpatmei taanv kaguayna tei hei tei kumc rap di the; kumna kaniw rui ravchapaeng khou katloumei kathuicna tei ni kamik zaw khou mphuam ngam the.”
Ringhpouc rui Suaihiam Tiilou Nimei tuang Latdyng Swloumei
15Aseic khou rui thauna pat pw nimei tei zauc o. Ravkai kasiamh thau makmei ntauh akhat rui akhat ruc khou loubammei tei, 16akumh bam khwan cho? Napzungc khou tei kadath 200 nai bam khwang e twna guang khou kadath 100 na nai the. Drakhadui khunc khou kaduk 50 nai khwang e twna guang khou 20 na nai the. 17Mpwan suhmei khatni nrihthai rui nangniw rui lingc keyloumei phunling phunlu guay swmutsutlou the, kum bam sini nangniw lunghlaih mak ge. 18Aseic hei bw chakiumei tuang zaeng 24mei tingmik, Ravkai kabam lang luailoumei tingmik nungc hei rui chak thau tho. 19Ntaw napphwn lingc key makna saamh khou lou bam sini, drakha bang, tadut bang, puc-heithai, Olive bang khatni tingthai guay ntaw nthai pat mak bam sini, aseic khou rui thauna ai rui nangniw khou suaihiamlou puni the.
Ringhpouc rui Zerubbabel khou Latdyng Swloumei
20Mi bw tuang zaeng 24mei nungc kahak tei Ringhpouc rui 21Juda tuang guangckhyn Zerubbabel khang kaneimei lat Hagai khou tiguang dat re: “Ai rui tingpuk kandih ta kanukc puni the 22Kumna guanghdic guay ta swkeyna kaniw tuang pumtan guay tiluailou puni the. Ai rui kaniw tuang takuanh gari guay khatni kakaipouc guay ta kalatc khanlou ngam puni; takuanh nunc khatni takuanh thouc bammei guay tei bow key puni the kumna kaniw nchamc khat khat tuang buy-baeng hu khou theic puni the. 23Mi nungc kiu, Zerubbabel, azanc khou nang rui kandih sin khang ai rui nang ta suamclou puni the. Ai rui nang ta kapahlou the.” Ngamparymei Ringhpouc rui sa the.
Currently Selected:
HAGAI 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
