TITA 3
3
Khristian Kheiliak
1Meic nunc tei dihsinpouc nunc khatni ngamv sinmei nunc bangc khou lat piuna bam khang khatni kalam kathuic khou gaymei taanh khang tiningtowlou o. 2Meic gaanv khat na ta sini sa kasicna sa mak khang, agay agi mak khang, khatni nriakcna meic guayna ta chakhwang swna lungh khang, kaniw ta nchamlou o. 3Kalam thu aniu ni kaganv akhat khou mpangna, latliamna, chaeng maanvna, meic pumc rui kahawmei tuang bangc swna, zauczihna khatni ntian nzauna, khatni khat khat ta karaeng zauczihna lungc bam khwan e. 4Tiki aniu ta Guloumeipu Ravguangc tuang zauzian khatni nzianmei ndauh pat pwkhou, 5kamei rui aniu ta kanlou the. Aniu ta kanloumei hei aniu tuang ravchaptatmei taanv paan rui hamh e; kazauzian paan rui de; Bumaengh Nthanmei rui low nthanlouna tipuanc thanhloumei khatni panty thanh tiiloumei paan rui de. 6Ravguangc rui mi Bumaengh Nthanmei hei aniu ta Guloumeipu Jisu Khrista paan rui aniu khou karyan kadath maekna bun keylou the. 7Mi hei kazauzian paan rui aniu ta ravchaptatmei tiswlouna, aniu rigwn bammei ringcsuangmei tei aniu laa khang e. 8Mi hei kalingmei lat re.
Ravguangc khou lwmmei nunc tei kaniw tuang ganv tei gaymei taanv khou tiigutlouna bam khang, nang mi lam khou hei sa ranvna samei ta ai kahaw e. Mi hei meic guayna khang gaymei khatni gaengmei e. 9Mpangmei tuang agi agamei, meickin kathaimei, agay agimei khatni Riakdanv lam khou agaymei, mi guay hei nang thu sw lak nina e. Mi guay hei nsa de; gaeng mak ge. 10Kalangv tipat khang swpui mei ta tei mphut luhlou luan guay kanei tina kalaih mak ge thei, ganc pat tho. 11Mi kumhpui mei hei thu meicgay makmei khatni paapcmei e twmei thay e. Kamei gay makmei e twmei karana kataanv rui dinc the.
Kadyloumei
12Ai rui Artema lev Tukhika kak khou gaanv khat ta nang daeng khou ndiu guang pwkhou, nang Nikopoli khou adaeng khou guang khang sw o. Ai mi khou tei tingsei khou bam khang twna ning the. #Lat 20.4; Eph 6.21,22; Kol 4.7,8; 2 Ti 4.12 13Swngpouc Zenas lev Apollo ta kaney tat nimei chaenglwan khou nang ngammei kamv nkhavlou tio. Kaney khang ramh gaat mak khang zauclou tio.#Lat 18.24; 1 Ko 16.12 14Aniu mei nunc hei, kage nai changhmei khang tiilou thay khang, kaniw gaymei taanv taanc ncham nina e. Kaniw gaeng makmei panty khou lungc bam lak nina e.
15Adaeng khou bammei guay rui nang khang dwan gay kady e. Nzianmei lwmmei guay khang dwan gay kady e.
Nangniw ta Ravguangc rui suaihiamlou di tho.
Currently Selected:
TITA 3: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
