PHILEMON 1
1
Chaengriw Lat
1Khrista Jisu khang rui kang bammei Paul khatni aniu chana Timothi rui —
Aniw nzianmei taanv taanc nchamcmei Philemon, 2aniu tanpui Alphia, aniu rihmei sw nchamcmei Arkhippa, khatni nang kai khou kariu bammei phwamling khang hymei:#Kol 4.17
3Aniu Pu Ravguangc khatni Poubauhmei Jisu Khrista rui nangniw khou zauzian khatni chuzaenghmei tiilou diu o.
Philemon Ramzian khatni Karam Lum
4Ai huayneymei kathuic nang ta ningtowna, ai aRacguangc ta thuancku bam e. 5Kalam thu nang rui Ravguangc mei guay ta nzianmei ramzian khatni Poubauhmei Jisu khou lwmmei ramlum tei ai chu the. 6Khrista khou lwmmei khou nang ni aniw lev kadam laa nchamcmei paan rui Khrista khou bammei aniu khang naimei suaihiam guay tei thay diangh khang ai huayney bam e. 7Achanale, nang ramzian tei rui ata mpeyna tineihlalou e khatni katiu thaulou e. Nang rui Ravguangc mei guay ta chaengh tiringclou e.
Philemon khou Zaenghuaymei
8Hei zaeng rui, nang rui sw nimei tei mi kumcna sw o twna Khrista khou nang chana akhat swna latdanv tii nuh de; 9tiki ai nang ta nzianpui zaeng rui, gaanvthaih khatni ntaw Khrista Jisu khang kangkai khou bammei Paul ai rui nang khou zaenghuay e. 10Kangkai khou rui anac swmei Onesima lam khou ai nang khou zaenghuay e.#Kol 4.9 11Kahunungc nang khang gaeng makmei mei sw bam khwanmei kamei hei ntaw thu nang khang ni akhang ni gaengmei mei di the.
12Alungthw swmei kata ai rui nang khou ndiu guang dat tuang the. 13Ai gaychamv khang kang bam bam khou hei, kamei rui nang phaan asiamruai sw bam khang ai kata adaeng khou tibam nii e; 14tiki ai nang chwn thay makna hei tei sw nii mak ge. Nang rui taanclou niina taancloumei hamhna, nang chwn hamhmei khou titaanc nii mak ge.
15Kamei nang daeng khou tingsaeng bam dat khang rui, kamei nang khou rui matak khat tat pat tu khuangh the. 16Ntaw thu kamei bangh na hamh the; bangh khang suangc mbuna, akhang ni, nang khang ni, pumh khou ni, Khrista khou ni nzianmei chana di the.
17Nang rui ata nang lev akhat namei e twna ning e thei, ata laalou tu kumcna kata laalou o. 18Kamei rui nang khou nkhuailou tuang nai e thei, hamh e thei tabui pw ni kamei rui laalou tuang nai e thei, hei tei akhou chaklou tho. 19Mi hei ai rui abaanc kahak rui hy tuang e: Paul, ai rui khangclou puni. Nang kahak hei akhou pow phunghmei e twmei hei sa nii makna sa tuang e. 20Hei zaeng rui, achanale, Poubauhmei khou nang mi hei akhang taanclou o— ata tineihlalou o. 21Ai rui samei nang piulou puni twmei lwmna, ai rui samei suangc sini mbuna taanclou puni twmei thayna ai mi hei hy tuang e.
22Akhang bangvbamv chamdaanvlou o; nang rui huayneymei Ravguangc rui dawlouna, ai nangniw daeng khou guang dat khang lwmgayna bam e.
23Khrista Jisu khang rui ai lev kangkai khou bam nchamcmei Epaphra rui nangniw khang dwan gay kady e.#Kol 1.7; 4.12 24Ai lev taanv sw nchamcmei Mark, Aristarkha, Dema, khatni Luk rui ni dwan gay kady e.#Lat 12.12,25; 13.13; 15.37-39; 19.29; 27.2; Kol 4.10,14; 2 Ti 4.10,11
25Poubauhmei Jisu Khrista tuang zauzian nangniw khou nai diu!
Currently Selected:
PHILEMON 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
