TITA 2
2
Riakdyn Kalingmei
1Tiki nang thu, riakdyn kalingmei tei dinc nina e. 2Gaanvthaih guay tei mba nlau mak khang, kachangc siph sip thay khang, kapumc sinriap thay khang; lwmmei khou, nzianmei khou khatni kadyng ntipmei khou kalingmei phaydyng ding ngam khang nchamlou o. 3Hei tei kumcna ntumei gaanvdaih guay tei ni, ravningmei pui akhat tuang ziapmei kheiliak khou lungh khang nchamlou o. Kaniw tei meickai ta nsuc nrauc tanhmei khatni zouh mbana lunghmei hamhna, gaymei lat nchamlouna lungc nina e. 4Kumna puiliauh nunc ta tei kaniw gaanv gaanv khatni kaniw nac nunc ta nzian thay khang, 5pumh sianriap khang, kheiliak nthanna lungh khang, kaikhunh phungc thay khang, zauzian thay khang khatni kaniw gaanv gaanv bangc khou bam thay khang kaniw rui nchamlou kan diu. Kum pwkhou Ravguangc lat ta meic nunc rui sakasic mak khang e. 6Hei tei kumcna, chabwan guay ta tei ni kaniw pumc sinriap thay khang nchamlou o. 7Nang rui kalam kathuicna khou gaymei kheiliak lungc lyanlou o. Lungning nthanna khatni kachangc siph sipna nchamlou o. 8Meic rui khiat dat ngam lakmei kalingmei lat tei sa o, kumna aniu ta zauczihmei nunc tei ramh sa kasicloumei bam maekna zak kan diu.
9Bangh guay tei ni kaniw tuang kaipouc guay bangc khou bam chuyna kalam kathuicna khou kaniw ta tipianna lungh khang, kaniw kaipouc nunc mwang daw mak khang, 10kaniw baanc saengh makna, kaniw tuang gaymei khatni lwmnuhmei tei lungc lyanna, kaniw rui taanhmei guay khou aniu ta Guloumeipu Ravguangc tuang latdyn tei tichingkhiuhlou khang nchamlou o.
11Kalam thu maansei guayna kanloumei laa kan khang, Ravguangc rui kazauzian ndauhlou the. 12-13Aniu tuang daihmei Racguangc khatni Kanloumeipu Jisu Khrista#Aniu tuang daihmei Racguangc khatni Kanloumeipu Jisu Khrista; hamh e thei Daihmei Ravguangc khatni aniu ta Kanloumeipu Jisu Khrista. tuang hymdaihmei ndauhlou nimei suaihiam Tingmik ta rigwnna bammei dak khou, ravchap tat makmei lwnlung khatni mbaanv tuang kahawmei guay gancna, meic pumc sinriapna, nchumhna, khatni ravningmei panty khou mi mbaanv khou lungh khang, mi zauzian tei rui aniu ta nchamlou the. 14Aniu ta nkhuai mbamei kapwmna khou rui kanlou khang, aniu paap guay khou rui aniu ta sw nthanlouna, katuang mei nunc tiswlou khang khatni gaymei taanv khang lungh gutna bammei nunc tiswlou khang kamei rui aniu khang kapanty tiipatlou the.#Tat 19.5; Ria 4.20; 7.6; 14.2; Kal 130.8; 1 Pi 2.9
15Mi guay hei dinclou o; ngamv sinna katiulou o khatni luhlou o. Meic gaanv khat na rui sini nang ta mala mak khang sw o.
Currently Selected:
TITA 2: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
