TITA 1
1
Chaengriw Lat
1Ravguangc bangc khatni Jisu Khrista tuang latdiutatmei Paul rui hymei:
Ai hei, Ravguangc rui kapahloumei nunc ta lwmmei khou zay guang khang khatni kaniw ta Khrista tuang nchumhmei latdyn khou zaylou khang kapahlouna ndiuloupui mei e. 2Mi nchumhmei latdyn kiu ringcsuangmei tiiloumei lat re. Mi ringcsuangmei hei saraamh makmei Racguangc rui puakthau puaksiak hu thangc rui aniu khang nrianhlouna, 3kaganv tangc pwkhou mi hei katuang latdyn khou rui ndauh pat the. Mi latdyn tei akhou nsinlou the, kumna aniu ta Kanloumeipu Ravguangc tuang latdanv thei layna hei tei ai dinc ndauh the.
4Lwmmei nchamcmei khou anac ling swmei Tita khang hymei:
Pu Ravguangc khatni aniu ta Guloumeipu Khrista Jisu rui nang khou zauzian khatni chuzaenghmei tiilou pw diu.#2 Ko 8.23; Gal 2.3; 2 Ti 4.10
Krit khou Taanh khang Tiiloumei Taanv
5Ai rui nang ta Krit khou lou duhmei thu, taanc suak makna ganclou kanmei tei taanc nthuihlou khang khatni kaidai kathuic khou phwamling gaanthaic nunc suanglou khang e. Ai rui nang khou kadylou kanmei tei kumcna— 6phwamling gaanthaic sw nimei thu, khanvbamv maekmei; kanow akhat namei; kanac nunc ni lwmmei, latpiumei khatni meicngam meicliam makmei nina e.#1 Ti 3.2-7 7Phwamling khou taanvpy sinpui mei tei thu, Ravguangc tuang taanv sinpui mei swpui zaeng rui, kamei khanvbamv maekmei sw nina e: daihlung phungh makmei, lungh puamc tanh makmei, zouh mba makmei, kalungrat si makmei, syandui agaamv makmei, 8tiki gin ga laalou thaymei, gaymei ta laa niimei, kapumc ta sinriapmei, nchumhmei, nthanmei, khatni kheiliak chariakh thaymei sw nina e. 9Meic nunc ta nchumhmei riakdyn nchamlouna katiu thaulou ngam khang khatni nchumhmei riakdyn ta nuh makmei nunc ta akhangv ngam khang, kamei nchumhmei riakdyn tei ntipna sinpui mei nina e.
10Kalam thu meicliampui mei, mpangpui lat rui meic nunc ta guatpui mei mpeyna nai e; nkunna gihruamhmei kang tei the. 11Kaniw mwang tei thingclou nina e. Kaniw hei zak thay makna syan khang na rui kaniw nchamlou lak nimei nchamlouna kaikhunh kapwm ta sw kasic bammei nunc e. 12“Kritmei nunc hei kaganv kathuic saraamhmei nunc e, simei khouringc nunc e, khatni aliauhmei, kabung hamei nunc e,” twna kaniw tuang muczwng khat rui hyloumei tei, 13-14nchumhpui lat the. Hei zaeng rui, Jihudimei tuang luanhpui pary khatni nchumhmei ta laalou makmei nunc tuang latdanv khou lungh gut bammei phaan, kaniw lwmmei khou nchumhmei tei lwm khang kaniw ta luh ranvna luhlou o. 15Nthanmei guay khang thu ramh guayna nthan tu rana de; tiki mphuammei khatni lwm makmei guay khang thu nthanmei akhat na sini maek ge. Kalam thu kaniw lung khatni lungning mphuam ngam the. 16Kaniw Ravguangc ta thay e twna kaniw mwang rui thu sa e, tiki kaniw taanv rui thu kaniw Ravguangc ta thay mak ge twmei ndauh e. Kaniw hei Ravguangc rui karaengmei khatni latliammei, gaymei taanv taanh khang biuh makmei nunc e.
Currently Selected:
TITA 1: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
