2 TIMOTHI 4
4
1Ravguangc khatni theihmei ta ni ringhmei ta ni latzan sw nimei Khrista Jisu hu khou mi hei sa tuang e. Khrista Jisu guangh swna guang puni. Hei zaeng rui ai nang ta katiupui tuang e: 2kakwm kaganv maekna gaychamv hei dinc o; kabah tithaylouna, luhlouna, katiulouna, khaengvthayna, taek makna nchamlou o. 3Meic nunc tei nchumhmei riakdyn tei nking nii makna, kaniw rui kahaw hawmei tei dinhmei nunc ta kaw lana, chu nii nthakna nking tat kanmei ganv guang puni. 4Kaniw nchumhmei lat ta nking makna, damc duanhpui pary khou lungh gut tat kan puni. 5Tiki nang thu kaganv kathuic nang lung ding ntip bo; ryanramei khaengv o; gaychamv dinc bam o; kumna Ravguangc bangc akhat swmei tuang nang thouc guay tei taanc o.
6Akhang thu, ata khaenglou nipui ganv tangc the; mi panty hei mpatlou nipui ganv tangc the. 7Ai pak nimei lauluangc hei ai ngammei kasang karamcna pak suaklou kan the. Atuang latryan ngaeklou kan the.#Atuang latryan ngaeklou kan the; hamh e thei ai lwmmei tei lwm suaklou the. 8Ntaw thu, Poubauhmei nchumhmei Latzanpouc rui mi latzan Tingmik nungc kiu tii nimei ravchaptatmei tuang swan pyrun akhang chamdaanvlou bam the. Hei tei akhang na hamh e; kamei guangmei ta rigwnna nkhwan bammei guay khang tii puni.
Charay Lat
9Ngampui kamv katumcna adaeng khou guang khang karamc o. 10Dema thu mi mbaanv ta nzianna ata ganclouna Thessalonika kaidai thangc tat kan the. Kresken rui Galati thangc khatni Tita rui Dalmatia thangc tat kan the.#2 Ko 8.23; Gal 2.3; Kol 4.14; Phl 24; Tit 1.4 11Adaeng khou bammei Luk na di the. Nang Mark ta nduangh guang o, kamei ataanv nkhavlou khang kage nai e.#Lat 12.12,25; 13.13; 15.37-39; Kol 4.10,14; Phl 24 12Tukhika ta ai rui Ephisia thangc ndiulou kan the.#Lat 20.4; Eph 6.21-22; Kol 4.7-8 13Nang guang pwkhou, Troa khou Karpa daeng khou lou duc kanmei pheychuanh tei phungc guang nzut ro. Latrik guay tei, nthukna ramhgic tuang tei ni phungc guang o.#Lat 20.6
14Kuanri maanv Alekzandar rui ata sw kasic sihna swlou the. Poubauhmei rui kataanv thei layna khangclou dat pungh the.#Kal 62.12; Rom 2.6; 1 Ti 1.20 15Nang ni kakhou rui ramhthay o. Kamei aniu tuang latdyn ta khat sini nuh makpui mei e.
16Ai latzan bamv khou ding rey khou tei, meic gaanv khat na sini ata ding nduanghlou mak ge. Kaniw guayna ata mpatlouna tat ngam kan de. Hei tei Ravguangc rui kaniw ruc khou chaklou makmei sw kan diu! 17Tiki Poubauhmei rui ata ding nduanghlou de, kumna kamei rui akhou pumtan tiilouna, chamv tei dinclou tina Zentelmei guay ni chu kan the; khatni ata kamangliangpui mwang khou rui kanlou the. 18Ata sw kasic nimei guay khou rui Poubauhmei rui kanlou puni de, kumna tingkauh Guangcdic khou gayna nduangh guang tangclou puni de. Hymdaihmei hei kakhang tingsaeng sw diu! Amen
Kady Kanavmei
19Priskilla lev Akuila khatni Onesiphora kai kaikhunc khang dwan gay kady e.#Lat 18.2; 2 Ti 1.16-17 20Erasta Korin khou bam kan the, kumna Trophima ta nnauna Milita khou ganclou duc kan the.#Lat 19.22; 20.4; 21.29; Rom 16.23 21Nang tingsei pat mak khou guang khang karamc o. Eubula, Puden, Lina, Klaudia khatni chana guay rui nang khang dwan gay kady e.
22Poubauhmei rui nang ta nduanghlou diu!
Nang khou zauzian naimei sw diu!
Currently Selected:
2 TIMOTHI 4: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
