ROMMEI 15
15
1Tanhmei aniu rui suanmei nunc tuang puatrith tei phungc nkhavlou nina e. Aniu rui aniu rana ta tipian khang sw lak nina e. 2Aniu thu aniu chana nunc khang gay khang kakhanhna, kaniw ta kasiamh thau khang rui kaniw ta tipian khang karamc nina e. 3“Nang ta sakasicna samei guay tei akhou keylou the,” twna hyloumei kumcna, Khrista thu karana kata tipian khang ning mak ge.#Kal 69.9 4Nthanmei Latrik khou hylou bammei guay hei aniu ta nchamlou khang hylou tuang e, kumna mi paan tei rui aniu khaengvthaymei khatni katiu thauloumei laatowna rigwnmei nai khang e. 5Khaengvthaymei khatni katiuloumei tiiloumei Ravguangc rui nangniw khou, Khrista Jisu thei lay nzeicna khat lev khat lungh chamcna lungc bam khang, tiilou pw dio. 6Kumna nangniw meic guayna kariuna khwan khat na swna aniu kaipouc Jisu Khrista Pu Ravguangc hym thuanc bam khang e.
Zentelmei khang Gaychamv
7Kum thena, Khrista rui nangniw ta laaloumei kumcna, Ravguangc hym tidaih khang, nangniw khat khat ta laalou o. 8Ravguangc hei thu suai makmeipu e, kaniw pupouc nunc khou swlou kanmei latryan guay tei tiguang tangclou e twmei lyanna Khrista hei Jihudimei khang siamruaimei swna lungclou the twna ai rui sa tuang e. 9Mi hei Zentelmei guay rui ni Ravguangc ta kazauzian khang rui thuancku khang e. Mi kumna hylouna nai e:
“Kumna ai nang ta Zentelmei pang khou thuanc puni;
ai nang ta thuancna suan puni.”#2 Sa 22.50; Kal 18.49
10Mi kumna sa dat re:
“He Zentelmei, Ravguangc mei nunc lev neihla nchamc o!”#Ria 32.43
11Mi kumna ni sa dat re:
“Poubauhmei ta thuanc o,
Zentelmei guay;
zaat guayna kata thuanc o!”#Kal 117.1
12Isaia rui ni sa e:
“Jessi kikta lungc guang puni;
kamei Zentelmei ta sin khang guang puni,
kaniw kakhou lwm bam puni.”#Isa 11.10
13Bumaengh Nthanmei pumtan paan rui nangniw tuang rigwnmei tei mbu thau khang, rigwnmei tiiloumei Ravguangc rui, nangniw khou lwmmei paan rui, neihlamei khatni chuzaenghmei nangniw khou tipadiklou diu.
Paul rui Baucna Hymei lam
14Chanathiu, nangniw khou gaymei khatni thaymei mpeyna nai e, kumna nangniw khat khat ta nchamlou ngam the twmei ai nthanna thay e. 15Tiki mi tatdyn khou hei, ai rui nangniw ta tiningtowlou dat kanmei latbamv asaekc khou tei, ai baucna sa kan the. Ai mi kumcna baucna sa ngammei hei, 16Zentelmei khang Khrista Jisu tuang siamruaimei sw khang akhou tiiloumei zauzian paan rui e. Zentelmei ti hei Ravguangc rui laalou nuhmei puatkat swna Bumaengh Nthanmei paan rui kakhou katlou khang, ai Ravguangc tuang gaychamv dinhmei hei amuh khat kumcna sw bam e. 17Hei zaeng rui, ai rui Ravguangc khang taanhmei taanv khang hei, ai Khrista khou gaengh sw bam khang e. 18Zentelmei ta Ravguangc lat piumei khou zaylou khang Khrista rui ata sinswloumei lam hei ai baucna sa puni. Kamei rui hei tei lat khatni taanv paan rui taanclou e— 19charynmei khatni sw-nchinmei taanv khatni Ravguangc Bumaengc tuang pumtan rui e. Kumna, ai Jerusalem khou rui thauna Illurikkum nganv tatlouna Khrista tuang gaychamv dinc liklou kan the. 20Ai rui kahawmei thu, meic gaanv khat rui thwanloumei kaiphwn khou taanhmei hamhna, Khrista ta thay makmei bamv bamv khou Gaychamv hei dinc tat khang twmei hei e. 21Mi hei,
“Kalam khou dinclou makmei nunc tei how puni,
chu makmei nunc tei kabah thay puni,”#Isa 52.15
twna hylou bammei tei the.
Paul Rom Thangc Tat Nimei Raeng
22Hei zaeng rui, ai nangniw daeng khou guang khang ning bam sini ata khamv bammei tuang e.#Rom 1.13 23Tiki ntaw thu mi ramv gei khou hei ai taanc nimei dwan luai the, kumna ai tingkwm mpeyna nangniw daeng khou guanglou niina bammei tei, 24ntaw thu guang tangc pungh the twmei ai lwm the. Ai Spain kandic thangc tat nimei chaenglwan khou nangniw daeng khou guang khanvlou nii e, kumna ai nangniw daeng khou bam kanaklouna mi thangc tei tat pwkhou nangniw rui ata nkhavlou pw khang lwmgay e. 25Tiki aseic luan thu, Jerusalem khou bammei Ravguangc meic nunc ta nkhavlou khang ai Jerusalem thangc tat kan ni he.#1 Ko 16.1-4 26Kalam thu Makidonia khatni Akhaia kandic tuang phwamling guay rui Jerusalem khou bammei lungc ryanramei, Ravguangc mei nunc khang nzianmei kaipat tiilou khang dinglou tuang nai the. 27Hei tei kaniw taanclou niina taanclou tuang e. Kaling sa e thei, kaniw hei tei swlou nimei thouc rap di the. Jihudimei nunc rui Zentelmei khang Bumaengh tuang suaihiam nzanhlou e thei, Zentelmei guay rui ni kaniw tuang kandih puat tuang suaihiam rui Jihudimei nunc khang ni nkhavlou nipui thouc e.#1 Ko 9.11 28Ai mi guay tei kaniw khang tiilou tangna, mi taanv tei luailou kan e thei, Spain kandih thangc tat puni, kumna ai nangniw daeng khou guang khanvlou puni. 29Ai nangniw khou guang pwkhou, Khrista tuang suaihiam padikna guang puni twmei ai thay e.
30Chanathiu, aniu Poubauhmei Jisu Khrista paan rui khatni Bumaengh rui tiiloumei nzianmei paan rui, ai rui nangniw khou zaenghuay e: nangniw ni akhang huayney ranvna lay huayneylou o. 31Judia khou bammei lwm makmei nunc khou rui ata kanlou khang khatni Jerusalem khou bammei lwmmei nunc hei ai rui kaniw ta nkhavloumei hei neihlana laalou diu khang huayneylou o. 32Kumna Ravguangc rui ningmei e thei, ai neihlamei padikna nangniw daeng khou guang khang, khatni nangniw rui achaengc tiringclou khang e. 33Aniu khang chuzaenghmei tiiloumei Ravguangc rui nangniw guayna ta bam nduanghlou pw diu o. Amen
Currently Selected:
ROMMEI 15: RONGBSI
Highlight
Share
Copy

Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.