ROMMEI 14

Nang Chana ta Latzan Sw Rio

1Lwmmei khou suanmei mei ta tei laalou o; kamei rui sw bammei ta tei nsic nangh e.#Kol 2.16 2Meic gaanvsaekc rui ramh guayna tu nuh de twna lwm e; tiki karam lum suanmeipu rui gannuy paannu na tu e. 3Khav zanh thiangh makmeipu tei rui thianghmeipu ta loukey mak kan diu, khatni gannuy paannu na tumeipu tei rui khav zanh tumeipu ta tei latzan sw mak kan diu; kalam thu Ravguangc rui kata ni laalou the. 4Meickai bangc ta latzan sw khang nang thouc hamh e. Kataanv tei laalou nuhmei, laalou nuh makmei twmei hei kakaipouc nyng de. Laalou puni de, kalam thu Poubauhmei rui kata laalou ngam de.

5Meic gaanvsaekc rui tingmik akhat ta baihmei ta suangc nthukmei swna kakhanh e, khatni meic gaanvsaekc rui tingmik guayna nchamc de twna kakhanh e. Meic kathuicna katuang katuang lungning khou kakhanh chuyna kakhanh o. 6Thow pw ni tingmik akhat ta nthukna ningpui mei tei Poubauhmei ta chakhwang swna swpui tuang e; ramh katana tupui mei tei ni Poubauhmei ta chakhwang swna tu tuang e, kalam thu kamei mi taektw khang tei Ravguangc ta thuancku e. Thowkumhmei thiangc bammei tei ni, Ravguangc ta chakhwang swna thiangc bam tuang e, kumna kamei Ravguangc ta thuancku e. 7Aniu gaanv khat na sini kakhang khang na ringh mak ge, kakhang khang na ni theih mak ge. 8Aniu ringc e thei, aniu ringc bammei hei Poubauhmei khang e; aniu theic e thei, aniu theihmei hei Poubauhmei khang e. Kumna aniu hei ringc pw ni, theic pw ni Poubauhmei khang e. 9Kalam thu Khrista hei theic kanmei nunc tuang ni, ringc bammei nunc tuang ni, kaipouc sw khang kamei theiclouna ringcthau dat kan the. 10Kum e thei, tabui swna nang chana ta nang latzan sw bam tu cho? Tabui swna nang chana ta loukey bam tu cho? Aniu meic guayna Ravguangc tuang latzan bamvpaeng hu khou ding puni.#2 Ko 5.10 11Kalam thu mi kumna hylou e:

“Ai hei ringhmei Racguangc e

twmei suai makmei kumcna,

meic kathuicna ahu khou khuksun key puni khatni ai hei Ravguangc e twna meic kathuicna rui sa puni,

twna Poubauhmei rui sa e.”#Isa 45.23

12Hei zaeng rui, meic kathuic katuang katuang taanv chakh Ravguangc khou tii puni.

Nang Chana ta Swbow khang Sw Rio

13Hei zaeng rui, aniu khat khat ta latzan sw taan di kho; kumna aniu chana khat ta tiphaysuy nimei tuang hamh e thei tibow nimei tuang ramhkhat sini taanh mak khang lungning ding kho. 14Poubauhmei Jisu khou bammei akhat swna, taektw khou thu nthan makmei puat maek ge twmei ai nthanna thay e. Tiki thowkumhmei rui taektw asaekc ta nthan makmei e twna lwm e thei, hei tei kakhang nthan makmei the. 15Nang taektw rui nang rui nang chana khat ta tikabiulou e thei, hei tei nzianmei taanv hamh e. Nang tumei taektw rui, kakhang rui Khrista theicloumei gaanv khat ta swmaanlou riu! 16Nangniw rui gaymei de twmei puat ta tei meic nunc rui sina sa mak khang sw o. 17Kalam thu Ravguangc Guangcdic hei thu tu zangvmei tuang latbamv hamh e; tiki Bumaengh Nthanmei rui tiimei ravchaptatmei, chuzaenghmei, khatni neihlamei latbamv de. 18Mi hei kumcna, Khrista siamruai swpui mei ta tei Ravguangc rui pianlou e khatni maansei rui lwanlou e.

19Mi kumna, chuzaenghmei phungc guang nimei tuang khatni khat khat ta kasiamh thau nimei tuang tei sw khang aniu karamc nina e.#Aniw karamc e twna baanhhy baibal asaekc khou hylou e. 20Ravguangc taanv ta tei taektw zaeng rui sw kasic dat ri kho. Taektw guayna gay bam nuh de, tiki meic gaanv khat ta tiphaysuy nimei taektw tumei thu nkhuai e. 21Zanh tu makmei, zouh zangv makmei, tabui pw ni nang chana ta tiphaysuy nimei tuang tei taanc makmei hei rui gay e. 22Mi lam khou hei nang rui lwmmei tei, Ravguangc nangney kak khou na lou bam o. Kamei rui nchumh de twna ningna taanhmei tei kalungning rui nkhuai e twna salou makpui mei tei sangaymei e! 23Tiki kamei tumei tei lwmsina tu e thei, hei tei nkhuai e; kalam thu kamei lwmmei thei layna taanh mak khe. Lwmmei thei layna taanh makmei taanv guay paapc be.

Currently Selected:

ROMMEI 14: RONGBSI

Highlight

Copy