NDAUHLOUMEI 21
21
Tingkauh Kathanc khatni Kandih Kathanc
1Mi tangv tingkauh kathanc khatni kandih kathanc ai how e. Reymei tingkauc khatni reymei kandic tei maek khe; duipui nai dat mak khe.#Isa 65.17; 66.22; 2 Pi 3.13 2Kumna Nthanmei Kaidai, Jerusalem kathanc, kagaanv khang karuhloumei nowpeic kumcna Ravguangc khou rui tingkauh thangc rui keymei ta ai how e.#Isa 52.1; 61.10; Nda 3.12 3Khoutei guangh bamvpaeng khou rui kauc ranvna mi kumna samei ai chu e: “Zauclo, ntaw khou rui maansei pang khou Ravguangc kai sw puni the. Kamei kaniw pang khou lungc bam puni the, kumna kaniw kamei nunc sw bam puni the. Ravguangc kamei kahak kaniw lev bam nchamc puni the, kumna kamei kaniw Racguangc sw puni the.#Eze 37.27; Lev 26.11,12 4Ravguangc rui kaniw mikdui roulou puni. Theihmei, zaengsimei, kapmei, suhmei nai dat lak khe. Reynungc tuang guay tei maan ngam kan the.”#Isa 25.8; 35.10; 65.19
5Khoutei guangh bamvpaeng khou dungc bammeipu tei rui sa e, “Zauclo, ai rui ramh guayna kathanc kasiamhlou the!” “Mi hei hylou o, kalam thu mi hei nchumhmei lwmnuhpui lat re,” twna akhou sa e. 6Khoutei kamei rui sa e, “Mi guay hei luai the! Ai hei Alpha khatni Omega e—reymei khatni nkhamhmei e. Tarimei guay ta katy kamanv maekna ringhmei duipuakckai khou tizangv puni.#Isa 55.1 7Rihngam guangmei guay, mi guay hei laa puni; kumna ai kaniw Pu sw puni, kaniw anac nunc sw puni.#2 Sa 7.14; Kal 89.26-27 8Tiki zammei nunc, lwm makmei nunc, mphuam tanacmei nunc, meicdowmei nunc, lungcmaanv lungcmowmei nunc, duaih raengh sinmei nunc, ravmaengc kalummei nunc, khatni saraamhmei guay khang thu, maipu rui chuangc bammei maizeic tei the. Mi hei theic kaneimei kiu the.”
Jerusalem Kathanc
9Nkhamhmei ntaamhmei chanei lou padikmei kamkuak chanei sinmei kauh baanchara chanei pang khou gaanv khat adaeng khou guangna, “Guang o, Lauziu Nac tuang Nowpeicpui ta nang khou lyanlou puni,” twna sa the. 10Bumaengh rui ata zynna, mi kauh baanchara tei rui ata kauhmei chyngbut akhat twan khou phungc kulou the. Kumna Nthanmei Kaidai, Jerusalem tei Ravguangc khou rui tingkauh thangc rui keymei ta akhou lyanlou the.#Eze 40.2 11Hei tei Ravguangc tuang hym rui titah ta e; hei tei kamanv kunghmei tauc kumc e, jaspar tauc kumc e, gunh bangv kumc nthan panglingh ling e. 12Mi kaidai raengc tei daic e, kauh e, raenghmun ruhna kanei nai e kumna kauh baanchara ruhna kaney rui gaek bam e. Raenghmun guay khou tei Isaraelmei kaikhwang ruhna kanei zanc hylou e.#Eze 48.3-35 13Neihpat thangc raenghmun kathumh, dihpy thangc raenghmun kathumh, dihba thangc raenghmun kathumh, neihkey thangc raenghmun kathumh nai e. 14Mi kaidai raengc tei kabam tauc ruhna kanei nai e. Mi guay khou tei Lauziu Nac tuang latdiutatmei nunc zanc hylou e.
15Mi kaidai, karaengcmun guay khatni karaengc tei ndat khang, akhou lat sa bammei kauh baanchara tei ramh saanv guanpui tuang kachaekc builwang sin bam e.#Eze 40.3 16Mi kaidai tei kasaeng kadai nchamc e. Kamei rui mi katuang ndatpui builwang tei rui mi kaidai tei ndat the: hei tei mail ching khat phay panguh saengc e, mi zu tei daic e khatni kakau ni hei tei lev nchamc muay e. 17Kamei rui raengh tei ni ndat re, kumna kauh baanchara tuang dath tei maansei tuang dath khou chowbuk phay khat riakdeina padeih kauh e.#kauh e: hamh e thei nsu e. 18Mi raengc tei jaspar tauc rui sw e, mi kaidai kahak tei nthanmei kachaekc rui sw e, maengzau kumc karang e.#Isa 54.11-12 19Mi kaidai raengc tuang kabam tauc guay tei kamanv kunghmei tauc zaatc guayna rui karuh e: reymei rui jaspar, kaneimei rui saphir, kathumhmei rui kalkidoni, padeihmei rui emeral, 20panguhmei rui sardonik, charukmei rui sardi, chaneimei rui krisolai, tachatmei rui beril, chakiumei rui topaz, ruhmei rui krisoprasu, ruhna akhatmei rui jasin, ruhna kaneimei rui amethist, mi guay hei e. 21Raenghmun ruhna kanei tei mukta ruhna kanei e; raenghmun kathuic tei mukta akhat khat rui sw e. Mi kaidai tuang chaengdai tei nthanmei kachaekc rui sw e, hei tei mingsian kumcna how alamv e.
22Mi kaidai khou tei ravkai how mak ge; kalam thu Poubauhmei Ngamparimei Racguangc khatni Lauziu Nac hei mi tuang ravkai kiu rap di the. 23Mi kaidai tei tigaanclou khang bw neih kage nai dat mak khe; kalam thu Ravguangc riw rui mi khou tei gaanc e, khatni thauhmai kiu Lauziu Nac hei di the.#Isa 60.19-20 24Kandihmei zaatc guay kariw khou tei lungc bam puni, kumna mbaanv tuang guangc guay kaniw tuang lanv mi khou tei phungc guang puni. 25Mi kaidai tuang raengcmun guay tei neihmaryn mbangh zat mak ge; mi khou tei zingbangc maek ge.#Isa 60.11 26Zaatc guay tuang tikgunc khatni lanv mi kaidai khou tei phungc guang puni. 27Tiki mi khou tei nthan makmei, khatni meic chanypui taanv taanhpui mei khatni saraamhpui mei gaanv khat na sini gut lak ge. Lauziu Nac tuang ringhmei latrik khou kazanc naipui mei nunc na tei gut puni.#Isa 52.1; Eze 44.9
Currently Selected:
NDAUHLOUMEI 21: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
