NDAUHLOUMEI 20
20
Tingkwm Ching Khat
1Mi tangv kasyng maekmei khunc tuang khamvtaan khatni kangriang daihmei sinna kauh baanchara akhat tingkauh thangc rui keymei ta ai how e. 2Kamei rui reydouc tuang nrui, ravsic hamh e thei Seitaan twna kawmei thaanngangc ta tei nymna kangriang tei rui tingkwm ching khat khang bangclou kan the.#Tha 3.1 3Tingkwm ching khat ganv tei luai kan mak saanv, kamei rui zaatc nunc ta guat dat mak khang, kauh baanchara tei rui kata tei mi khunc khou tei phaiclou kan the. Kumna kaikhamv taanlouna seal swlou kan the. Tingkwm ching khat tangv matak khat khang kata mpat pat dat puni.
4Mi tangv guangh bamvpaeng mpeyna how e. Jisu tuang lat khatni Ravguangc lat dinhmei zaeng rui kaniw py dangv kanmei nunc tuang bumaengc guay ta ni how e. Kaniw tei khouringh ta tei hamh e thei mi khouringc maengc ta tei kalum makmei nunc, khatni kaniw sanpiang khou hamh e thei kaniw baanc khou mi khouringc tuang madanhmei maengc tei hylou makmei nunc e. Kaniw tei ringcthau datna mi guangh bamvpaeng guay khou tei dungc the. Kalam thu guanghtu khang Ravguangc rui kaniw khou ngamv tiilou the. Kumna kaniw tingkwm ching khat Khrista lev guanghtu nchamc the.#Dan 7.9,22 5(Mi tingkwm ching khat tei luai mak saanv, theic kanmei baihmei guay tei thu ringcthau mak ge.) 6Mi ringcthau dat reymei khou hei kazauhmei nunc tei sangaymei nunc e; kaniw hei Ravguangc tuang e. Theic kaneimei tei rui kaniw ta ngam dat lak khe; kaniw tei Ravguangc khatni Khrista tuang amuc sw puni. Kumna Khrista lev tingkwm ching khat guanghtu puni.
Seitaan ta Maikwam khou Loumei
7Tingkwm ching khat tangv, Seitaan ta kangkai khou rui mpat pat dat puni. 8Kandih kwn padeih khou lungc bammei zaatc guay, mi kiu, Gog lev Magog ta guat khang kamei pat puni. Rih adow khang Seitaan rui kaniw ta duipui syniang zu khuam guang kaduailou the.#Eze 7.2; 38.2,9,15 9Kaniw kandih kapwm khou patna, nthanmei nunc khatni Ravguangc nzianmei kaidai ta dingbin the. Tiki tingkauh thangc rui mai tikeyna kaniw ta raw the. 10Khoutei kaniw ta guatmei ravsic ta tei maipu rui chuangc bammei maizeic khou phaiclou the. Hei tei khouringh khatni guatmei muczwng ta tei phaiclou kanmei bamv tei e. Mi khou tei kaniw zingbangc kalaanv tingsaeng ryanra khaengv bam puni.
11Mi tangv, gaanv khat daihmei mphwanmei guangh bamvpaeng akhat khou dungc bammei ta ai how e. Khoutei tingpuk kandih maan kan the, kumna hei tei how dat mak khe.#Dan 7.9-10 12Khoutei theic kanmei guay, nthyammei ni daihmei ni, meic guayna mi guangc bamvpaeng hu khou tei ding bammei ta ai how e. Latrikbuk mpeyna phaek patlou the; baihmei latrikbuk, ringhmei latrikbuk ni phaekpatlou the. Theic kanmei guay ta tei, mi latrikbuk guay khou tei kaniw taanv hylou bammei tei zaucna latzan sw the. 13Khoutei duipui rui kakhou naimei theihmei guay ta tiipat the. Theihmei lev taruaih rui ni kakhou kakhou naimei theihmei guay ta tiipat the. Meic guayna ta kataanv kataanv thei layna latzan sw the. 14Kumna theihmei lev taruaih ta maizeic khou phaiclou kan the. (Mi maizeic hei theic kaneimei kiu the.) 15Ringhmei latrik khou kazanc hylou makmei guay ta tei mi maizeic khou tei phaiclou e.
Currently Selected:
NDAUHLOUMEI 20: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
