NDAUHLOUMEI 22
22
1Kauh baanchara tei rui akhou ringhmei duiriang ni lyanlou e. Hei tei Ravguangc lev Lauziu Nac tuang guangcbamvpaeng khou rui zikdui kumcna karangna luangcpat re.#Eze 47.1; Zek 14.8 2Hei tei mi kaidai chaengluang chung khou tei luangc key e. Mi duiriang naek kanei khou tei ringhmei thingbang thau e. Hei tei bw pum kathai nthaina tingkwm khou kathai ruhna kanei nthai e. Mi nuy tei zaatc nunc ta tigay khang e.#Tha 2.9; Eze 47.12 3Ravsyang phunghmei khat na sini mi khou tei nai dat lak khe. Ravguangc lev Lauziu Nac tuang guangcbamvpaeng mi khou tei nai puni, kumna kabangc guay rui kata kalum bam puni.#Zek 14.11 4Kaniw Ravguangc zawpaanv how bam puni, khatni kazanc kaniw sanpiang khou hylou puni. 5Mi khou tei zingbangc nai dat lak khe; mi khou tei thauhmai ni, neihmik ni kage nai dat lak khe; Poubauhmei Ravguangc riw rui kaniw khang gaanclou puni the. Kumna kaniw tingsaeng guanghtuna lungc puni the.#Isa 60.19; Dan 7.18
Jisu Guang Dat Nimei
6Mi tangv kauh baanchara tei rui akhou sa the, “Mi lat guay hei nchumhmei lwmnuhmei lat re. Asaanh mak khou pat punimei guay tei kabangc guay khou lyanlou khang, katuang Bumaengc muhzwng guay khou tiiloumeipu Poubauhmei Ravguangc rui katuang baanchara ta ndiulou the.”
7“Zauclo, Ai guang zaic puni the! Mi latrik khou dinc kasuakcloumei guay hei laaloupui mei tei sangaymei e!” twna Jisu rui sa e.
8Mi guay hei chumei khatni howmei kiu Jahon ai the. Mi guay hei ai chu tang, how tang pwkhou, kata kalum khang ai, akhou mi guay hei lyanloumei kauh baanchara hu khou tei nkhum laamv key the. 9Khoutei kamei rui, “Ata kalum rio! Ai thu nang khatni nang chana punav muhzwng guay khatni mi latrik khou hyloumei lat guay hei laaloumei guay lev siamruaimei makaamv de. Ravguangc ta kalum o!”
10Kamei rui akhou mi kumna sa e, “Mi latrik khou hyloumei ndauhloumei lat guay hei nkamhlou dat ri tho. Kalam thu mi guay hei asaanh mak khou pat puni the. 11Simei taanhmei guay tei simei tei taanc bam kan di tho, khatni mphuammei guay tei mphuam bam kan di tho; ravchaptatmei guay tei ravchaptat bam kan di tho, khatni nthanmei guay tei nthanna bam kan di tho.#Dan 12.10
12“Zauclo, ai guang zaic puni the! Meic kathuicna khang kataanv kataanv thei layna tii khang meic guayna tuang taanvphy ai phungc guang puni.#Isa 40.10; 62.11; Kal 28.4; Jer 17.10 13Ai hei Alpha khatni Omega e, reymei khatni nkhamhmei e.”#Nda 1.8,17; 2.8; Isa 44.12
14Kaniw tuang pheychuanh sou nthanmei nunc tei sangaymei nunc e. Kaniw ringhmei thingbang thai tei tu puni khatni raenghmun guay khou tei rui mi kaidai khou gut puni.#Tha 2.9; 3.22 15Tiki si nunc, duaih raengh sinmei nunc, lungcmaanv lungcmowmei nunc, meicdowmei nunc, ravmaengc kalummei nunc, khatni saraamhmei ta kahawna saraamc bammei nunc tei, mi kaidai lungc khou gut lak ge.
16“Mi guay hei phwamling guay khang nangniw khou dinclou khang, Jisu, ai rui atuang baanchara ta ndiulou tuang the. Ai hei David kaikhwang khou lungc guangmeipu e; ai hei karangmei lauthwan gaanphiu e.”#Isa 11.1,10
17Bumaengh khatni nowpeic tei rui, “Guang tho!” twna sa the.
Mi hei chumei kathuic rui ni, “Guang tho!” twna sa kan dio.
Tarimei guay guang o; ringhmei dui hei kahawmei guay katy kamanv tii makna guang zangv o.#Isa 55.1
Latriaw
18Mi latrik khou dinc kasuakcloumei lat guay hei chumei kathuic khou Jahon, ai rui pingthay khang sa e: thowkumhmei rui mi khou hei tabui pw ni haaplou e thei, mi latrik khou dinckasuakcloumei kamut kamaimei hei kakhang haaplou puni.#Ria 4.2; 12.32 19Thow pw ni mi latrik khou hyloumei dinc kasuakcloumei khou hei rui tabui pw ni laa ganc e thei, mi latrik khou hyloumei ringhmei bang tuang thai tu nimei khatni Nthanmei Kaidai khou gut nimei katuang dam tei laa ganc puni.
20Mi guay hei saloumeipu rui, “Ngguay, ai guang zaic puni the! Suai dat mak khe!” twna sa the. Amen. Poubauhmei Jisu, guang tho!
21Poubauhmei Jisu tuang zauzian nthanmei guay khou#nthanmei guay khou: Mi hei Ravguangc mei guay khou twpui tuang e. Baanhhy baibal asaekc khou thu meic guayna khou twna ni hylou e. nai di tho. Amen.
Currently Selected:
NDAUHLOUMEI 22: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
