NDAUHLOUMEI 11
11
Ravguangc tuang Muczwng Gaanv Nei
1Mi tangc, ramh ndatpui tuang builwang kumhmei akhat akhang tiina sa e, “Nang tatna Ravguangc tuang Ravkai khatni ravchabamv tei ndat ro. khatni mi khou tei kalummei nunc sing tei pac o.#Eze 40.3; Zek 2.1-2 2Tiki kapaengcmei kaisangc guay tei thu ganclou o; ndat rio. Kalam thu mi guay tei Zentelmei khou tiilou kan the; kaniw mi Nthanmei Kaidai khou tei bw riakdeina kanei ruan bam puni the.#Luk 21.24 3Ai rui alat dinhmei gaanv nei ndiu guang puni, kumna kaney pheyga piuna mi zaeng ching khat phay nei riakcharuk lungc khou tei ravmundinc puni.”
4Mi ravlat dinhmeipu nei hei, kandih kaipouc hu khou ding bammei Olive bang nei khatni thauhmai nei tei e.#Zek 4.3,11-14 5Thow pw ni, kaney ta sw kasic khang swpui mei ta, kaney mwang khou rui mai patna swmaan puni. Mi kumna kaney ta sw kasic khang swmei guay ta swluai puni. 6Kaney ravmundinc bammei lungc khou tingriu mak khang tingpuk ta khaamlou ngammei ngamv kaney khou nai e. Duithuak dui guay ta ni zei tiguanhlou khang kaney khou ngamv nai e. Kaney rui ningmei thei layna apun alun tiguangna ni kandih ta sw kasic khang ngamv nai e.#1 Ki 17.1; Tat 7.17-19; 1 Sa 4.8
7Kaney rui dinc ndauh nimei lat guay tei dinc tang pwkhou, kanganv maekmei khunc khou rui patmei khouringc tei rui kaney ta adowna ngam puni. Kumna kaney ta swluai puni.#Dan 7.7,21; Nda 13.5-7; 17.8 8Kaney pumc tei latgiam swna Sodom khatni Izip twna kawmei, kaney kaipouc ta swluaimei bamv daihmei kaidai tuang chaengluang khou nzilou puni.#Isa 1.9-10 9Kaney pumc tei mbeih makna zaeng neih thumh kapaek mi khou tei lou bam puni. Kumna kandihmei meic katana rui hei tei zauc bam puni. 10Kaney theihmei khou tei kandihmei maansei guay neihla puni. Mi muczwng nei hei rui kandihmei ta heidi swryanralou timei khou tei rui, kaney theih khou tei khat khat khang kaipat tiina neihlamei ndauh puni. 11Zaeng neih thumh kapaek tangv Ravguangc tuang ringhmei thiu kaney khou tiilou dat tina, kaney ringcna dingthau dat puni. Kumna hei tei howmei guay ping puni.#Eze 37.10 12“Mi khou hei ku o!” twna tingkauh thangc rui kauc keymei khwan kaney chu lana, kaney ta zauczihmei guay hu khou muangh khou rui tingkauh thangc ku kan the.#2 Ki 2.11 13Mi dyng khou tei baengladai zay the; kumna mi kaidai tei kadam ruh khou akhat sw kasih the, khatni meic ching chanei swluai the. Ringc bam duhmei guay tei ping the, kumna tingkauh Racguangc hym thuanc the.#Nda 6.12; 16.18 14Kaneimei ryanra ryanriumei tei luai kan the; tiki kathumhmei ryanra ryanriumei tei guang nuangc puni the!
Chaneimei Bianggun Muanmei
15Mi tangv chaneimei kauh baanchara tei katuang bianggun muan the. Khoutei tingkauh thangc mi kumna kauc the, “Ntaw thu mbaanv ti hei Poubauhmei khatni katuang Messia rui sin puni the, kumna kamei tingsaeng guanghswna sin puni!”#Tat 15.18; Dan 2.44; 7.14-27 16Khoutei Ravguangc hu khou kaniw tuang guangh bamvpaeng khou dungc bammei gaanvthaih nchuihna padeih tei nkhum laamv keyna Ravguangc ta kalum the. 17Kaniw rui mi kumna sa the:
“Nai bam khwanmei khatni nai bammei,
Poubauhmei Ngamparimei Racguangc!
Nang tuang pumtan daihmei tei sinswna nang guangh swna sinmei khang hei rui nang ta thuancku e!
18Zaatc guay lungh puamc the,
kalam thu nang lungpuam ganv tei guang the,
theihmei ta latzan sw nipui ganv tei guang the.
Nang bangc nunc khang swan tii nipui ganv,
muhzwng nunc khang,
nang mei guayna khang,
nang ta pingmei daihmei khatni
nthyammei katana khang,
swan tii nipui ganv guang the.
Mbaanv ta swmaanmei nunc ta
swmaan nipui ganv guang the!”#Kal 2.5; 110.5; 115.13
19Khoutei tingkauh thangc Ravguangc tuang ravkai laanc pat the, kumna mi khou tei Latryan Khuk tei how e. Khoutei tingpalik ganhkey the; baengla zay the; nrihthai key dai key the.#Nda 8.5; 16.18,21
Currently Selected:
NDAUHLOUMEI 11: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
