NDAUHLOUMEI 10
10
Kauh Baanchara khatni Latrikzy Launa
1Pumtan daihmei kauh baanchara gaanv khat tingkauh thangc rui keymei ta ai how e. Kamei tei muangh rui duam e khatni kapy khou muangsingc souc e. Kazaw neihmik kumc e, khatni kaphay maitiangc kumc e. 2Ricpatloumei latrikzy launa kabaanc khou sin bam e. Kaphay nzat duipui khou khatni mbai phay ramkiang khou dingna, 3kauc ranvna kamangliangpui ra kumcna kauc e. Kamei rui kauc ti khou ganh key luan chaneina mundaw e. 4Ganh key luan chanei tang rappui lev, ai hy khang sw the. Tiki, “Ganh chanei rui samei tei ndauh pat rio; hei tei hylou rio!” twna tingkauh thangc rui sa keymei ai chu the.
5Khoutei kaphay duipui khatni ramkiang khou ding bammei baanchara tei kabaanc tingkauh biak thangc zay thauna,#Tat 20.11; Ria 32.40; Dan 12.7; Amo 3.7 6tingpuk, kandih, duipui khatni mi khou nai bammei katana damcloumeipu, theih makmeipu Racguangc zanc khou syangdyng swna sa the, “Nzaeng dat bam ni tu hamh the! 7Chaneimei baanchara rui katuang bianggun muan pwkhou, kamei rui kabangc muhzwng guay khou dincloumei, meic thay makmei katuang raeng tei tiguang tangc puni the.”
8Ai chu kanmei tingkauh thangc rui sakeymei khwan tei rui, “Duipui khatni kandih khou ding bammei kauh baanchara tei rui sin bammei ricpatloumei latrikzy tei nang guang laa tho,” twna samei ai chu dat re.#Eze 2.8—3.3
9Ai kauh baanchara daeng khou kiu guangna mi latrikzy launa tei ney the. Khoutei, “Laana tu tho; mi hei nang mwang khou thu nkhuaihdui kumcna ndeih puni, tiki nang bung khou thu nkhuc puni,” twna sa the.
10Ai mi latrikzy launa tei kabaanc khou rui laana tu the. Hei tei amwang khou thu nkhuaihdui kumcna ndeih e, tiki kaduk key tang pw khou thu abung khou nkhuc the. 11Mi tangv, “Zaatc guay, guanghdic guay, lat guay, khatni guangh guay lam khou Ravguangc rui samei lat hei, nang dinc dat nina e,” twna akhou sa the.
Currently Selected:
NDAUHLOUMEI 10: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
