NDAUHLOUMEI 9
9
1Panguhmei kauh baanchara tei katuang bianggun muan the. Khoutei gaanchuangcna akhat tingkauh thangc rui kandih khou taekkey kanmei ta how e. Kumna kakhou kanganv maekmei khunc#kanganv maekmei khunc: Mi hei nkhamhmei latzan tingmik tangh mak saanv ravsic nunc ta bangclou bampui bam ta e. tuang khamvtaanv tiilou kan e. 2Kamei rui mi khunc tei laanc pat pwkhou, maimangh daihmei khou rui patmei maikhou kumcna maikhou pat the. Mi khunc khou tei rui patmei maikhou tei rui neihmik zingc the.#Tha 19.28 3Mi maikhou khou tei rui nkav pang patna kandih khou key the. Mi nkav pang khou tei ravga khou tiiloumei pumtan tei tiilou kan the.#Tat 10.12-15 4Kaniw tei nuy, thingbang hamh e thei tabui tabui bang ta pw ni sw kasic lak nina e; tiki kaniw sanpiang khou Ravguangc tuang seal namlou makmei mei guay ta sw kasic khang e twna salou kan e.#Eze 9.4 5Mi nunc ta tei kaniw swluai khang hamh e, tiki bw panguh rai khang e. Mi raimei ramsu tei ravga sat ramsu kumc puni. 6Mi bw panguh lungc khou tei kaniw theic nii puni the, tiki theic ni tu hamh e; kaniw theic nii puni, tiki theihmei hei kaniw khou rui duc tat kan the.#Job 3.21; Jer 8.3
7Mi nkav nunc tei rihbamv khou gut khang chamdaanv bammei takuanc nunc kumc e. Kaniw py khou kachaekc tuang guanghpyrun kumhmei run e, kumna kaniw zaw tei maansei zaw kumc e.#Jol 2.4 8Kaniw sam tei ni ntumei sam kumc e khatni kaniw nei tei kamang nei kumc e.#Jol 1.6 9Kaniw ngaengv tei ntanh tuang ngaengvthuapc kumhmei duap be, kumna kaniw sw kalaapcmei khwan tei takuanh pang gacri zayna rihbamv khou pak gutmei khwan kumc e.#Jol 2.5 10Kaniw mai ravga mai kumcna nai e. Mi khou tei kaniw sat nai e. Meic nunc ta bw panguh tiryanra nimei pumtan tei mi mai khou tei nai the. 11Kanganv maekmei khunc sinmei kauh baanchara tei rui kaniw ta guangh swna sin e. Mi pu zanc tei Ibrimei lat khou Abaddon, khatni Grikmei lat khou Apollion twna kaw e. (Mi kabac kiu thu “swmutmei” twna e.)
12Reymei meicpingmei tuang kiu luai kan the. Mi tangv hei guang dat nimei kanei nai he.
13Mi tangv, charukmei kauh baanchara tei katuang bianggun muan the. Khoutei Ravguangc hu khou ding bammei kachaekc ravchapaeng tuang kwn padeih khou tei rui khwan akhat ai chu e.#Tat 30.1-3 14“Daihmei Euphretis Duiriang khou bangclou bammei kauh baanchara padeih ta tei mpatlou ti tho!” twna bianggun sinmei charukmei kauh baanchara khou tei sa khwan e. 15Mi kauhbaanchara padeih ta tei mpatlou the. Maansei kadam kathumh khou akhat ta swluai khang, mi ganvdak, tingmik, bw khatni tingkwm hei tangh mak saanv bangclou bam tuang e. 16Takuanhricmei kang tei kasing ching phaymei luan ching e twna ai chu e. 17Takuanh nunc ta tei khatni mi khou tei tuangc bammei nunc ta tei ai mi ndawman khou tei how e: kaniw tuang ngaengthuapc guay tei mai kumc haengc e, saphir tauc kumc nrym e, khatni maipu kumc nzinh e. Takuanh nunc py guay tei kamangliangpui py kumc e, kumna kaniw mwang khou rui mai, maikhou, khatni maipu mphiu pat re. 18Mi takuanc guay mwang khou rui patmei tasiat kathumh—mai, maikhou, khatni maipu hei rui maansei kadam kathumh khou akhat ta swluai the. 19Kalam thu takuanh guay tuang pumtan tei kaniw mwang khou khatni kaniw mai khou nai e. Kaniw mai tei kapy nai e, nrui kumc e, kumna hei tei rui meic nunc ta nchow the.
20Mi ntaamhmei hei rui swluai nsaekcloumei maansei guay tei kaniw rui kasiamhloumei ravmaengc tei mpat mak ge. Kaniw rasic nunc ta kalummei mpat mak ge. Kamik how makmei, kanu chu makmei, tat thay makmei daandi, kachaekc, kuanzinc, ntauh khatni thing rui kasiamhmei ravmaengc guay ta mpat mak ge.#Kal 115.15-17; Dan 5.23 21Kaniw tuang meicdowmei, duaih raengh, lungcmaanv lungcmowmei, khatni kaihouhmei khou rui lungh laih mak ge.
Currently Selected:
NDAUHLOUMEI 9: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
