KALUMLU 9
9
Ravguangc ta Katuang Nchumhmei Taanv khang Thuanhmei
1He Ringhpouc, nang ta thuanc ni,
alung kapwm rui thuanc ni,
nang rui taancloumei charynmei taanv guay ta tei ai rac ni.
2He Ngamparymei Racguangc,
ai neihlana suan ni,
nang paan rui nang ta thuancna suan ni.
3Nang guang pwkhou ata zauczihmei nunc pak kan the,
kaniw bow keyna theic kan the.
4Nang rui nchumhna kalingmei latzan sw the;
nang rui akhang latzan swlou the.
5zentelmei nunc ta nang rui luh kan the,
meicsimei nunc ta nang rui swmaan kan the;
kaniw ta ningtow dat lak khe.
6Aniw ta zauczihmei nunc ta tingsaeng khang swmaanlou kan the;
nang rui kaniw kaidai guay swmaan kan the,
mi guay ta tei ningtow dat lak khe.
7Tiki Ringhpouc thu tingsaeng guangc e;
latzan sw khang kaguangc bamvpaeng kasiamh thau kan the.
8Kamei rui kandih ta nchumhna sin the;
kamei rui zaatc guay ta nchumhna latzan sw the.
9 Ringhpouc hei rairiu khaengvmei nunc khang duploupui bamv e,
ryanrapui ganv guay khou duppui bamv e.
10He Ringhpouc, nang ta thaymei guay nang khou lwm puni;
nang khou guangmei gaanv khat na ta sini nang ganc pat mak ge.
11 Ringhpouc ta thuancna suan o,
Zaion khou guanghtu bammeipu ta thuanc o!
Kamei rui taancloumei tei zaatc kathuic khou dinc ndauh o!
12Ryanra khaengv bammei nunc ta Ravguangc thay e;
kaniw rui kapna huaymei ta kamei amuc mak ge;
khatni kaniw khou sina swloumei nunc ta kamei rui dandi tii e.
13He Ringhpouc, ata zauc-nzianlou o!
Ata zauczihmei nunc rui
tiryanra bammei ramrianra hei zauclou o!
He Ringhpouc, ata theic nimei khou rui kanduaklou o;
14ai Jerusalemmei nunc mav khou dingna,
ai rui nang ta thuanc bammei lam guay hei kaniw khou dinc ndauh ngam khang kanlou o.
Ai neihla ni, kalam thu nang rui ata kanlou the.
15Zentelmei nunc tei kaniw rana kaniw kwam khou keylou kan the;
kaniw rana kaniw phac khou manc kan the.
16 Ringhpouc katuang nchumhmei latzan rui kaniw ta ndauhlou the,
khatni meicsimei nunc kaniw rana kaniw phac khou manc kan the.
17Meicsimei guay,
Ravguangc ta ganc patmei guay tuang nganvlou nimei thu theihmei e.
18Lungcthuy lakmei ta ntaamvna amuclou tanh tan lak ge;
lungcsimei nunc tadiuc tiguang tangclou puni.
19He Ringhpouc, guanglou o!
Maansei rui nang ta ngam mak kan diu!
Zentelmei nunc ta nang mav khou khuam guangna,
kaniw ta latzan swlou o.
20He Ringhpouc, kaniw ta tipinglou o;
kaniw hei theic nimei maansei dyng e
twmei kaniw ta tithaylou o.
Currently Selected:
KALUMLU 9: RONGBSI
Highlight
Copy
Compare
Share
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
